Ao amparo deste programa de axudas, as empresas de inserción (EI) poderán acceder ás seguintes liñas de axuda:

a) Asistencia técnica para a creación, mellora e diversificación da EI.

b) Inicio e posta en marcha da actividade.

c) Creación e ampliación de novos postos de traballo para persoas en inserción.

d) Contratación de xerentes ou persoas técnicas de produción necesarias para garantir a viabilidade da EI.

e) Contratación de persoas técnicas en orientación e acompañamento á inserción.

f) Formación para as persoas en proceso de inserción.

g) Mediación laboral para a inserción no mercado laboral ordinario da persoa en situación ou risco de exclusión social.

Asemade, as entidades promotoras de empresas de inserción poderán ser beneficiarias das axudas indicadas nas letras a) e e). Se a subvención a solicitan as entidades promotoras, non a poderán solicitar a empresa ou as empresas de inserción que promovan.

Poderán ser beneficiarias das axudas reguladas nesta orde, as entidades promotoras de empresas de inserción e as empresas de inserción inscritas como tales no Rexistro Administrativo das Empresas de Inserción de Galicia de acordo co disposto no Decreto 178/2022, do 15 de setembro, polo que se regula o procedemento para a cualificación das empresas de inserción de Galicia e o seu rexistro administrativo, sempre que cumpran as condicións e os requisitos establecidos para este tipo de axudas.

Neste sentido, será válida a cualificación provisional. Con todo, se no momento da xustificación e/ou o pagamento, a cualificación provisional quedase sen efecto e a entidade non obtivese a cualificación definitiva, procederá a revogación das subvencións concedidas, así como o reintegro total das cantidades percibidas e a exixencia do xuro de demora correspondente desde o momento do pagamento da subvención ata a data en que se acorde a procedencia do reintegro.

Non poderán obter a condición de entidades beneficiarias:

a) As entidades en que concorra algunha das circunstancias previstas nos números 2 e 3 do artigo 10 da Lei 9/2007, do 13 de xuño.

b) As entidades que estean excluídas do acceso aos beneficios derivados da aplicación dos programas de emprego, consonte co disposto nos artigos 46 e 46.bis do texto refundido da Lei de infraccións e sancións na orde social, aprobado polo Real decreto lexislativo 5/2000, do 4 de agosto.

A acreditación de non existencia das circunstancias das letras a) e b), realizarase mediante declaración responsable da entidade solicitante.

Solicitudes

1. As solicitudes de subvención presentaranse, xunto coa documentación sinalada para cada tipo de axuda, obrigatoriamente por medios electrónicos a través do formulario normalizado (anexo II para o procedemento TR356C) dispoñible na sede electrónica da Xunta de Galicia https://sede.xunta.gal/portada, e dirixiranse ao órgano competente para resolver.

2. As entidades só poderán presentar unha solicitude por cada programa e liña de axuda asinada pola persoa que desempeñe a súa representación. A presentación da solicitude implica o coñecemento e a aceptación destas bases reguladoras.

3. De conformidade co artigo 68.4 da Lei 39/2015, do 1 de outubro, do procedemento administrativo común das administracións públicas, se algunha das persoas interesadas presenta a súa solicitude de xeito presencial, requirirase para que a emende a través da súa presentación electrónica. Para estes efectos considerarase como data de presentación da solicitude aquela en que fose realizada a emenda.

4. Para a presentación das solicitudes poderá empregarse calquera dos mecanismos de identificación e sinatura admitidos pola sede electrónica da Xunta de Galicia, incluído o sistema de usuario e Chave365 (https://sede.xunta.gal/chave365).

Documentación complementaria xeral e específica

1. As entidades e empresas beneficiarias deberán presentar coa solicitude, a seguinte documentación xeral:

a) Poder suficiente da persoa representante para actuar en nome da entidade.

b) Memoria descritiva que recolla as actividades de inserción realizadas durante o último ano natural e o cumprimento dos seus obxectivos económicos e de inserción, a tipoloxía das accións realizadas, os recursos aplicados e as súas fontes.

c) Declaración responsable (recollida nos anexos I e II) referente á autenticidade da relación nominal das persoas traballadoras en proceso de inserción do persoal da empresa de inserción referida ao mes en que se presenta a solicitude de subvención polas que se solicita a subvención, achegada coa solicitude en formato folla de calculo asinada dixitalmente e segundo o modelo que consta na páxina https://conselleriaemprego.xunta.gal/axudas-subvencions/emprego

d) Autorización para a comprobación de datos das persoas traballadoras contratadas ata a data da solicitude que son obxecto de subvención e/ou polas destinatarias da subvención, consonte co anexo III.

