Esta orde ten por obxecto establecer as bases reguladoras para a concesión, en réxime de concorrencia competitiva, das axudas destinadas á seguinte acción:

Liña B: axudas destinadas á creación ou reestruturación de organizacións de produtores pesqueiros e asociacións de organizacións de produtores pesqueiros, recoñecidas no ámbito autonómico galego, segundo establece o artigo 15 do Regulamento (UE) nº 1379/2013 do Parlamento Europeo e do Consello, do 11 de decembro de 2013, e o artigo 68.1.a) do Regulamento (UE) nº 508/2014 do Parlamento Europeo e do Consello, do 15 de maio de 2014, e nos artigos 2.3.i), 3.10, e 5.6 do Real decreto 277/2016, do 24 de xuño.

Poderán ser beneficiarias das subvencións reguladas nesta orde as organizacións de produtores pesqueiros (OPP) e asociacións de organizacións de produtores pesqueiros (AOP) cuxo ámbito de actuación sexa a Comunidade Autónoma de Galicia, inscritas no Rexistro de Organizacións de Produtores Pesqueiros e Asociacións de Organizacións de Produtores Pesqueiros establecido no artigo 8 do Real decreto 277/2016, do 24 de xuño.

Requisitos xerais dos beneficiarios.

Os beneficiarios das axudas reguladas pola presente orde estarán suxeitos aos seguintes requisitos:

a) Non ter pendente de pagamento ningunha obriga por reintegro de subvencións nin sanción firme pendente de pagamento por infracción da normativa marítimo-pesqueira.

b) Non incorrer nalgunha das circunstancias previstas no artigo 10 da Lei 9/2007, do 13 de xuño, de subvencións de Galicia.

c) Non ter cometido infracción grave:

– Da política pesqueira común definida como tal en actos lexislativos do Parlamento Europeo e do Consello;

– Do Regulamento (UE) núm. 1005/2008 do Consello, polo que se establece un sistema contra a pesca ilegal, non declarada e non regulamentada, e do Regulamento (UE) núm. 1224/2009 do Consello, polo que se establece un réxime comunitario de control, durante os 12 meses anteriores á data da presentación de solicitudes, se o operador ten nove puntos de infracción polas infraccións graves segundo o Regulamento (UE) núm. 404/2011. Cada punto de infracción acumulado que se engada aos nove puntos de infracción polas infraccións graves segundo o Regulamento (UE) núm. 404/2011 suporá un mes adicional de inadmisibilidade da axuda por punto acumulado.

d) No marco do FEP ou FEMP, non ter sido declarado culpable de cometer fraude, segundo a definición do artigo 1 do Convenio relativo á protección dos intereses financeiros das comunidades europeas (DOUE serie C 316, do 27.11.1995).

e) Non estar nin ter estado nos últimos 24 meses involucrado na explotación, xestión ou propiedade dos buques incluídos na lista comunitaria dos buques INDNR (pesca ilegal non declarada e non regulamentada) ou de buques que nin estean nin estivesen nos últimos 12 meses enarborando o pavillón de países considerados terceiros países non cooperantes ao abeiro do Regulamento (CE) núm. 1005/2008 do Consello, do 29 de setembro, polo que se establece un sistema comunitario para previr, desalentar e eliminar a pesca ilegal, non declarada e non regulamentada.

f) Non ter cometido ningún dos delitos establecidos nos artigos 3 e 4 da Directiva 2008/99/CE. Con carácter xeral, serán inadmisibles as solicitudes presentadas por un operador que cometese un dos delitos mencionados no artigo 3 durante un período de 12 ou 24 meses en función de se foi cometido por neglixencia grave ou con dolo. No caso de delitos mencionados no artigo 4 da citada directiva, o período de inadmisibilidade será, con carácter xeral, de 24 meses.

g) Manter a condición de beneficiario, cumprindo os requisitos de admisibilidade previstos no artigo 10 do Regulamento FEMP.

h) Cumprir o disposto nos artigos 71 e 140 do Regulamento 1303/2013, do 17 de decembro de 2013 (Regulamento RDC).

i) Levar unha contabilidade separada, ou dispor dun código contable adecuado das transaccións relacionadas coas operacións obxecto de financiamento.

j) Acreditar, con anterioridade a ditarse a proposta de resolución de concesión, que está ao día no cumprimento das súas obrigas tributarias, fronte á Seguridade Social e de non ter pendente de pagamento ningunha outra débeda coa Administración pública da Comunidade Autónoma de Galicia.

k) Someterse a actuacións de control dos distintos órganos competentes.

