Concesión de axudas ao sector editorial galego, relativas a gastos de produción, distribución e comercialización de libros en lectura fácil en formato físico ou dixital, en galego.

As solicitudes para a produción de libros de lectura fácil en galego poderán ser presentadas polas persoas físicas ou xurídicas que acrediten a súa condición de editoras de acordo co establecido no artigo 8 da presente orde.

1. As persoas, físicas ou xurídicas solicitantes deberán presentar un plan de edición individualizado por cada obra para a que solicita a subvención.

2. A persoa solicitante debe estar legalmente constituída como editorial con anterioridade ao 1 de xaneiro de 2025.

Solicitudes

1. As solicitudes presentaranse obrigatoriamente por medios electrónicos a través do formulario normalizado dispoñible na sede electrónica da Xunta de Galicia, https://sede.xunta.gal, segundo o modelo que se incorpora como anexo II (CT238C).

Esta liña de axudas diríxese a empresas do sector editorial que poden ser tanto persoas físicas como xurídicas. As persoas autónomas que participen nesta orde de axudas, en aplicación do artigo 10 da Lei 4/2019, do 17 de xullo, de administración dixital de Galicia, están obrigadas a relacionarse coa Xunta de Galicia a través de medios electrónicos, dado que, ao tratarse de persoas que exercen a actividade editora polo réxime de autónomos, poden operar coa Administración a través de medios telemáticos, xa que dispoñen da capacidade técnica e os medios electrónicos necesarios para relacionarse coa Administración na contorna dixital.

2. De conformidade co artigo 68.4 da Lei 39/2015, do 1 de outubro, do procedemento administrativo común das administracións públicas, se algunha das persoas interesadas presenta a súa solicitude presencialmente, requiriráselle para que a emende a través da súa presentación electrónica. Para estes efectos, considerarase como data de presentación da solicitude aquela en que fose realizada a emenda.

3. Para a presentación das solicitudes poderá empregarse calquera dos mecanismos de identificación e sinatura admitidos pola sede electrónica da Xunta de Galicia, incluído o sistema de usuario e clave Chave365 (https://sede.xunta.gal/chave365).

Documentación complementaria

1. As persoas, físicas ou xurídicas, interesadas deberán achegar coa solicitude a seguinte documentación común ás dúas modalidades:

a) De ser o caso, documentación acreditativa da representación da persoa que actúe no nome da persoa solicitante. A representación poderá acreditarse a través do modelo normalizado dispoñible na sede electrónica da Xunta de Galicia ou por calquera outro medio válido en dereito. O modelo normalizado pódese descargar na seguinte ligazón

https://sede.xunta.gal/modelos-normalizados

b) Copia do último recibo de pagamento do imposto de actividades económicas, de ser o caso.

c) Certificación de situación no Censo de Actividades Económicas da Axencia Estatal da Administración Tributaria, no caso de que a editorial teña o domicilio fiscal fóra de Galicia.

2. Esta documentación só se presentará unha vez, no caso de varias solicitudes da mesma editora.

3. A documentación que se achegue coa solicitude debe vir obrigatoriamente nunha das dúas linguas oficiais de Galicia.

4. De conformidade co artigo 28.3 da Lei 39/2015, do 1 de outubro, do procedemento administrativo común, non será necesario achegar os documentos que xa fosen presentados anteriormente pola persoa interesada a calquera Administración. Neste caso, a persoa interesada deberá indicar en que momento e ante que órgano administrativo presentou os ditos documentos, que serán recadados electronicamente a través das redes corporativas ou mediante consulta ás plataformas de intermediación de datos ou outros sistemas electrónicos habilitados para o efecto, agás que conste no procedemento a oposición expresa da persoa interesada.

De forma excepcional, se non se puidesen obter os citados documentos, poderá solicitarse novamente á persoa interesada a súa achega.

5. A documentación complementaria deberá presentarse electronicamente.

Se algunha das persoas interesadas presenta a documentación complementaria presencialmente, requiriráselle para que a emende a través da súa presentación electrónica. Para estes efectos, considerarase como data de presentación aquela en que fose realizada a emenda.

