As instrucións previas consisten nun documento, mediante o cal, unha persoa maior de idade, capaz e libre, manifesta anticipadamente a súa vontade, co fin de que esta sexa cumprida no momento en que chegue a situacións nas cales non sexa quen de expresala persoalmente, sobre os coidados e o tratamento da súa saúde ou, unha vez chegado o falecemento, sobre o destino do seu corpo e dos seus órganos.

Poderase inscribir no Rexistro galego de instrucións previas o documento que conteña polo menos unha das seguintes, alíneas:

a) Instrucións e opcións acerca dos coidados e o tratamento da saúde da persoa outorgante.

b) Instrucións sobre o destino do corpo, unha vez chegado o falecemento, en relación coa doazón de órganos e tecidos para transplante ou coa doazón para docencia e investigación científica.

A persoa outorgante pode designar unha persoa representante, para que, chegado o caso, sirva como interlocutor co/a médico/a para procurar o cumprimento das instrucións previas que figuran no documento.

O documento que conteña só a designación dunha persoa representante, se non vai acompañada de instrucións previas, non será obxecto de inscrición.

Non cabe efectuar designacións xenéricas de persoas en virtude do seu cargo ou do desenvolvemento de funcións asistenciais no ámbito sanitario.

No caso de que a persoa designada como representante sexa menor de idade, a súa eficacia queda condicionada a que, unha vez chegada a situación na cal deban ser aplicadas as instrucións previas, o dito representante sexa maior de idade e posúa plena capacidade de obrar.

A persoa outorgante pode tamén designar un substituto do representante que exercerá as súas funcións no caso de falecemento, incapacidade ou imposibilidade de consulta co representante.