2. Ás solicitudes anexarase, ademais da documentación xeral, a seguinte documentación específica de cada unha das liñas polas que solicite a axuda:

- Asistencia técnica para a creación, mellora e diversificación da EI.

a) Memoria descritiva dos servizos para os cales se solicita a axuda e xustificación da súa necesidade.

b) Orzamento detallado de todos os gastos para os cales se solicita a axuda, con IVE desagregado.

c) Identificación da persoa, entidade ou empresa que vai prestar o servizo e xustificación da súa solvencia técnica.

d) No suposto da creación dunha empresa de inserción, actividade que vai desenvolver e unha previsión económico-financeira para os dous exercicios iniciais.

e) No caso dos estudos de mercado ou viabilidade, proxecto de apertura de mercados ou de reorientación da actividade empresarial que se somete ao estudo e un índice do contido do estudo.

- Axudas para o inicio e a posta en marcha da actividade

a) Relación detallada e individualizada dos gastos necesarios para o inicio e a posta en marcha da actividade, co IVE desagregado.

b) Facturas, facturas pro forma ou orzamentos dos gastos incluídos na relación a que se refire o punto anterior.

c) No caso de reorientación ou diversificación da actividade inicial, memoria explicativa da súa necesidade por apertura de novo centro.

- Axudas para a creación e ampliación de novos postos de traballo para persoas en inserción

a) Memoria explicativa da relación entre a adquisición do ben coa actividade da empresa e xustificación da necesidade da dita adquisición.

b) Detalle do Plan de investimentos en inmobilizado, que inclúa unha relación detallada e individualizada dos gastos necesarios e o calendario para a súa execución.

c) Facturas, facturas pro forma ou orzamentos incluídos na relación a que se refire o punto anterior.

d) De ser o caso, as tres ofertas mencionadas no artigo 42.5 e a xustificación da súa elección.

- Axudas para a contratación de xerentes ou persoas técnicas de produción

a) Memoria explicativa da necesidade da contratación de xerentes ou persoas técnicas para garantir a viabilidade técnica, económica ou financeira da empresa, na cal consten o número e os perfís profesionais e os servizos que van prestar.

b) Recibos de salarios e documentos bancarios de transferencia acreditativos do pagamento das mensualidades xa aboadas na data da presentación da solicitude.

- Axudas para a contratación de persoas técnicas en orientación e acompañamento á inserción

a) Memoria descritiva da necesidade da contratación de persoal técnico en accións de orientación e acompañamento á inserción, na cal consten o número e os perfís profesionais, as funcións que van realizar, así como o número de persoas traballadoras en proceso de inserción que van orientar e a porcentaxe da xornada de traballo que lle van a dedicar.

b) Currículo do persoal técnico contratado ata a data de presentación da solicitude, xunto coa documentación que acredite a súa formación e experiencia profesional.

c) Recibos de salarios e documentos bancarios de transferencia acreditativos do pagamento das mensualidades xa aboadas na data da presentación da solicitude.

- Axudas para a formación das persoas no proceso de inserción

a) Memoria descritiva do curso/actividade de formación solicitada e xustificación da súa necesidade para a inserción das persoas en situación ou risco de exclusión social.

b) Certificación emitida pola entidade formadora na que consten, entre outros, os seguintes aspectos:

– Nome da actividade formativa.

– Lugar e datas de realización.

– Módulos que se impartirán e distribución temporal (número de horas).

– Prazo de inscrición.

– Número de prazas.

c) Solicitude de inscrición ou matrícula na actividade formativa, se procede.

d) Facturas, facturas pro forma ou orzamentos das actividades formativas.

 - Axudas para a mediación laboral para a inserción no mercado laboral ordinario da persoa en situación ou risco de exclusión social 

a) Declaración da empresa contratante ou sociedade cooperativa, de que a incorporación da persoa traballadora ao mercado laboral ordinario realizouse por mediación da empresa de inserción, ou ben declaración da persoa traballadora autónoma de que a súa iniciativa de autoemprego realizouse mediante o asesoramento, apoio e acompañamento da empresa de inserción.

b) Nóminas ou anticipos societarios abonados á persoa traballadora ou ben xustificantes das cotizacións á Seguridade Social desde a alta no réxime especial da Seguridade Social por conta propia.