6. As persoas interesadas responsabilizaranse da veracidade dos documentos que presenten. Excepcionalmente, cando a relevancia do documento no procedemento o exixa ou existan dúbidas derivadas da calidade da copia, a Administración poderá solicitar de maneira motivada o cotexo das copias achegadas pola persoa interesada, para o que poderán requirir a exhibición do documento ou da información orixinal. A non correspondencia do documento presentado co orixinal será causa de denegación ou revogación da subvención.

7. Sempre que se realice a presentación de documentos separadamente da solicitude deberase indicar o código e o órgano responsable do procedemento, o número de rexistro de entrada da solicitude e o número de expediente se se dispón del.

8. No caso de que algún dos documentos que se pretenda presentar de forma electrónica superase os tamaños máximos establecidos ou tivese un formato non admitido pola sede electrónica da Xunta de Galicia, permitirase a presentación deste de forma presencial dentro dos prazos previstos e na forma indicada no número anterior. A información actualizada sobre o tamaño máximo e os formatos admitidos pode consultarse na sede electrónica da Xunta de Galicia.

Documentación específica que se vai presentar coa solicitude

1. Coa solicitude deberase achegar, ademais da documentación de carácter xeral, a seguinte documentación específica:

a) Plan de edición (único documento) no cal a editora xustifique a necesidade da subvención para completar o plan coas características propostas. Incluirá as características do libro adaptado a lectura fácil: o contido, o enfoque, a traxectoria do/da autor/a, o prazo estimado de edición, o número de edicións da obra orixinal que se puxesen á venda, a/as entidade/s de validación, o proceso de produción, as canles de venda, as características técnicas e o custo de produción.

b) Plan de márketing no cal se indican as estratexias de segmentación e público, a estratexia de comunicación, as canles de distribución e a estratexia de internacionalización, se é o caso.

c) Referencia bibliográfica da obra orixinal a partir da que se vai realizar a adaptación, en que consten como mínimo: o título, a autoría, o número de depósito legal, ISBN e o número de edición.

d) Certificación por parte da entidade editora da obra orixinal, que se adaptará en que conste o número de palabras das que se compón a obra.

2. A documentación específica deberá presentarse electronicamente.

Comprobación de datos

1. Para a tramitación destes procedementos consultaranse automaticamente os datos incluídos nos seguintes documentos en poder da Administración actuante ou elaborados polas administracións públicas, agás que a persoa interesada se opoña á súa consulta:

a) DNI ou NIE da persoa solicitante.

b) DNI ou NIE da persoa representante.

c) NIF da entidade solicitante.

d) NIF da entidade representante.

e) Alta no imposto de actividades económicas (IAE).

f) Certificado de estar ao día no pagamento coa Seguridade Social.

g) Certificado de estar ao día no pagamento de obrigas tributarias coa AEAT.

h) Certificado de estar ao día no pagamento de débedas coa Administración pública da Comunidade Autónoma.

i) Consulta de inhabilitación para obter subvencións e axudas.

j) Consulta de concesións de subvencións e axudas.

k) Consulta de concesións pola regra de minimis.

2. No caso de que as persoas interesadas se opoñan a esta consulta, deberán indicalo no cadro correspondente habilitado no formulario de inicio e achegar os documentos.

Cando así o exixa a normativa aplicable, solicitarase o consentimento expreso da persoa interesada para realizar a consulta.

3. Excepcionalmente, no caso de que algunha circunstancia imposibilitase a obtención dos citados datos, poderase solicitar ás persoas interesadas a presentación dos documentos correspondentes.

Trámites administrativos posteriores á presentación das solicitudes

Todos os trámites administrativos que as persoas interesadas deban realizar tras a presentación da solicitude deberán ser efectuados electronicamente accedendo á Carpeta cidadá da persoa interesada dispoñible na sede electrónica da Xunta de Galicia.

Prazo de resolución:

Cinco meses

Sentido do silencio:

Negativo