INFORMACIÓN ADICIONAL SOBRE A DOCUMENTACIÓN A PRESENTAR COA SOLICITUDE

A persoa organizadora do espectáculo público ou da actividade recreativa deberá solicitar a autorización do órgano competente, cunha antelación mínima de 30 días (hábiles) da data prevista para a súa celebración.

As persoas organizadoras deberán achegar coa solicitude, anexo I, a seguinte documentación, de conformidade co disposto no artigo 8.1 do Decreto 98/2020, do 2 de xullo, polo que se regula o procedemento de autorización da celebración de espectáculos públicos e actividades recreativas que se desenvolvan en máis dun termo municipal da Comunidade Autónoma de Galicia (DOG nº 139 do 14 de xullo de 2020):

1. Aplicable á tramitación de autorizacións de todo tipo de espectáculos públicos e actividades recreativas, é dicir, tanto para as de carácter non competitivo como as de carácter competitivo, incluídas as marchas ciclistas organizadas:

a) A memoria co seguinte contido mínimo especificado no artigo 8.1.a) do citado Decreto 98/2020, do 2 de xullo:

– Os planos do percorrido en formato pdf

- A relación detallada de todos os municipios polos que discorre o evento.

- Unha relación detallada de todas as vías polas que percorre o evento na que apareza identificado o nome da vía e os titulares de cada unha delas. Neste contexto, por vía enténdese todo espazo aberto ao público polo que discorre o evento tales, como terreos, camiños, sendas, estradas, prazas, etc

– A descrición do evento que se vai celebrar.

– O horario de inicio e finalización do evento.

– A indicación de que non existen instalacións portátiles ou desmontables, de ser o caso.

Ademais, é necesario que conste na memoria a indicación do número total de asistentes ao evento, incluídos participantes, organización, persoas voluntarias, efectivos de Protección Civil, Forzas e Corpos de Seguridade e público.

b) O cartel ou programa co cumprimento dos requisitos do artigo 20 da Lei 10/2017, do 27 de decembro, de espectáculos públicos e actividades recreativas de Galicia.

O cartel ou programa deberá incluír a clase de espectáculo público ou actividade recreativa, a data, horario e lugar das actuacións, os prezos das entradas ou cotas de inscrición e os lugares de venda, así como de ser o caso, as condicións de admisión, as normas particulares ou as instrucións para o normal desenvolvemento do espectáculo ou actividade, a denominación, o domicilio, o teléfono e o correo electrónico da persoa organizadora.

c) No suposto de existir instalacións portátiles ou desmontables deberá presentar o título habilitante necesario segundo a normativa de aplicación. Neste senso, é válido o xustificante que acredite a presentación da correspondente declaración responsable ante o concello correspondente.

d) A acreditación de ter subscrita e en vigor unha póliza de seguro de responsabilidade civil (RC), nos termos establecidos no artigo 8 da Lei 10/2017, do 27 de decembro, e nos artigos 8, 9 e 10 do Decreto 226/2022, do 22 de decembro, polo que se regulan determinados aspectos da organización e desenvolvemento dos espectáculos públicos e actividades recreativas e se constitúe o Rexistro de Empresas e Establecementos.

O artigo 10 do dito Decreto 226/2022, do 22 de decembro, regula a acreditación do seguro de responsabilidade civil. Conforme este artigo, os documentos válidos para acreditar o seguro de RC son (pódese optar por calquera deles):

- A copia da póliza xunto co recibo de pagamento.

- A certificación da compañía aseguradora ou do axente de seguros co contido mínimo do artigo 10 do Decreto 226/2022, do 22 de decembro.

e) O xustificante do pagamento da taxa administrativa (código 30.40.01).

f) A relación do persoal encargado da vixilancia cando se prevexan concentracións superiores a 100 persoas.

Non será necesario presentar esta relación no caso de que os concellos polos que discorre o evento acrediten a disposición dos efectivos de Protección civil ou de Policía Local necesarios para tal fin, en cuxo caso deberá indicarse expresamente.

g) A acreditación da dispoñibilidade dos terreos achegando todos os informes precisos emitidos polos distintos organismos ou administracións competentes.

Por terreos enténdese tanto as vías como espazos de titularidade pública dos que son titulares os organismos ou a administración local (concellos), autonómica ou estatal.

Ademais, son necesarias as correspondentes autorizacións dos propietarios de terreos privados, así como das Comunidades de Montes Veciñais en Man Común (MVMC), de ser o caso.

h) A declaración responsable da acreditación do cumprimento das medidas en materia de seguridade, especificando as medidas de sinalización do espectáculo público ou da actividade recreativa e os dispositivos de seguridade cos que conta nos posibles lugares perigosos.

i) O plan de autoprotección nos casos en que sexa necesario, de conformidade co disposto no Decreto 172/2022, do 6 de outubro, polo que se aproba o Catálogo de actividades que deben adoptar medidas de autoprotección e polo que se fixa o contido desas medidas.

