A devolución das taxas de dereitos de exame das probas dirixidas á obtención e renovación do certificado de conselleiros de seguridade para o transporte de mercadorías perigosas, tanto na modalidade de estrada como na de ferrocarril.

As persoas aspirantes que resulten excluídas definitivamente das probas.

Solicitudes

As solicitudes presentaranse preferiblemente por vía electrónica a través do formulario normalizado ( anexo IV ) dispoñible na sede electrónica da Xunta de Galicia, https://sede.xunta.gal.

Opcionalmente, poderanse presentar as solicitudes presencialmente en calquera dos lugares e rexistros establecidos na normativa reguladora do procedemento administrativo común.

Para a presentación electrónica das solicitudes poderá empregarse calquera dos mecanismos de identificación e sinatura admitidos pola sede electrónica da Xunta de Galicia, incluído o sistema de usuario e clave Chave365 (https://sede.xunta.gal/chave365).

Admisión de persoas aspirantes

1. Unha vez finalizado o prazo de presentación de solicitudes, o tribunal encargado de avaliar as probas revisará se estas reúnen as condicións previstas nesta convocatoria e no resto de normativa aplicable.

Rematado este proceso, exporase na sección de formación da páxina web (https://conselleriadepresidencia.xunta.gal/formacion-profesionais-transporte/convocatorias) a lista provisional de persoas admitidas e excluídas, con indicación do motivo da súa exclusión.

2. As persoas aspirantes excluídas disporán dun prazo de 10 días hábiles, contados a partir do día seguinte ao da exposición da devandita lista, para poder emendar, se é o caso, o defecto que motivou a súa exclusión ou efectuar reclamación.

3. Unha vez analizadas as emendas e as reclamacións, de ser o caso, presentadas, o tribunal publicará na sección de formación da súa páxina web https://conselleriadepresidencia.xunta.gal/formacion-profesionais-transporte/convocatorias as listas definitivas de persoas admitidas e excluídas.

4. Agás nos supostos previstos no punto 4 da base novena, devolveránselles os dereitos de exame ás persoas aspirantes que resulten excluídas definitivamente das probas, sempre que o soliciten, empregando o modelo que figura como anexo IV desta resolución, e que estará dispoñible na sede electrónica da Xunta de Galicia (https://sede.xunta.gal) co código IF310C, no prazo dun mes, contado a partir do día seguinte ao da publicación indicada no punto anterior.

Trámites administrativos posteriores á presentación de solicitudes

A sede electrónica da Xunta de Galicia permítelles ás persoas interesadas realizar trámites electrónicos con posterioridade ao inicio do expediente, accedendo á Carpeta cidadá da persoa interesada. Opcionalmente, as persoas interesadas tamén poderán realizar os ditos trámites presencialmente en calquera dos lugares e rexistros establecidos na normativa reguladora do procedemento administrativo común.