d) No marco do FEP ou FEMP, non ter sido declarado culpable de cometer fraude, segundo a definición do artigo 1 do Convenio relativo á protección dos intereses financeiros das comunidades europeas (DOUE serie C 316, do 27.11.1995).

e) Non estar nin ter estado nos últimos 24 meses involucrado na explotación, xestión ou propiedade dos buques incluídos na lista comunitaria dos buques INDNR (pesca ilegal non declarada e non regulamentada) ou de buques que nin estean nin estivesen nos últimos 12 meses enarborando o pavillón de países considerados terceiros países non cooperantes ao abeiro do Regulamento (CE) núm. 1005/2008 do Consello, do 29 de setembro, polo que se establece un sistema comunitario para previr, desalentar e eliminar a pesca ilegal, non declarada e non regulamentada.

f) Non ter cometido ningún dos delitos establecidos nos artigos 3 e 4 da Directiva 2008/99/CE. Con carácter xeral, serán inadmisibles as solicitudes presentadas por un operador que cometese un dos delitos mencionados no artigo 3 durante un período de 12 ou 24 meses en función de se foi cometido por neglixencia grave ou con dolo. No caso de delitos mencionados no artigo 4 da citada directiva, o período de inadmisibilidade será, con carácter xeral, de 24 meses.

g) Manter a condición de beneficiario, cumprindo os requisitos de admisibilidade previstos no artigo 10 do Regulamento FEMP.

h) Cumprir o disposto nos artigos 71 e 140 do Regulamento 1303/2013, do 17 de decembro de 2013 (Regulamento RDC).

i) Levar unha contabilidade separada, ou dispor dun código contable adecuado das transaccións relacionadas coas operacións obxecto de financiamento.

j) Acreditar, con anterioridade a ditarse a proposta de resolución de concesión, que está ao día no cumprimento das súas obrigas tributarias, fronte á Seguridade Social e de non ter pendente de pagamento ningunha outra débeda coa Administración pública da Comunidade Autónoma de Galicia.

k) Someterse a actuacións de control dos distintos órganos competentes.

Requisitos específicos e cálculo para a liña de axudas aos plans de produción e comercialización (liña A).

1. Para os efectos da percepción das axudas previstas no artigo 66 do FEMP, consideraranse elixibles os importes das medidas previamente aprobadas no plan de produción e comercialización (PPEC), efectivamente executadas nos informes anuais regulados no artigo 15 do Real decreto 277/2016, do 24 de xuño.

2. A axuda concedida non poderá superar o 3 % do valor medio anual da produción comercializada pola organización de produtores pesqueiros (OPP) ou asociación de produtores pesqueiros (AOP) durante os tres anos civís anteriores.

3. Para o cálculo da produción indicado no número anterior, entenderase a suma do valor da produción comercializada por cada un os membros no caso de OPP, ou a suma do valor da produción de cada un dos membros de cada OPP que compoñan unha AOP.

4. No caso da preparación do plan de produción e comercialización e, se for o caso, de cada informe anual, os gastos subvencionables por estes dous conceptos non poderán ser superiores a 4.000 euros por cada un destes documentos.

5. No caso da aplicación dos PPEC, cando as medidas teñan carácter económico, serán subvencionables en cada medida tanto as actividades do titular do proxecto como as actividades de xestión do proxecto indicadas no anexo Determinación de gastos subvencionables nas axudas aos PPEC, se así se reflectiu na resolución de aprobación do PPEC e do informe anual.

6. As medidas aprobadas no PPEC e posteriormente executadas e xustificadas no informe anual deberán contar coa calidade técnica necesaria. Potestativamente, o órgano instrutor poderá solicitar un informe a outros organismos públicos para que avalíen se os traballos se axustan ao tempo e orzamento presentados no informe anual.

7. No caso de se detectaren traballos plaxiados, a xuízo da comisión de valoración, ou de calidade insuficiente segundo o disposto no número anterior, a comisión de valoración informará de que esa medida non é elixible, sen prexuízo da aplicación da normativa antifraude que corresponda.

Normas en materia de subcontratación no ámbito dos plans de produción e comercialización (liña A)

1. Poderán ser obxecto de subcontratación aquelas actividades dos plans de produción e comercialización (PPEC) que formen parte da actuación subvencionada pero que non poidan ser realizadas pola organización de produtores pesqueiros (OPP) ou AOP correspondente de modo directo.

2. O orzamento global da actividade subcontratada poderá alcanzar o 100 % do orzamento. A subcontratación estará condicionada, nos supostos previstos no artigo 27.3 da Lei 9/2007, do 13 de xuño, a que o contrato se celebre por escrito e estea previamente autorizado polo órgano de concesión.

