A corrección de impactos paisaxísticos, todo isto en congruencia cos valores paisaxísticos recollidos no Catálogo das paisaxes de Galicia e os obxectivos e criterios que expresan as Directrices de paisaxe de Galicia.

1. Poderán ser beneficiarias desta subvención as persoas físicas propietarias ou usufrutuarias dun inmoble ou ben sobre o cal pretenda/n realizar algunha/s das actuacións establecidas no ordinal segundo desta resolución.

2. Só caberá presentar unha solicitude por persoa e ben. Cada solicitude poderá conter varias actuacións.

3. A persoa solicitante deberá ser propietaria ou usufrutuaria do terreo, inmoble ou ben en que se pretenden realizar as actuacións e deberá acreditar a súa dispoñibilidade, como mínimo durante o período en que se manteñen as obrigas que asume a persoa beneficiaria da axuda previstas no ordinal décimo noveno.

Este requisito deberá estar cumprido antes do remate do prazo de presentación de solicitudes e acreditarase, na fase de solicitude, mediante a sinatura da correspondente declaración responsable de propiedade ou usufruto e da súa dispoñibilidade incluída no anexo I.

Na fase de xustificación, no caso de tratarse de usufruto, debe achegarse a autorización do titular ou titulares da propiedade, relativa á realización da actuación para a cal se solicita a axuda, e, no caso de copropiedades, autorización dos demais copropietarios. Todo isto sen prexuízo das comprobacións que poida realizar para tal efecto o Instituto de Estudos do Territorio.

4. Todas as actuacións deberán contar, sempre e en todo caso, coa comunicación previa ou, de ser necesaria, a correspondente licenza municipal. Todo isto sen prexuízo dos restantes informes ou autorizacións, municipais ou sectoriais, que sexan precisos.

Para estes efectos, o cumprimento do dito requisito acreditarase na fase de xustificación, sen prexuízo da declaración responsable na fase de solicitude.

5. Non poderán obter a condición de persoa beneficiaria aquelas en que concorra algunha das circunstancias previstas no artigo 10 da Lei 9/2007, do 13 de xuño, de subvencións de Galicia. A acreditación de non estar incursas nas ditas prohibicións realizarase mediante declaración responsable da persoa solicitante, incluída no anexo I desta resolución.

6. Tampouco poderán obter a condición de persoa beneficiaria aquelas que, despois de resultar beneficiarias destas axudas na convocatoria anterior, presentasen unha renuncia con posterioridade aos dez (10) días hábiles previstos para a aceptación ou fosen destinatarios dunha resolución de denegación total da axuda concedida por non xustificar axeitadamente a execución da actuación subvencionada.

7. O incumprimento de calquera das condicións ou requisitos establecidos neste punto constituirá causa de inadmisión da solicitude ou de perda do dereito ao cobramento da axuda, sen prexuízo de calquera outra que derive da normativa aplicable.

Forma de presentación das solicitudes.

1. As solicitudes presentaranse obrigatoriamente por vía electrónica a través do formulario normalizado dispoñible na sede electrónica da Xunta de Galicia, https://sede.xunta.gal

De conformidade co artigo 68.4 da Lei 39/2015, do 1 de outubro, do procedemento administrativo común das administracións públicas, se algunha das persoas interesadas presenta a súa solicitude presencialmente, será requirida para que a emende a través da súa presentación electrónica. Para estes efectos, considerarase como data de presentación da solicitude aquela en que sexa realizada a emenda.

2. Para a presentación electrónica poderá empregarse calquera dos mecanismos de identificación e sinatura admitidos pola sede electrónica da Xunta de Galicia, incluído o sistema de usuario e clave Chave365 (https://sede.xunta.gal/chave365).

3. Para os efectos da concesión das axudas, terase en conta a orde cronolóxica de entrada das solicitudes, validamente presentadas, na sede electrónica da Xunta de Galicia ata que se esgote o orzamento da convocatoria. Considérase data de presentación válida aquela en que o expediente sexa presentado completo e conste neste a solicitude, correctamente cuberta, e toda a documentación complementaria exixida nesta resolución. Así mesmo, considerarase esgotado o orzamento cando se efectúe o rexistro da última solicitude de axuda que totalice o importe total do crédito desta convocatoria. Nese caso, e sempre antes da data máxima sinalada neste punto, poderán seguirse rexistrando solicitudes en lista de reserva provisional, as cales serán atendidas por rigorosa orde de entrada, supeditadas a que se produzan desestimacións ou revogacións das solicitudes de axuda previas. O esgotamento do crédito comportará a inadmisión de todas aquelas solicitudes que se instrúan con posterioridade, do mesmo xeito que se inadmitirán todos aqueles expedientes que non teñan entrada na sede electrónica da Xunta de Galicia a través do procedemento MT402A.

Non serán admitidas a trámite, en ningún caso, as solicitudes presentadas fóra do prazo e de forma distinta da que se establece nesta resolución.