Para saber se é necesario ou non plan de autoprotección é imprescindible coñecer o número total de asistentes ao evento, incluídos participantes, organización, persoas voluntarias, efectivos de Protección Civil, Forzas e Corpos de Seguridade e público.

j) A acreditación do cumprimento do disposto na Instrución 2/2018, do 26 de marzo, da Dirección Xeral de Enerxía e Minas, sobre instalacións eléctricas temporais de feiras e casetas de baixa tensión, nos casos en que sexa procedente.

k) O informe dos concellos en que se desenvolva o espectáculo público ou a actividade recreativa, sobre a súa viabilidade.

l) O informe da xefatura provincial de tráfico correspondente nos supostos en que afecte á seguridade viaria ou teña lugar o peche total ou parcial dalgunha vía obxecto da lexislación sobre tráfico, circulación de vehículos de motor e seguridade viaria.

So no suposto da tramitación das autorizacións de espectáculos públicos ou actividades recreativas de carácter competitivo, incluídas as marchas ciclistas organizadas, a organizadora deberá presentar, ademais da descrita no apartado anterior, a seguinte documentación:

m) A póliza do seguro de accidentes que teña como mínimo as coberturas do seguro obrigatorio deportivo.

Os documentos válidos para acreditar o seguro de accidentes son (pódese optar por calquera deles):

• A póliza do seguro de accidentes en vigor que teña como mínimo as coberturas do seguro obrigatorio deportivo regulado no Real decreto 849/1993, do 4 de xuño.
• O certificado de ter subscrita unha póliza de seguro de accidentes no que conste expresamente que a póliza contén as coberturas do seguro obrigatorio deportivo do Real decreto 849/1993, do 4 de xuño, polo que se determinan as prestacións mínimas do seguro obrigatorio deportivo.

n) Declaración responsable de acreditación dos servizos sanitarios dispoñibles, de conformidade co artigo 12 do Decreto 98/2020, do 2 de xullo.

1. A organización disporá a existencia, durante a celebración do espectáculo público ou da actividade recreativa, da presenza obrigatoria, como mínimo, dunha ambulancia e dun médico para a asistencia de todas as persoas participantes, sen prexuízo da súa ampliación con máis persoal sanitario, na medida en que se considere necesario.
2. Nos espectáculos públicos ou nas actividades recreativas cuxa participación supere as 750 persoas, contarase cun mínimo de 2 médicos e 2 ambulancias, e deberá engadirse, como mínimo, unha ambulancia e un médico por cada fracción suplementaria de 1.000participantes.

Respecto aos informes que deben constar no expediente cómpre ter en conta o Decreto 98/2020, do 2 de xullo, que exixe expresamente dous tipos de informes distintos:

1. O informe favorable de dispoñibilidade dos terreos, é dicir, das vías e espazos de titularidade pública emitido, de ser o caso, tanto pola Administración local (concellos), autonómica (Xunta de Galicia ou Deputacións Provinciais) ou estatal.
2. Distinto do informe de dispoñibilidade dos terreos é o informe de viabilidade que debe emitir o concello sempre que o espectáculo público ou a actividade recreativa discorra polo seu termo municipal, e iso independentemente de que o dito concello sexa ou non titular das vías ou espazos comprendidos dentro do seu termo municipal.

Respecto aos servicios sanitarios dispoñibles, aplicables á tramitación das autorizacións de espectáculos públicos e actividades recreativas de carácter non competitivo, cómpre ter en conta o disposto no artigo 12 do Decreto 226/2022, do 22 de decembro:

• Os espazos abertos ao público cunha capacidade inferior a 1.000 persoas, en que se celebren espectáculos públicos e actividades recreativas incluídos no ámbito de aplicación deste decreto, deberán dispoñer dunha caixa de primeiros auxilios, debidamente sinalizada e coa dotación axeitada para atender os sinistros que poidan producirse.

A caixa de primeiros auxilios estará dotada, como mínimo, do material seguinte: desinfectantes e antisépticos autorizados, gasas estériles, algodón hidrófilo, vendas, esparadrapo, apósitos adhesivos, tesoiras, pinzas e luva dun só uso. Este material revisarase periodicamente e, en todo caso, antes do comezo de cada espectáculo público, e repoñerase o material que falte ou estea caducado.

• Os espazos abertos ao público cunha capacidade entre 1.000 e 5.000 persoas en que se celebren espectáculos públicos e actividades recreativas incluídos no ámbito de aplicación deste decreto, deberán cumprir os requisitos establecidos no parágrafo anterior e, ademais, disporán dun lugar debidamente sinalizado para prestar os primeiros auxilios e calquera outra posible atención sanitaria. Así mesmo, deberán contar cunha persoa con coñecementos acreditados en asistencia sanitaria inmediata, que deberá estar preparada para a súa intervención durante a duración da totalidade do espectáculo público ou a actividade recreativa.
• O disposto nos dous parágrafos anteriores entenderase sen prexuízo do establecido na normativa vixente en materia de autoprotección.