De ser o caso, deberase de cumprir o previsto no artigo 29.3 da Lei 9/2007, do 13 de xuño, de subvencións de Galicia.

3. Sen prexuízo do establecido no número anterior, permítese expresamente que a resolución de aprobación do plan de produción e comercialización do ano 2017 constitúa a autorización previa da Administración competente para a subcontratación nos supostos indicados no artigo 27.3 da Lei 9/2007, sen prexuízo do cumprimento do establecido no artigo 27.7 da citada lei e no artigo 43 do Regulamento da Lei 9/2007, do 13 de xuño, de subvencións de Galicia, aprobado polo Decreto 11/2009, do 8 de xaneiro.

Ademais, autorízase a que a subcontratación acade o 100 % do importe desa actividade para o ano citado no parágrafo anterior.

4. Non se poderá subcontratar coas mesmas entidades beneficiarias que forman parte da organización ou estean vinculadas a ela, nin en ningún dos casos especificados no artigo 27.7 da Lei 9/2007, do 13 de xuño.

5. Cada un dos beneficiarios é responsable de asegurar o cumprimento das normas de contratación pública que sexan de aplicación. En todos os casos, débense cumprir os principios básicos de transparencia, non discriminación e igualdade, de acordo co artigo 27 da Lei 9/2007, do 13 de xuño.

Non se permite a contratación entre os beneficiarios para a realización dunha medida recollida no PPEC, nin tampouco a contratación de traballadores dalgunha das entidades beneficiarias do proxecto como prestadores de servizos de profesionais externos e de asesoramento. Cando para a execución dunha medida do PPEC interveñan empresas vinculadas, estas non poderán participar como provedores ou prestadores de servizos, ou a súa actividade non será subvencionable.

Terán a consideración de empresas vinculadas aquelas entre as cales exista algunha das relacións definidas no artigo 3.3 do anexo I do Regulamento (UE) núm. 651/2014 da Comisión, do 17 de xuño, polo que se declaran determinadas categorías de axudas compatibles co mercado interior en aplicación dos artigos 107 e 108 do Tratado, cando concorra algún dos seguintes supostos:

a) Unha empresa posúe a maioría dos dereitos de voto dos accionistas ou socias da outra empresa.

b) Unha empresa ten dereito a nomear ou revogar a maioría dos membros do órgano de administración, dirección ou control da outra empresa.

c) Unha empresa ten dereito a exercer unha influencia dominante sobre outra, en virtude dun contrato celebrado con ela ou dunha cláusula estatutaria da segunda empresa.

d) Unha empresa, accionista ou asociada a outra, controla soa, en virtude dun acordo celebrado con outros accionistas ou socios da segunda empresa, a maioría dos dereitos de voto dos seus accionistas ou socios.

Presumirase que non existe influencia dominante cando os investidores non teñan implicación directa ou indirecta na xestión da empresa en cuestión, sen prexuízo dos dereitos que lles correspondan na súa calidade de accionistas.

Tamén se considerarán empresas vinculadas as que manteñan algunha desas relacións a través dunha persoa física ou un grupo de persoas físicas que actúen de común acordo, se estas empresas exercen a súa actividade ou parte dela no mesmo mercado de referencia ou en mercados contiguos. Considérase mercado contiguo o mercado dun produto ou servizo situado nunha posición inmediatamente anterior ou posterior á do mercado en cuestión.

Certificación de non inicio e fin de obra (liña A)

No caso de obras ou adquisición de equipamentos e subministracións que impliquen unha obra, un funcionario designado pola Consellería do Mar deberá levantar acta de non inicio, sempre por petición da OPP/AOP correspondente, antes de comezala.

A solicitude de certificación de non inicio deberá dirixirse ao Servizo de Mercados da Dirección Xeral de Pesca, Acuicultura e Innovación Tecnolóxica, que determinará a pertinencia da petición, levantando a citada acta de non inicio ou comunicando por escrito á organización profesional que non é necesario, segundo proceda. No caso de non solicitar a dita acta, a medida non será subvencionable.

A realización da certificación de non inicio en ningún caso implica dereito nin mérito para a concesión da axuda.

As OPP/AOP deberán solicitar a acta de fin de obra antes da finalización do ano en que se executa o plan.

A realización do investimento xustificarase mediante a oportuna acta de fin de obra mediante certificación dos servizos da Consellería do Mar antes da presentación do informe anual. A consellería poderá, en calquera momento, realizar as comprobacións que considere oportunas para verificar a efectiva e correcta realización dos investimentos.