Rexistrar as novas instalacións eléctricas ás que lle sexa de aplicación o Regulamento electrotécnico para baixa tensión antes da súa posta en servizo mediante a presentación, no departamento territorial correspondente, do certificado da instalación eléctrica asinado polo instalador e selado pola empresa instaladora, acompañado da documentación necesaria, e obter o xustificante da súa presentación para constancia do interesado e para a solicitude de subministro de enerxía en cumprimento do disposto no Real Decreto 842/2002, do 2 de agosto, polo que se aproba o regulamento electrotécnico para baixa tensión (BOE nº 224 do 18 de setembro de 2002).

Para mais información e consultas públicas acudir a:

http://oficinavirtualindustria.xunta.es/

Persoas físicas e xurídicas titulares de instalacións eléctricas conectadas a unha fonte de subministro nos límites de baixa tensión.

As instalacións eléctricas de baixa tensión deberán ser realizadas por empresas instaladoras habilitadas de baixa tensión e dispoñer do certificado da instalación, asinado polo instalador e selado pola empresa instaladora ademais da documentación técnica (proxecto ou memoria técnica de deseño), o certificado de dirección de obra, no seu caso, e o certificado de inspección inicial, cando así o determine a correspondente ITC.

• Inscrición en rexistros oficiais. Primeira inscrición. Modificacións da primeira inscrición. ( 30.02.00)
• Inscrición no rexistro de instalacións eléctricas receptoras ( 32.19.04)
• Modificación no rexistro de instalacións eléctricas receptoras ( 32.19.32)

Pode realizar o pago destas taxas na sede electrónica como un dos pasos da tramitación en liña.

Forma e lugar de presentación

O procedemento IN614C realizarase mediante a presentación da solicitude de inscrición, modificación ou baixa. Estas irán dirixidas aos departamentos territoriais, con competencias en materia de industria para o rexistro deste trámite, que correspondan polo ámbito territorial onde se sitúe a instalación eléctrica de baixa tensión.

Presentarase por medios electrónicos a través do formulario normalizado dispoñible na sede electrónica da Xunta de Galicia, https://sede.xunta.gal.

Efectuarase integramente por medios electrónicos, de conformidade co artigo 14.2 da Lei 39/2015, do 1 de outubro, do procedemento administrativo común das administracións públicas, e será a sede electrónica da Xunta de Galicia o punto de acceso para que os interesados presenten calquera solicitude, comunicación, declaración responsable ou documento.

De conformidade co artigo 68.4 da Lei 39/2015, do 1 de outubro, do procedemento administrativo común das administracións públicas, se algunha das persoas interesadas presenta a súa comunicación presencialmente, será requirida para que a emende a través da súa presentación electrónica. Para estes efectos, considerarase como data de presentación aquela en que fose realizada a corrección.

Para a presentación electrónica poderá empregarse calquera dos mecanismos de identificación e sinatura admitidos pola sede electrónica da Xunta de Galicia, incluído o sistema de usuario e clave Chave365 (https://sede.xunta.gal/chave365).

Co fin de efectuar a inscrición no rexistro, a empresa instaladora deberá cumprimentar e presentar no Departamento Territorial correspondente o formulario de solicitude correspondente ó procedemento IN614C xunto con:

- Documento que recolla os principais datos e características da instalación que pode consistir nun dos dous seguintes:

a) Proxecto e certificado de dirección de obra asinado polo correspondente técnico titulado competente, no caso de que as características das instalacións se encontren comprendidas nas indicadas no punto terceiro da Instrución Técnica Complementaria 04 do Regulamento Electrotécnico de baixa tensión (ITC-BT-04).

b) Memoria Técnica de Deseño (MTD), asinada polo instalador autorizado para a categoría da instalación correspondente ou técnico titulado competente, para as instalacións non incluídas no punto terceiro da ITC-BT-04, sexan as instalacións novas, ampliación ou modificación.

- Certificado de Instalación asinado polo instalador e selado pola empresa instaladora.

- Anexo de información ao usuario e croquis de trazado da instalación.

- Certificado de inspección inicial con cualificación de resultado favorable, emitido por Organismo de Control nos casos indicados no apartado 4 da ITC-BT-05.

A documentación complementaria presentarase electronicamente utilizando calquera procedemento de copia dixitalizada do documento orixinal. Neste caso, as copias dixitalizadas presentadas garantirán a fidelidade co orixinal baixo a responsabilidade da persoa solicitante ou representante.

Excepcionalmente, cando a relevancia do documento no procedemento o esixa ou existan dúbidas derivadas da calidade da copia, a Administración poderá solicitar de maneira motivada o cotexo das copias achegadas polas persoas interesadas, para o que poderá requirir a exhibición do documento ou da información orixinal.

Comprobación de datos

Para tramitar este procedemento consultaranse automaticamente os datos incluídos nos seguintes documentos en poder da Administración actuante ou elaborados polas administracións públicas, agás que a persoa interesada se opoña á súa consulta:

• DNI ou NIE da persoa comunicante.

• DNI ou NIE da persoa representante.

• NIF da persoa xurídica comunicante.

• NIF da persoa xurídica representante.

No caso de que as persoas interesadas se opoñan á consulta, deberán indicalo no recadro correspondente habilitado para tal efecto no formulario e achegar os documentos.

Cando así o exixa a normativa aplicable, solicitarase o consentimento expreso da persoa interesada para realizar a consulta.

Excepcionalmente, no caso de que algunha circunstancia imposibilite a obtención dos citados datos, poderáselles solicitar ás persoas interesadas que presenten os documentos correspondentes.

Trámites administrativos posteriores á presentación:

Todos os trámites administrativos que as persoas interesadas deban realizar tras a presentación da comunicación deberán ser efectuados electronicamente accedendo á Carpeta cidadá da persoa interesada, dispoñible na sede electrónica da Xunta de Galicia.