Subvencións, en réxime de concorrencia non competitiva, para a mellora das instalacións das comunidades de usuarios de abastecemento para consumo humano na Comunidade Autónoma de Galicia e convocar estas subvencións para o ano 2026.

1. Poderán ser beneficiarias destas subvencións as comunidades de usuarios coa finalidade de abastecemento de auga para consumo humano legalmente constituídas na Comunidade Autónoma de Galicia, de acordo coas previsións do Regulamento do dominio público hidráulico, aprobado polo Real decreto 849/1986, do 11 de abril.

2. Non poderán ser beneficiarias as comunidades de usuarios de abastecemento que xa o fosen ao abeiro da Resolución do 11 de febreiro de 2025 pola que se aproban as bases reguladoras para a concesión de subvencións, en réxime de concorrencia competitiva, para a mellora das instalacións das comunidades de usuarios de abastecemento para o consumo humano na Comunidade Autónoma de Galicia, e se convocan para o ano 2025 (DOG núm. 37, do 24 de febreiro).

Para estes efectos, as comunidade de usuarios que obtiveron a condición de beneficiarios na convocatoria anterior poderán consultarse na Resolución da Dirección de Augas de Galicia do 20 de agosto de 2025 pola que se fan públicas as subvencións concedidas ao abeiro da Resolución do 11 de febreiro de 2025 (DOG núm. 164, do 28 de agosto).

(https://www.xunta.gal/dog/Publicados/2025/20250828/AnuncioO143-200825-0001_gl.pdf)

1. Para obter a condición de beneficiarias, as comunidades de usuarios deberán cumprir os seguintes requisitos:

a) Estar legalmente constituídas como titulares dunha concesión de aproveitamento de augas para consumo humano antes do 1 de xaneiro de 2026.

b) Non ter sido sancionadas nin obrigadas á reposición da legalidade polo organismo de bacía por resolución firme posterior ao 1 de xaneiro de 2020.

c) Cumprir os requisitos recollidos no artigo 10 da Lei 9/2007, do 13 de xuño, de subvencións de Galicia.

d) Estar ao día no cumprimento das obrigas coa Axencia Estatal da Administración Tributaria, a Tesouraría Xeral da Seguridade Social e a consellería competente en materia de facenda da Xunta de Galicia e non ter pendente de pagamento en período executivo ningunha outra débeda coa Administración pública da Comunidade Autónoma de Galicia e, nomeadamente, con Augas de Galicia.

2. Ningunha comunidade de usuarios poderá presentar máis dunha solicitude ao abeiro desta convocatoria de subvencións, aínda que se refiran a actuacións distintas. O incumprimento deste punto dará lugar á inadmisión das solicitudes presentadas en segundo ou sucesivo lugar.

Solicitudes

1. As solicitudes presentaranse obrigatoriamente por medios electrónicos a través do formulario normalizado (anexo I) dispoñible na sede electrónica da Xunta de Galicia https://sede.xunta.gal

De conformidade co artigo 68.4 da Lei 39/2015, do 1 de outubro, do procedemento administrativo común das administracións públicas, se algunha das persoas interesadas presenta a súa solicitude de maneira presencial, requiriráselle para que a emende a través da súa presentación electrónica. Para estes efectos, considerarase como data de presentación da solicitude aquela na que fose realizada a emenda. Se a emenda deste concreto defecto (presentación presencial da solicitude) se realiza unha vez transcorrido o prazo indicado na convocatoria da subvención para a presentación de solicitudes, o órgano competente ditará resolución en que se desestimará a solicitude por presentarse fóra do prazo, de acordo co artigo 23 en relación co artigo 20.2 letra g) da Lei 9/2007, do 13 de xuño, de subvencións de Galicia.

Para a presentación electrónica poderá empregarse calquera dos mecanismos de identificación e sinatura admitidos pola sede electrónica da Xunta de Galicia, incluído o sistema de usuario e clave Chave365 (https://sede.xunta.gal/chave365).

As solicitudes e os trámites posteriores deberán estar asinados de maneira electrónica pola persoa titular da presidencia ou da secretaría da entidade solicitante ou pola persoa en que estea delegada a competencia no momento da dita sinatura. No caso de que a solicitude sexa presentada por unha persoa distinta á titular da presidencia ou secretaría, deberá achegarse a acta de nomeamento da persoa titular da presidencia e da secretaría, segundo a disposición adicional primeira.

