Inscrición de fundacións de interese galego: constitución e modificacións sucesivas.

Unha fundación de interese galego é unha organización constituída sen fin de lucro que, por vontade dos seus creadores, ten afectado de modo duradeiro o seu patrimonio á realización de fins de interese xeral para Galicia. Desenvolve principalmente as súas actividades e ten o seu domicilio no territorio da Comunidade Autónoma de Galicia.

Na actualidade, as entidades sen ánimo de lucro en xeral, e as fundacións en particular, son o mellor exemplo do claro dinamismo da nosa sociedade e un instrumento de máxima utilidade para que particulares e entidades públicas afronten o compromiso de colaborar na realización do interese común de todos os cidadáns.

O desenvolvemento económico ten impulsado a expansión e diversificación dos fins fundacionais, sendo cada vez máis representativos e acordes coa evolución social. Este factor, unido á imaxe positiva e boa acollida que teñen as fundacións, favoreceu e favorecerá o seu constante auxe. Neste sentido, o seu número e importancia crecen paralelamente ao desenvolvemento do seu prestixio e grao de influencia no noso contorno.

A realidade fundacional, consciente da súa responsabilidade social, achegará recursos humanos e económicos ao fin de contribuír á consecución dunha sociedade máis xusta, cohesionada e solidaria.

A solicitude de clasificación da fundación presentarase ante o protectorado de fundacións da Consellería de Presidencia, Xustiza e Deportes. As restantes solicitudes de inscrición presentaranse no rexistro que corresponda en atención aos fins da fundación, de conformidade coa súa clasificación.

A orde de clasificación deberá ditarse no prazo dun mes, a partir da solicitude, e implicará a adscrición da tutela da fundación á consellería correspondente por razón de materia que constitúa o fin principal de tal fundación, que exercerá plenamente o protectorado sobre ela.

A inscrición da fundación comportará a declaración de interese galego e publicarase mediante resolución da secretaría xeral do departamento correspondente no Diario Oficial de Galicia. A inscrición efectuarase no prazo máximo de dous meses a partir da clasificación da correspondente fundación.

As inscricións e os demais asentos derivados da presentación de documentos que poidan xerar unha operación rexistral haberán de ser obxecto de resolución e notificación a quen presentase o título, dentro do prazo de seis meses, cando se trate da primeira inscrición, modificación ou nova redacción dos estatutos, fusión, escisión e extinción da fundación, e tres meses para os restantes casos.

Fundacións de interese galego.

Prazo de presentación: ABERTO

Neste Rexistro inclúense todas as fundacións de interese galego, que son aquelas organizacións constituídas sen fin de lucro que, por vontade dos seus creadores, teñan afectado de modo duradeiro o seu patrimonio á realización de fins de interese xeral para Galicia e desenvolvan principalmente as súas actividades e teñan o seu domicilio no territorio da comunidade autónoma.

O Rexistro de Fundacións de Interese Galego está integrado por un rexistro único adscrito á Vicepresidencia Segunda e Consellería de Presidencia, Xustiza e Turismo, e as distintas seccións adscritas a cada un dos departamentos con funcións de protectorado, en cada unha das cales levará un rexistro auxiliar, no que se inscribirán os actos e documentos correspondentes ás fundacións sobre as que exerzan as funcións de protectorado.

O Rexistro ten como finalidade ofrecer un sistema de garantía de publicidade material e formal das fundacións, mediante a inscrición do acto de constitución e de toda a secuencia de actos a través dos que se desenvolve a actividade fundacional, sendo un instrumento de seguridade xurídica e canle de información da realidade fundacional galega.

• Inscrición inicial no rexistro ( 30.46.01)
• Inscrición de modificación de estatutos ( 30.46.02)
• Inscrición de modificación do órgano de goberno ( 30.46.03)
• Inscrición de delegacións de facultades, revogacións e apoderamentos ( 30.46.04)
• Inscrición de fusión, escisión e extinción ( 30.46.05)
• Inscrición de alleamento, gravame e arrendamento de bens ( 30.46.06)
• Modificación/desembolso da dotación ( 30.46.07)
• Constitución/modificación/supresión de comisións ( 30.46.08)
• Nomeamento/cesamento da Xerencia ou membros de comisións ( 30.46.09)
• Outros actos sometidos a inscrición ( 30.46.10)
• Copia doutros documentos depositados no Rexistro e obtención de información, certificacións ou listaxes ( 30.46.11)
• Certificado de denominación ( 30.46.12)
• Anotacións de calquera clase nos expedientes ou subministración de datos non incluídos nos apartados anteriores ( 30.46.13)
• Expedición de copia de estatutos ( 30.46.14)
• Dilixenciado de libros ( 30.46.15)

Pode realizar o pago destas taxas na Oficina Virtual Tributaria.

En todas as solicitudes:

• Solicitude a través do modelo normalizado PR750A dispoñible na Sede electrónica.

• Documento acreditativo da representación, no seu caso.

• Xustificante de pago da taxa correspondente.

E segundo o tipo de solicitude:

CLASIFICACIÓN, DECLARACIÓN DE INTERESE GALEGO E INSCRICIÓN INICIAL

• Escritura pública de constitución da fundación (debe incluír o certificado de denominación negativo emitido polo Rexistro).

• Documento acreditativo da aceptación dos patróns.

• Número de Identificación Fiscal (provisional) expedido pola AEAT.

