Establecer as bases reguladoras do procedemento de concesión de axudas de emerxencia social e proceder á súa convocatoria para o ano 2026, coa finalidade de outorgar unha prestación económica única a persoas emigrantes de nacionalidade española e orixe galega residentes en América con escasos recursos, e aos seus descendentes, para atender situacións de imperiosa necesidade derivadas de circunstancias extraordinarias sobrevindas nos últimos 12 meses

Poderán ser persoas beneficiarias destas axudas:

1. As persoas emigrantes nacidas en Galicia e residentes nalgún dos países de América para os cales o Estado español teña fixada unha base de cálculo para a prestación por razón de necesidade no ano anterior ao da convocatoria.

2. Os/as fillos/as daquelas que residan nalgún dos países América arriba indicados sempre que teñan a nacionalidade española e estean vinculados/as con calquera concello galego no Padrón de españois residentes no exterior (PERE) desde, polo menos, 3 meses antes da data de presentación da solicitude.

3. Para o suposto de situacións de emerxencia que incidan nas condicións de saúde, provocando gastos extraordinarios de carácter sanitario ou asistenciais ao solicitante, poderán ser perceptores tamén os descendentes de emigrantes galegos ata o segundo grao por consanguinidade que cumpran as mesmas condicións do número anterior.

1. Para acceder a estas axudas as persoas solicitantes deben reunir os seguintes requisitos:

a) A condición de persoas beneficiarias, de acordo co disposto no artigo 3.

b) Carecer de rendas e ingresos suficientes.

Os recursos de que por calquera concepto dispoña a persoa solicitante e, de ser o caso, a súa unidade familiar, teñen que ser insuficientes para facer fronte aos gastos derivados da situación de emerxencia que motive a solicitude, e non poden superar, en cómputo anual, os seguintes límites:

– No caso das persoas residentes en países cos cales o Estado español asinase convenios bilaterais en materia de seguridade social, o importe equivalente a 1,8 veces a base de cálculo da prestación económica por razón de necesidade establecida polo Estado español para o país de residencia, nas contías que se determinen para 2026.

– No caso das persoas que residan nun país co cal o Estado español non asinase convenios bilaterais en materia de seguridade social, o importe equivalente ao 30 % da cantidade resultante de multiplicar por 1,8 a base de cálculo da prestación económica por razón de necesidade establecida polo Estado español para ese país, nas contías que se determinen para 2026.

Se a persoa solicitante convive con outra ou outras persoas nunha mesma unidade económica familiar, a cantidade de ingresos por encima da cal se consideran suficientes estará determinada pola suma do límite máximo de ingresos persoais máis o resultado de multiplicar o 70 % da devandita cifra polo número das persoas que convivan menos unha.

Para os efectos desta convocatoria, entenderase como unidade económica familiar a integrada pola persoa solicitante e, de ser o caso, polo seu cónxuxe, parella de feito ou con relación análoga de afectividade, así como polos/as fillos/as e parentes por consanguinidade, afinidade ou adopción ata o terceiro grao, sempre que convivan con ela.

c) Carecer de patrimonio inmoble suficiente.

Considérase que existe patrimonio inmobiliario insuficiente cando o valor patrimonial ou equivalente dos inmobles na unidade económica familiar, excepto a vivenda habitual, sexa inferior ou igual a 2,5 veces as contías previstas no punto anterior.

d) Acreditar documentalmente a situación de emerxencia social que xustifique a solicitude.

A persoa solicitante deberá xustificar mediante medios válidos en dereito o estado de necesidade actual, que afecte calquera dos tres ámbitos detallados no artigo primeiro desta resolución, e as circunstancias sobrevidas de que a devandita situación deriva.

e) Carecer de impedimentos para a percepción desta axuda segundo a lexislación de subvencións aplicable en Galicia.

2. O requisito da percepción de ingresos inferiores ás contías determinadas no artigo 4.1.b) poderá ser obxecto de exención por razóns humanitarias ou de forza maior debidamente acreditadas, sen prexuízo da obriga de acreditar a carencia de recursos suficientes para facer fronte aos gastos derivados da emerxencia.

Solicitudes

1. As solicitudes presentaranse preferiblemente por vía electrónica a través do formulario normalizado que figura como anexo I desta resolución, dispoñible na sede electrónica da Xunta de Galicia, https://sede.xunta.gal

As persoas solicitantes que non posúan o certificado electrónico e así o desexen poderán dirixirse ás entidades colaboradoras que se indican a seguir:

– No Brasil:

• Peña Galega da Casa de España de Río de Janeiro.

• Sociedade Española de Río de Janeiro.

• Sociedade Hispano-Brasileira de Socorros Mutuos e Instruçao en São Paulo.