2. No formulario, que figura como anexo I desta resolución, declárase o seguinte:

a) Que a comunidade de usuarios que solicita a subvención acepta as condicións e os demais requisitos exixidos na resolución de convocatoria.

b) Que a comunidade de usuarios que solicita a subvención apoderou a persoa que asina para presentar a solicitude e demais documentos exixidos na resolución de convocatoria.

c) Que todos os datos contidos na solicitude e nos documentos que se achegan son certos.

d) O conxunto de todas as subvencións ou axudas das distintas administracións públicas competentes ou outros entes públicos, solicitadas ou concedidas para este mesmo proxecto ou conceptos financiados ao abeiro desta resolución, e o compromiso de comunicar de contado cantas subvencións ou axudas solicite e/ou obteña doutras administracións públicas ou doutros entes públicos ou privados, nacionais ou internacionais, a partir da data desta declaración.

e) Que a comunidade de usuarios cumpre os requisitos que se recollen no artigo 13 da Lei 38/2003, do 17 de novembro, xeral de subvencións.

f) Que a comunidade de usuarios non está incursa en ningunha clase de inhabilitación para a obtención de subvencións prevista nos números 2 e 3 do artigo 10 da Lei 9/2007, do 13 de xuño, de subvencións de Galicia.

g) Que a comunidade de usuarios está ao día no pagamento de obrigas por reintegro de subvencións, conforme o artigo 10.2.g) da Lei 9/2007, do 13 de xuño, de subvencións de Galicia, e o artigo 9 do Regulamento de subvencións de Galicia, aprobado polo Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia.

h) Que a comunidade de usuarios está ao día no cumprimento das obrigas tributarias coa Axencia Estatal da Administración Tributaria, fronte á Seguridade Social e non ten pendente de pagamento en período executivo ningunha outra débeda coa Administración pública da Comunidade Autónoma de Galicia e, nomeadamente, con Augas de Galicia.

i) Que a comunidade de usuarios é titular ou ten dereito de uso por calquera título válido sobre os terreos ou inmobles en que se vai desenvolver a actuación cuxa subvención se solicita.

j) O organismo de bacía que resolveu a concesión do aproveitamento de auga.

k) O número de comuneiros da comunidade de usuarios.

l) Que a asemblea xeral da comunidade de usuarios acordou participar na convocatoria de subvencións no día correspondente, o nomeamento da persoa representante para as súas relacións con Augas de Galicia e o compromiso de financiar o 20 % do investimento total da intervención por parte da comunidade de usuarios.

m) O carácter recuperable ou non do imposto sobre o valor engadido (IVE) por parte da comunidade de usuarios, de acordo co disposto na Lei 37/1992, do 28 de decembro, do imposto sobre o valor engadido.

n) Que a comunidade de usuarios solicitante é titular da conta bancaria indicada en que se realizará o pagamento da subvención, se é o caso.

Documentación complementaria

1. As comunidades de usuarios interesadas deberán achegar xunto coa solicitude a seguinte documentación:

a) Documentación acreditativa do poder de representación da persoa que se relacionará con Augas de Galicia, o que inclúe a presentación da solicitude e os trámites posteriores, nos termos establecidos na disposición adicional primeira desta resolución.

b) Memoria descritiva das obras ou do equipamento, asinada de maneira electrónica segundo o establecido na disposición adicional segunda, co seguinte contido mínimo:

1º. Descrición xeral do sistema de abastecemento, que inclúa, polo menos, a localización das captacións, dos tratamentos e dos depósitos existentes, así como a xustificación, se é o caso, da inexistencia de alternativas de abastecemento a través doutras redes municipais ou veciñais.

2º. Xustificación das actuacións solicitadas nas cales se indique en que actuación subvencionable se encadra, segundo o artigo 4 desta resolución, que inclúa a explicación da necesidade do proxecto e os obxectivos que se pretenden acadar coa súa execución.

3º. Plano ou esquema no que se indique a localización da actuación subvencionable de data posterior ao 1 de xaneiro de 2022.

4º. Fotografías recentes que evidencien a situación da instalación antes da execución da obra.

5º. Orzamento detallado, que describirá con claridade os conceptos e as cantidades e o seu prezo unitario, e incluirá o imposto sobre o valor engadido (IVE) que sexa de aplicación. No caso de que o IVE sexa recuperable pola comunidade de usuarios, deberá indicarse expresamente.

A falta de presentación da documentación indicada será obxecto de requirimento de emenda e aplicarase o previsto nesta resolución de convocatoria para o suposto de non atenderse ao requirimento, sen prexuízo do disposto no artigo 13 desta resolución sobre comprobación de datos.

De conformidade co artigo 28.3 da Lei 39/2015, do 1 de outubro, do procedemento administrativo común, non será necesario achegar os documentos que xa fosen presentados anteriormente pola persoa interesada ante calquera Administración. Neste caso, a persoa interesada deberá indicar en que momento e ante que órgano administrativo presentou os ditos documentos, que serán recadados de maneira electrónica a través das redes corporativas ou mediante a consulta ás plataformas de intermediación de datos ou outros sistemas electrónicos habilitados para o efecto, agás que conste no procedemento a oposición expresa da persoa interesada.

De forma excepcional, se non se puidesen obter os citados documentos, poderá solicitarse novamente á persoa interesada a súa achega.