4. A presentación da solicitude leva consigo a aceptación, por parte de quen a formule, dos termos desta convocatoria.

5.Do mesmo xeito, a presentación da solicitude debe acompañarse da declaración responsable asinada pola persoa solicitante ou polo seu representante, incluída no anexo I desta resolución, na cal se fará constar:

a) O conxunto de todas as axudas solicitadas ou recibidas, para as mesmas actuacións solicitadas ao abeiro desta resolución, das distintas administracións públicas competentes ou doutros entes públicos, e o compromiso de comunicar de contado cantas axudas solicite e/ou obteña doutras administracións públicas ou doutros entes públicos ou privados, nacionais ou internacionais, a partir da data desta declaración ou, na súa falta, declaración de non ter presentado ningunha outra solicitude de axuda para as mesmas actuacións.

b) Que a persoa beneficiaria se encontra ao día nas súas obrigas tributarias e fronte á Seguridade Social, e que non ten pendente de pagamento débedas coa Comunidade Autónoma nin é debedora por resolución de procedencia de reintegro, de conformidade co previsto no artigo 20.4 da Lei 9/2007, do 13 de xuño, de subvencións de Galicia, e no artigo 11.i) do Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia, ao tratarse de subvencións que non superan os 3.000,00 euros individualmente e se conceden con cargo aos créditos orzamentarios do capítulo VII, Transferencias de capital destinadas a familias e institucións sen fins de lucro.

c) Que todos os datos contidos na solicitude e nos documentos que se achegan son certos.

d) Que non está incursa en ningunha das circunstancias previstas no artigo 13 da Lei 38/2003, do 17 de novembro, xeral de subvencións.

e) Que non está incursa en ningunha das prohibicións establecidas no artigo 10, números 2 e 3, da Lei 9/2007, do 13 de xuño, de subvencións de Galicia, para obter a condición de persoa beneficiaria dunha subvención, particularmente as referidas a estar ao día nas obrigas tributarias e fronte á Seguridade Social, non ter pendente de pagamento ningunha outra débeda coa Administración pública da Comunidade Autónoma e estar ao día no pagamento de obrigas por reintegro de subvencións.

f) Que cumprirá a normativa estatal e autonómica de aplicación, en particular, a normativa en materia de subvencións, cando proceda.

g) Que se compromete a cumprir as obrigas e os requisitos que se sinalan no ordinal décimo noveno das bases reguladoras.

h) Que as actuacións para as cales se solicita subvención teñen a consideración de gastos subvencionables e non estaban iniciadas con anterioridade á publicación da convocatoria destas axudas.

i) Que vai realizar a comunicación previa ou, de ser necesaria, a solicitude de licenza municipal, así como de todos os informes ou autorizacións, municipais ou sectoriais, que sexan precisos.

j) Que é titular ou usufrutuario e ten a dispoñibilidade sobre os terreos e inmobles en que se van desenvolver as actuacións durante un período que, como mínimo, garanta o cumprimento das obrigas previstas no ordinal décimo noveno e, para o caso de que sexa usufrutuario ou copropietario, o compromiso de solicitar a autorización, respectivamente, do titular ou titulares ou dos demais propietarios, para o desenvolvemento da actuación obxecto da axuda.

k) Que os materiais e acabados propostos son conformes coas indicacións que se recollen nas guías a que se fai referencia no ordinal segundo.

l) Que na convocatoria anterior destas axudas non presentou unha renuncia con posterioridade aos dez (10) días hábiles previstos para a aceptación da axuda, nin foi destinatario dunha resolución de denegación total por non xustificar axeitadamente a execución da actuación subvencionada.

Documentación complementaria.

1. As persoas interesadas deberán achegar co anexo I de solicitude, debidamente cuberto, a seguinte documentación:

a) Acreditación da representatividade suficiente para actuar en nome da persoa solicitante, por calquera dos medios establecidos no artigo 32 do Real decreto 203/2021, do 30 de marzo, polo que se aproba o Regulamento de actuación e funcionamento do sector público por medios electrónicos.

b) Memoria descritiva das actuacións propostas, que deberá ter o detalle suficiente para describir adecuadamente as súas características, a súa medición e o seu orzamento, que deberá coincidir co reflectido no anexo I. No caso de que ambas as cantidades non coincidan, prevalecerá a de menor importe.

No caso de actuacións comprendidas en intervencións de rehabilitación integral ou outras de carácter e ámbito máis amplo, a correspondencia deberá darse entre o consignado no anexo I e a suma dos importes que se identifiquen claramente na memoria como obxecto de solicitude de subvención, segundo o disposto no ordinal segundo, punto 4.