• Sociedade de Socorros Mutuos e Beneficencia Rosalía de Castro en Santos.

• Asociación Cultural Hispano-Gallega Caballeros de Santiago en Salvador de Bahía.

– En Cuba:

• Federación de Sociedades Gallegas de Cuba en La Habana.

– En Venezuela:

• Hermandad Gallega de Venezuela en Caracas.

• Hermandad Gallega de Valencia.

• Centro Gallego de Maracaibo.

• Centro Gallego de Puerto la Cruz

• Asociación Fillos de Galicia dos Estados de Aragua e Lara, en Maracay.

A utilización desta vía requirirá que a persoa solicitante autorice a persoa responsable da entidade colaboradora que se detalle no modelo normalizado de solicitude para que remita a súa solicitude a través da sede electrónica da Xunta de Galicia, e non exime as persoas solicitantes da obriga de cubrir e asinar a solicitude segundo o anexo I.

No caso de utilizar esta vía, é recomendable que as solicitudes se presenten cunha antelación suficiente respecto ao remate do prazo de presentación das solicitudes.

2. Opcionalmente, poderanse presentar as solicitudes de xeito presencial en calquera dos lugares e rexistros establecidos na normativa reguladora do procedemento administrativo común.

3. Para a presentación electrónica poderá empregarse calquera dos mecanismos de identificación e sinatura admitidos pola sede electrónica da Xunta de Galicia, incluído o sistema de usuario e clave Chave365 (https://sede.xunta.gal/chave365).

4. No caso de que a persoa solicitante estea incapacitada, a solicitude farase ao seu nome e será asinada polo seu representante legal, que deberá acreditar a representación por calquera medio válido en dereito.

5. No suposto de que a circunstancia que xustifique a solicitude de axuda sexa o motivo de que a persoa solicitante non poida asinar do seu puño e letra, poderá facelo mediante impresión dactilar ou dixital. De resultar imposible, admitirase tamén que a asine, no seu nome, a persoa da súa unidade familiar responsable do seu coidado que o acredite suficientemente.

Documentación complementaria

1. As persoas interesadas deberán achegar coa solicitude, segundo o modelo do anexo I, a seguinte documentación:

1.1. No caso de ser representante, documento acreditativo da representación legal actualizado para o ano da convocatoria.

1.2. A acreditación da condición de persoas solicitantes dos supostos dos artigos 3.1 e 3.2 require a presentación da seguinte documentación:

a) As persoas emigrantes: documento oficial en que conste o lugar de nacemento en Galicia.

b) Os descendentes da persoa emigrante: o/os certificado/s de nacemento do rexistro civil correspondente.

c) En todos os supostos: pasaporte español ou outro documento de identidade en que consten os datos persoais e a nacionalidade española da persoa solicitante e o documento de identidade das persoas que forman parte da súa unidade familiar.

d) Unha certificación recente de inscrición da persoa solicitante no Rexistro de matrícula consular do país de residencia e, para os non nados en Galicia e que se opoñan á consulta pola Administración, unha certificación da inscrición no Padrón de españois residentes no estranxeiro (PERE), onde se acredite a vinculación con calquera concello galego cunha antigüidade mínima dos tres meses anteriores ao día de presentación da solicitude de axuda de emerxencia social.

A vinculación cun concello galego no Padrón de españois residentes no estranxeiro (PERE) non se exixirá no caso de que a persoa solicitante nacese en Galicia ou estea incapacitada legalmente, sempre que esta incapacidade lle impida a inscrición neste censo.

1.3. Documentación acreditativa da situación económica da persoa solicitante da axuda, así como da súa unidade económica familiar.

a) Unha certificación ou xustificante acreditativo dos ingresos, rendas ou pensións de calquera natureza que perciba o solicitante e os membros da súa unidade familiar ou, de non percibirse, declaración responsable da persoa solicitante de que ningún membro da súa unidade económica familiar, incluída ela, percibe ingresos, rendas ou pensións de calquera natureza.

b) Documentación xustificativa oficial en que conste o valor patrimonial dos bens inmobles, excepto a vivenda habitual, da persoa solicitante e a súa unidade familiar ou, de non ser posible obtela, unha declaración responsable asinada por todos os membros capacitados maiores de idade, conforme o anexo II.

c) De ser o caso, documentación que acredite a convivencia dos membros da unidade familiar.

d) No suposto de separación legal ou divorcio, unha copia da correspondente sentenza xudicial firme ou da certificación do rexistro.

1.4. Documentación acreditativa do estado de necesidade que fundamente a solicitude de axuda, as circunstancias extraordinarias que o provocaron e a estimación de gastos para afrontalo.