2. A documentación complementaria deberá presentarse de maneira electrónica.

Se algunha das comunidades de usuarios interesadas presenta a documentación complementaria de maneira presencial, requiriráselle para que a emende a través da súa presentación electrónica. Para estes efectos, considerarase como data de presentación aquela en que fose realizada a emenda.

As persoas interesadas responsabilizaranse da veracidade dos documentos que presenten. Excepcionalmente, cando a relevancia do documento no procedemento o exixa ou existan dúbidas derivadas da calidade da copia, a Administración poderá solicitar de maneira motivada o cotexo das copias achegadas pola persoa interesada, para o que poderán requirir a exhibición do documento ou da información orixinal.

3. Sempre que se realice a presentación de documentos separadamente da solicitude deberanse indicar o código e o órgano responsable do procedemento, o número de rexistro de entrada da solicitude e o número de expediente, se se dispón del.

4. O tamaño máximo previsto para a presentación electrónica de documentos é de 2GB por presentación.

5. No caso de que algún dos documentos que hai que presentar de forma electrónica superase os tamaños máximos establecidos ou tivese un formato non admitido pola sede electrónica da Xunta de Galicia, permitirase a presentación deste de forma presencial dentro dos prazos previstos e na forma indicada no número anterior. A información actualizada sobre o tamaño máximo e os formatos admitidos pode consultarse na sede electrónica da Xunta de Galicia.

O procedemento que se seguirá para presentar documentación de gran tamaño pode consultarse na sede electrónica da Xunta de Galicia a través da seguinte ligazón:

https://sede.xunta.gal/axuda/preguntas-frecuentes?content=pregunta-frecuente_0068.xml

Comprobación de datos

1. Para a tramitación deste procedemento poderán consultarse automaticamente os datos incluídos nos seguintes documentos en poder da Administración actuante ou elaborados polas administracións públicas, agás que a persoa interesada se opoña á súa consulta:

a) DNI/NIE da persoa representante.

b) NIF da entidade solicitante.

c) NIF da entidade representante.

d) Certificacións sobre o cumprimento de obrigas que deba emitir a Axencia Estatal da Administración Tributaria.

e) Certificacións sobre o cumprimento de obrigas fronte á Seguridade Social que deba emitir a Tesouraría Xeral da Seguridade Social.

f) Certificacións sobre o cumprimento de obrigas coa Administración pública da Comunidade Autónoma de Galicia.

g) Certificación sobre o cumprimento de obrigas derivadas da xestión dos tributos en materia de augas que deba emitir Augas de Galicia.

h) Inhabilitacións para obter subvencións e axudas.

i) Consulta de concesións ampliado.

j) Consulta de axudas do Estado.

k) Resolución da concesión de aproveitamento de auga para o consumo humano a favor da comunidade de usuarios.

l) Procedementos sancionadores ou de reposición da legalidade tramitados por Augas de Galicia con posterioridade ao 1 de xaneiro de 2020.

m) Informe do organismo de bacía correspondente acreditativo de que a entidade solicitante non tivo sancións ou resolucións firmes en procedementos sancionadores ou de reposición da legalidade con posterioridade ao 1 de xaneiro de 2020, no caso de que as comunidades de usuarios non pertenzan a demarcación hidrográfica Galicia Costa.

2. No caso de que as persoas interesadas se opoñan á consulta, deberán indicalo no recadro correspondente habilitado no formulario correspondente e achegar os documentos.

Cando así o exixa a normativa aplicable, solicitarase o consentimento expreso da persoa interesada para realizar a consulta.

3. Excepcionalmente, no caso de que algunha circunstancia imposibilitase a obtención dos citados datos, poderáselles solicitar ás persoas interesadas a presentación dos documentos correspondentes.

4. Para comprobar se as comunidades de usuarios solicitantes foron beneficiarias da subvención convocada en 2025 ao abeiro do disposto na Resolución do 11 de febreiro de 2025 pola que se aproban as bases reguladoras para a concesión de subvencións, en réxime de concorrencia competitiva, para a mellora das instalacións das comunidades de usuarios de abastecemento para consumo humano na Comunidade Autónoma de Galicia, e se convocan para o ano 2025, Augas de Galicia consultará os datos que consten na Resolución da Dirección de Augas de Galicia, do 20 de agosto de 2025, pola que se fan públicas as subvencións concedidas ao abeiro da citada Resolución do 11 de febreiro de 2025 (DOG núm. 164, do 28 de agosto).

Trámites administrativos posteriores á presentación da solicitude

Todos os trámites administrativos que as persoas interesadas deban realizar despois da presentación da solicitude deberán ser efectuados de maneira electrónica accedendo á Carpeta cidadá da persoa interesada dispoñible na sede electrónica da Xunta de Galicia.

Prazo de resolución:

Tres meses

Sentido do silencio:

Negativo