Requisitos específicos e cálculo para a liña de axudas para a creación e reestruturación de organizacións de produtores pesqueiros e asociacións (liña B).

1. Para optar a esta liña de axudas, as OPP/AOP beneficiarias deberán cumprir os seguintes requisitos:

a) Ter sido recoñecida como unha organización profesional, con resolución ou orde de recoñecemento e inscrición no rexistro correspondente a partir do 29 de decembro de 2013.

b) Ter presentado o PPEC e ter obtido a súa aprobación, segundo o establecido no artigo 14.3 e 14.5 do Real decreto 277/2016, do 24 de xuño.

c) Ter presentado o informe anual do PPEC e ter obtido súa aprobación, segundo o establecido no artigo 15.3 do Real decreto 277/2016, do 24 de xuño.

d) Dispor dunha estrutura organizativa propia dotada do persoal, da infraestrutura e do equipamento necesarios para poder cumprir as obrigacións establecidas na normativa europea e nacional, en particular, o coñecemento da produción dos seus membros e a xestión orzamentaria, de conformidade co artigo 2.7 do Real decreto 277/2016, do 24 de xuño.

As organizacións profesionais deberán manter os requisitos anteriores durante cinco anos despois da data contable do último pagamento da axuda, sen prexuizo do cumprimento do disposto no artigo 10 do Regulamento FEMP.

2. Para os efectos da percepción das axudas previstas no artigo 68.1.a) do Regulamento FEMP, no caso das OPP e AOP, a axuda concederase durante os cinco primeiros anos naturais contados desde o día seguinte ao da recepción da notificación da resolución favorable emitida pola Administración competente.

Estas axudas só se poderán outorgar cando a data de recepción da notificación da resolución favorable pola Administración competente sexa posterior ao 29 de decembro de 2013.

3. Comprobarase o valor da produción, entendida como a suma do valor da produción comercializada por cada un dos membros da OPP, ou a suma do valor da produción de cada un dos membros de cada OPP que compoña unha AOP, e xustificarase por módulos, segundo o disposto no capítulo II do título III do Regulamento de desenvolvemento da Lei 9/2007, do 13 de xuño, sendo o valor do módulo a produción comercializada.

Neste caso, a axuda concedida non poderá superar o 1 % do valor medio anual da produción comercializada pola OPP ou AOP durante os tres anos civís anteriores.

4. A axuda máxima por organización profesional e ano non poderá superar os 100.000 euros.

• Solicitude segundo o Anexo I.B, acompañada da seguinte documentación:

  • Anexo II.B. Declaracións responsables.

• Documentación complementaria.

  • Declaración doutras axudas solicitadas (incluídos préstamos subvencionados), concedidas ou que se pretendan solicitar a calquera outra Administración pública, destinadas a subvencionar total ou parcialmente o proxecto para o cal se solicita a subvención. Esta declaración está incluída neste anexo na sección "a persoa representante declara". Deberá achegarse a resolución da axuda no caso de axudas doutras administracións distintas da Xunta de Galicia, de ser o caso.

  • Poder suficiente da persoa representante no caso de que tal poder non figure nos estatutos.

  • Copia da escritura de constitución e estatutos da sociedade, así como as modificacións ulteriores debidamente inscritas no rexistro correspondente.

  • Certificado actualizado da declaración censual de alta en obrigas tributarias.

• Comprobación de datos.

Os documentos relacionados serán obxecto de consulta ás administracións públicas.

• NIF da organización profesional solicitante.

• DNI/NIE da persoa representante.

• Resolución da axuda concedida para subvencionar total ou parcialmente o mesmo proxecto solicitado no caso de axudas concedidas pola Xunta de Galicia.

• Informe acreditativo de non ter pendente de pagamento ningunha obriga por reintegro de subvencións emitido pola Axencia Tributaria de Galicia (Atriga).

• Informe acreditativo de non ter sanción firme pendente de pagamento por infracción da normativa marítimo-pesqueira emitido pola unidade de sancións e reclamacións da Xefatura Territorial da Consellería do Mar.

• Informe acreditativo de non estar en concurso de acredores -artigo 10 da Lei 9/2007, do 13 de xuño, de subvencións de Galicia- obtido a través do Rexistro Público Concursal do Ministerio de Xustiza.