3. Se algunha das persoas interesadas presenta a documentación complementaria presencialmente, requirirase para que a emende a través da súa presentación electrónica. Para estes efectos, considerarase como data de presentación aquela en que sexa realizada a emenda.

As persoas interesadas responsabilizaranse da veracidade dos documentos que presenten. Excepcionalmente, cando a relevancia do documento no procedemento o exixa ou existan dúbidas derivadas da calidade da copia, a Administración poderá solicitar de maneira motivada o cotexo das copias achegadas pola persoa interesada, para o que poderá requirir a exhibición do documento ou da información orixinal.

4. Sempre que se realice a presentación de documentos separadamente da solicitude, deberá indicarse o código e o órgano responsable do procedemento, o número de rexistro de entrada da solicitude e o número de expediente, se se dispón del.

5. No caso de que algún dos documentos que se vaian presentar de forma electrónica superase os tamaños máximos establecidos ou tivese un formato non admitido pola sede electrónica da Xunta de Galicia, permitirase a súa presentación de forma presencial dentro dos prazos previstos e na forma indicada no número anterior. A información actualizada sobre o tamaño máximo dos formatos admitidos poden consultarse na sede electrónica da Xunta de Galicia.

Comprobación de datos

1. Para a tramitación dos procedementos regulados nesta orde consultaranse automaticamente os datos incluídos nos seguintes documentos en poder da Administración actuante ou elaborados polas administracións públicas, agás que a persoa interesada se opoña á súa consulta:

a) NIF da entidade solicitante.

b) DNI ou NIE da persoa representante.

c) Imposto de actividades económicas, data de alta da actividade da entidade solicitante.

d) Certificación de estar ao día nas súas obrigas coa Seguridade Social a entidade solicitante.

e) Certificación de estar ao día nas súas obrigas coa Administración da Comunidade Autónoma de Galicia a entidade solicitante.

f) Certificación de estar ao día nas súas obrigas coa Axencia Estatal Tributaria a entidade solicitante.

g) DNI ou NIE das persoas traballadoras obxecto da subvención e/o destinatarias finais da subvención.

h) Informe da vida laboral das persoas traballadoras polas cales se solicita a subvención e das persoas en risco ou situación de exclusión social destinatarias finais da subvención.

i) Contratos de traballo das persoas polas cales se solicita a subvención e das persoas en risco ou situación de exclusión social destinatarias da subvención.

j) Inscrición como demandante de emprego no Servizo Público de Emprego relativa ás persoas polas que se solicita a subvención, cando lles sexa de aplicación esta circunstancia.

2. No caso de que as persoas interesadas se opoñan a esta consulta, deberán indicalo no recadro correspondente habilitado no formulario correspondente e achegar os devanditos documentos.

Cando así o exixa a normativa aplicable, solicitarase o consentimento expreso da persoa interesada para realizar a consulta.

3. Excepcionalmente, no caso de que algunha circunstancia imposibilite a obtención dos citados datos, poderáselles solicitar ás persoas interesadas a presentación dos documentos correspondentes.

4. A comprobación será realizada polo órgano competente en cada unha das fases de xestión, control e verificación das axudas.

5. De conformidade co artigo 28.3 da Lei 39/2015, do 1 de outubro, do procedemento administrativo común das administracións públicas, non será necesario achegar os documentos que xa fosen presentados anteriormente pola persoa interesada ante calquera Administración. Neste caso, a persoa interesada deberá indicar en que momento e ante que órgano administrativo presentou tales documentos, que serán solicitados de forma electrónica a través das redes corporativas ou mediante consulta ás plataformas de intermediación de datos ou outros sistemas electrónicos habilitados para o efecto, agás que conste no procedemento a súa oposición expresa.

Trámites administrativos posteriores á solicitude

Todos os trámites administrativos que as persoas interesadas deban realizar despois da presentación das solicitudes dos procedementos regulados nesta orde deberán efectuarse de xeito electrónico accedendo á Carpeta cidadá da persoa interesada, dispoñible na sede electrónica da Xunta de Galicia.

Prazo de resolución:

Tres meses

Sentido do silencio:

Negativo