Naqueles casos en que sexa preciso requirir a persoa solicitante para que presente as aclaracións que sexan pertinentes, a data válida de presentación, para os efectos do disposto no punto 4 do ordinal sétimo, será aquela en que se dea resposta ao requirimento.

c) Reportaxe fotográfica do ben sobre o cal se vai actuar en que se aprecie o elemento ou elementos obxecto da actuación. Esta reportaxe, en que todas as fotografías deberán estar claramente identificadas, incluirá como mínimo unha de conxunto de cada unha das fachadas e/ou cubertas do inmoble, así como de todos os tramos dos muros de peche (segundo o tipo de actuación para a cal se solicita a subvención), sexan ou non obxecto de intervención. Ademais incluirá aquelas fotografías de detalle necesarias para avaliar o estado actual do ben sobre o cal se pretende actuar.

O conxunto destas imaxes debe achegar a información mínima e necesaria, que permita acreditar a existencia do impacto paisaxístico e xustificar que as actuacións propostas resultan axeitadas e suficientes para a súa corrección.

No caso de actuacións en que non sexa preciso intervir sobre todo o ben para a corrección integral do impacto identificarase inequivocamente o ámbito sobre o cal se actúa.

d) De conformidade co previsto no artigo 29.3 da Lei 9/2007, do 13 de xuño, de subvencións de Galicia, cando o importe do gasto subvencionable sexa igual ou superior á contía de 40.000,00 euros, cantidade límite prevista para o contrato menor, a persoa beneficiaria deberá presentar como mínimo tres ofertas de diferentes provedores, con carácter previo á contratación do compromiso para a obra, salvo que polas súas especiais características non exista no mercado suficiente número de entidades que as realicen, presten ou subministren.

De conformidade co artigo 28.3 da Lei 39/2015, do 1 de outubro, do procedemento administrativo común das administracións públicas, non será necesario achegar os documentos que xa foron presentados anteriormente pola persoa interesada ante calquera Administración. Neste caso, a persoa interesada deberá indicar en que momento e ante que órgano administrativo presentou os ditos documentos, que serán recadados electronicamente a través das redes corporativas ou mediante consulta ás plataformas de intermediación de datos ou outros sistemas electrónicos habilitados para o efecto, agás que conste no procedemento a oposición expresa da persoa interesada.

De forma excepcional, se non se poden obter os citados documentos, poderá solicitarse novamente á persoa interesada a súa achega.

2. A documentación complementaria deberá presentarase electronicamente.

Se algunha das persoas interesadas presenta a documentación complementaria presencialmente, será requirida para que a emende a través da súa presentación electrónica. Para estes efectos, considerarase como data de presentación aquela en que sexa realizada a emenda.

As persoas interesadas responsabilizaranse da veracidade dos documentos que presenten. Excepcionalmente, cando a relevancia do documento no procedemento o exixa ou existan dúbidas derivadas da calidade da copia, a Administración poderá solicitar de maneira motivada o cotexo das copias achegadas pola persoa interesada, para o que poderá requirir a exhibición do documento ou da información orixinal.

3. Sempre que se realice a presentación de documentos separadamente da solicitude, deberanse indicar o código e o órgano responsable do procedemento, o número de rexistro de entrada da solicitude e o número de expediente, se se dispón del.

4. No caso de que algún dos documentos que presente de forma electrónica a persoa solicitante ou representante supere os tamaños límite establecidos ou teña un formato non admitido pola sede electrónica, permitirase a súa presentación de forma presencial (gravado nun soporte físico tipo CD, DVD ou dispositivo extraíble) dentro dos prazos previstos e na forma indicada no número anterior. A información actualizada sobre o tamaño máximo e os formatos admitidos pode consultarse na sede electrónica da Xunta de Galicia.

Comprobación de datos.

Para a tramitación deste procedemento consultaranse automaticamente os datos incluídos nos seguintes documentos en poder da Administración actuante ou elaborados polas administracións públicas, agás que a persoa interesada se opoña á súa consulta:

1. DNI/NIE da persoa solicitante.

2. DNI/NIE persoa representante.

3. NIF da entidade representante.

4. Consulta de inhabilitacións para obter subvencións e axudas.

5. Consulta de concesións de subvencións e axudas.

6. Consulta da titularidade catastral.

No caso de que as persoas interesadas se opoñan a esta consulta, deberán indicalo no recadro que proceda habilitado no formulario correspondente e achegar os documentos.

Cando así o exixa a normativa aplicable solicitarase o consentimento expreso da persoa interesada para realizar a consulta.

Excepcionalmente, no caso de que algunha circunstancia imposibilite a obtención dos citados datos, poderáselles solicitar ás persoas interesadas a presentación dos documentos correspondentes.

Trámites administrativos posteriores á presentación de solicitudes.

Todos os trámites administrativos que as persoas interesadas deban realizar tras a presentación da solicitude deberán ser efectuados electronicamente accedendo á Carpeta cidadá da persoa interesada, dispoñible na sede electrónica da Xunta de Galicia.

Prazo de resolución:

Tres meses

Sentido do silencio:

Negativo