• Informe acreditativo de non ter cometido infracción grave da política pesqueira común, do Regulamento (UE) nº 1005/2008 do Consello, polo que se establece un sistema contra a pesca ilegal, non declarada e non regulamentada, e do Regulamento (UE) nº 1224/2009 do Consello, polo que se establece un réxime comunitario de control emitido polo Ministerio de Agricultura e Pesca, Alimentación e Medio Ambiente.

• Informe acreditativo de non ter sido declarada culpable de cometer fraude, no marco do FEP ou FEMP, obtido a través da base de datos do Ministerio de Xustiza e do sistema nacional de publicación de subvencións do Ministerio de Facenda e Administracións Públicas.

• Informe acreditativo de non estar nin ter estado nos últimos 24 meses involucrada na explotación, xestión ou propiedade dos buques incluídos na lista comunitaria dos buques INDNR obtido a través da base de datos do Ministerio de Agricultura e Pesca, Alimentación e Medio Ambiente.

• Os documentos relacionados serán obxecto de consulta ás administracións públicas.

• Informe acreditativo de non ter cometido ningún dos delitos establecidos nos artigos 3 e 4 da Directiva 2008/99/CE, obtido a través da base de datos do Ministerio de Xustiza e do sistema nacional de publicación de subvencións do Ministerio de Facenda e Administracións Públicas.

• Certificación de estar ao día nas obrigas tributarias coa Axencia Estatal de Administración Tributaria (AEAT).

• Certificación de estar ao día no pagamento coa Tesouraría Xeral da Seguridade Social.

• Certificación de estar ao día no pagamento coa Axencia Tributaria de Galicia (Atriga).

• A presentación das solicitudes realizarase por medios electrónicos a través do formulario normalizado (anexos I.B), dispoñible na sede electrónica da Xunta de Galicia (https://sede.xunta.gal).

Se algunha das persoas interesadas presenta a súa solicitude presencialmente, requirirase para que a emende a través da súa presentación electrónica. Para estes efectos, considerarase como data de presentación da solicitude aquela en que fose realizada a emenda.

Para a presentación das solicitudes poderá empregarse calquera dos mecanismos de identificación e sinatura admitidos pola sede electrónica da Xunta de Galicia, incluído o sistema de usuario e clave Chave365 (https://sede.xunta.gal/chave365).

• Todos os trámites administrativos que as persoas interesadas deban realizar durante a tramitación deste procedemento deberán ser realizados electronicamente accedendo á Carpeta do cidadán da persoa interesada, dispoñible na sede electrónica da Xunta de Galicia.

A través da carpeta do cidadán dispoñible na sede electrónica da Xunta de Galicia, os interesados poderán relacionarse electronicamente coa Administración competente e realizar os trámites necesarios para a tramitación do procedemento, consultar o estado de tramitación e coñecer os actos de trámite realizados con indicación do seu contido, así como da data en que foron ditados.

• Os citados documentos deberán demostrar con claridade que os gastos foron destinados á preparación e/ou execución das medidas dos plans de produción e comercialización, segundo o disposto no anexo Determinación de gastos subvencionables nas axudas aos PPEC.

• A documentación complementaria deberá presentarse electronicamente. As persoas interesadas responsabilizaranse da veracidade dos documentos que presenten. Excepcionalmente, a Administración poderá requirir a exhibición do documento orixinal para o cotexo da copia electrónica presentada.

Se algunha das persoas interesadas presenta a documentación complementaria presencialmente, requirirase para que a emende a través da súa presentación electrónica. Para estes efectos, considerarase como data de presentación aquela en que fose realizada a emenda.

• Sempre que se realice a presentación de documentos separadamente da solicitude, deberanse indicar o código e o órgano responsable do procedemento, o número de rexistro de entrada da solicitude e o número de expediente se se dispón del.

• No caso de que algún dos documentos que se vaia presentar de forma electrónica supere os tamaños máximos establecidos ou teña un formato non admitido pola sede electrónica da Xunta de Galicia, permitirase a súa representación de forma presencial dentro dos prazos previstos. Para iso, e xunto co documento que se presenta, a persoa interesada deberá mencionar o código e o órgano responsable do procedemento, o número de expediente e o número ou código único de rexistro. Na sede electrónica da Xunta de Galicia publicarase a relación de formatos, protocolos e tamaño máximo admitido da documentación complementaria para cada procedemento.

Prazo de resolución: Tres meses

Sentido do silencio: Negativo