– Unha memoria explicativa da situación de emerxencia, en que consten as circunstancias extraordinarias que a causaron, asinada pola persoa solicitante.

– Para as situacións que impidan á persoa solicitante ou á súa unidade familiar cubrir as súas necesidades básicas de subsistencia, referidas á alimentación, vestido, hixiene, educación e outras de natureza análoga, un informe social emitido por un profesional colexiado ou organismo de ampla traxectoria no ámbito asistencial que detalle os ingresos percibidos pola unidade familiar, describa a situación de grave necesidade que fundamenta a solicitude e as circunstancias extraordinarias de que deriva e conclúa cunha valoración favorable ou desfavorable á petición de axuda.

– Para as situacións de perda ou inadecuación da vivenda habitual, é necesario complementar o informe social mencionado no punto anterior cun informe, proxecto ou orzamento dun profesional técnico competente que identifique a carencia de condicións de habitabilidade ou equipamento básico do inmoble, así como a súa causa e as actuacións necesarias para remediar esa situación, coa estimación dos custos de cada unha delas.

– Para as situacións de enfermidade grave ou incapacidade de valerse por si mesma, informe social e informe recente dun médico colexiado competente na materia, conforme o modelo do anexo III desta resolución, ou outro de contido equivalente. Se non se detalla aí, complementarase cun orzamento ou estimación de gastos do tratamento indicado polo profesional sanitario.

Valorarase tamén calquera outra documentación complementaria que contribúa a fundamentar a solicitude de axuda, facilitando unha gradación da gravidade e urxencia do estado de necesidade e/ou xustificando as circunstancias sobrevindas de que deriva.

Salvo no caso de solicitudes de axuda para atender de forma temporal a cobertura das necesidades básicas de subsistencia, é obrigatorio presentar un orzamento ou estimación de gastos específicos considerados necesarios para paliar a situación de necesidade.

1.5. Documentación oficial en que se certifique que o solicitante non dispón nin pode acceder a recursos dos sistemas públicos nin axudas de terceiros legalmente obrigados para afrontar os gastos obxecto da solicitude de axuda de emerxencia social, ou ben, se non é posible obtela, unha declaración responsable asinada pola persoa solicitante ou polo seu representante en que faga constar iso mesmo.

2. A documentación complementaria presentarase preferiblemente por vía electrónica. Opcionalmente, as persoas interesadas poderán presentar a documentación complementaria presencialmente en calquera dos lugares e dos rexistros establecidos na normativa reguladora do procedemento administrativo común.

As persoas interesadas responsabilizaranse da veracidade dos documentos que presenten. Excepcionalmente, cando a relevancia do documento no procedemento o exixa ou existan dúbidas derivadas da calidade da copia, a Administración poderá solicitar de maneira motivada o cotexo das copias electrónica achegadas pola persoa interesada, para o que poderá requirir a exhibición do documento ou da información orixinal.

3. Sempre que se realice a presentación de documentos separadamente da solicitude, deberanse indicar o código e o órgano responsable do procedemento, o número de rexistro de entrada da solicitude e o número de expediente, se se dispón del.

4. A falsidade ou ocultación de datos na documentación presentada para a obtención da axuda comportará a exclusión do proceso de valoración e, por tanto, a imposibilidade de ser persoa beneficiaria das axudas establecidas nesta resolución.

Comprobación de datos

1. Para a tramitación deste procedemento consultaranse automaticamente os datos incluídos nos seguintes documentos en poder da Administración actuante ou elaborados polas administracións públicas, agás que a persoa interesada se opoña á súa consulta:

– DNI da persoa solicitante ou representante, se dispón del.

– Certificación de estar rexistrada e vinculada cun concello galego no Padrón de españois residentes no estranxeiro (PERE) no momento de presentación da solicitude.

2. No caso de que as persoas interesadas se opoñan á consulta, deberán indicalo no recadro correspondente habilitada no formulario correspondente e achegar os documentos.

Cando así o exixa a normativa aplicable, solicitarase o consentimento expreso da persoa interesada para realizar a consulta.

3. Excepcionalmente, no caso de que algunha circunstancia imposibilitase a obtención dos citados datos, poderáselles solicitar ás persoas interesadas a presentación dos documentos correspondentes.

Trámites administrativos posteriores 

A sede electrónica da Xunta de Galicia permite ás persoas interesadas realizar trámites electrónicos, con posterioridade ao inicio do expediente, accedendo á Carpeta cidadá da persoa interesada. Opcionalmente, as persoas interesadas tamén poderán realizar os ditos trámites presencialmente en calquera dos lugares e rexistros establecidos na normativa reguladora do procedemento administrativo común.

Prazo de resolución:

Cinco meses

Sentido do silencio:

Negativo