MODIFICACIÓN DE ESTATUTOS

• Escritura pública na que conste o texto consolidado dos estatutos e o acordo do padroado expresivo da vontade de modificalos.

MODIFICACIÓN DO PADROADO

- Nomeamentos e substitucións: documento acreditativo (certificado da reunión do padroado) e, en caso de nomeamentos, a aceptación expresa do cargo por calquera dos medios previstos na Lei de Fundacións de Interese Galego. No caso de persoas xurídicas, a aceptación deberá efectuarse polo seu representante legal, con designación da persoa física que o representará no padroado, que deberá, tamén, aceptar o seu nomeamento.

- Por morte, declaración xudicial de falecemento ou extinción da personalidade xurídica: certificación emitida polo Rexistro Civil ou, de ser o caso, polo Rexistro Mercantil (pode solicitarse a instancia do padroado ou de calquera interesado).

- Por incapacidade, inhabilitación ou incompatibilidade: resolución xudicial ou administrativa que declare tal circunstancia.

- Por renuncia: mediante escritura pública; por documento privado con firma lexitimada por un fedatario público; ou ante o padroado, acreditándose mediante certificado expedido pola persoa titular da secretaría co visto e prace da persoa titular da presidencia.

- Por cesamento de membros que o fosen por razón de cargo público: certificado ou documento equivalente emitido polo órgano administrativo competente.

- Por cesamento cuxa facultade corresponde a outra persoa xurídica: certificado ou documento equivalente coas firmas lexitimadas notarialmente.

- Outras causas de cesamentos: certificado da acta da reunión do padroado na que se adoptou o acordo, expedido pola persoa titular da secretaría co visto e prace da persoa titular da presidencia.

DELEGACIÓNS E APODERAMENTOS

- Delegación de facultades do padroado nalgún dos seus membros: escritura pública na que se detallen as facultades, funcións e competencias delegadas.

- Apoderamentos: escritura pública na que conste as facultades outorgadas polo padroado, de conformidade co certificado do acordo que conste na acta da correspondente reunión.

- Revogación da delegación e dos apoderamentos: escritura pública na que conste tal circunstancia.

FUSIÓN, ESCISIÓN OU EXTINCIÓN

- Fusión:

·         Con carácter previo: solicitude de cualificación ao protectorado, achegando o informe xustificativo da fusión e os estatutos da nova fundación (non suxeito a pago de taxa).

·         Escritura pública que inclúa a cualificación indicada no parágrafo anterior, os certificados dos acordos adoptados polos padroados, a estrutura xurídica da operación de fusión, o balance no momento de acordarse, unha memoria explicativa da súa incidencia no cumprimento dos fins fundacionais, os estatutos da fundación resultante e a identificación dos membros do primeiro padroado.

- Escisión:

·         Con creación dunha nova fundación

§  Con carácter previo: comunicación ao protectorado, achegando o acordo motivado do padroado, o informe xustificativo da escisión e o cumprimento do previsto na Lei de Fundacións de Interese Galego (non suxeito a pago de taxa).

§  Escritura pública que inclúa o acordo do padroado e os requisitos indicados na Lei de Fundacións de Interese Galego.

·         Con transmisión do escindido a outra/s fundación/s xa existente/s

§  Con carácter previo: solicitude de autorización ao protectorado, achegando o certificado do acordo aprobatorio do padroado, o informe xustificativo e o patrimonio incluído (non suxeito a pago de taxa).

§  Escritura pública outorgada por todas fundacións participantes na escisión que inclúa a autorización do protectorado e o sinalado no parágrafo anterior.

- Extinción:

·         Por expiración do prazo polo que foi constituída: comunicación ao protectorado do acordo do padroado sobre o inicio do procedemento de liquidación.

·         Por realizarse integramente o fin fundacional ou por imposibilidade material ou xurídica para a súa realización

§  Con carácter previo: solicitude de ratificación ao protectorado, achegando o certificado do acordo do padroado, a memoria xustificativa da concorrencia dunha das causas de extinción (se fora por causa de imposibilidade material haberá que xustificar, ademais, a improcedencia ou imposibilidade de modificar os estatutos ou de levar a práctica un proceso de fusión sempre que o fundador non o prohibise), as contas na data en que se adoptou o acordo de extinción e o proxecto de distribución de bens e dereitos resultantes da liquidación (non suxeito a pago de taxa).

§  Escritura pública no que conste, ademais da ratificación do protectorado, o indicado no parágrafo anterior.

ALLEAMENTO E GRAVAME

Certificación do acordo do padroado especificando a identidade e descrición do obxecto do acordo, así como a súa valoración económica, se é o caso; e unha memoria explicativa das razóns que o xustifican, ademais dun pronunciamento expreso sobre a viabilidade económico-financeira da fundación.

OUTROS ACTOS SUXEITOS A INSCRICIÓN

- Modificación da dotación: 

·         Escritura pública na que conste a realidade da achega, así como a manifestación da vontade do aportante de integración na dotación ou, na súa falta, o acordo do padroado sobre o réxime aplicable á achega efectuada.

·         Certificado de depósito da cantidade correspondente a nome da fundación nunha entidade de crédito, no caso de que a achega fose en cartos; ou descrición de bens e dereitos xuntamente coa taxación realizada por un experto independente, no caso das achegas non pecuniarias.

- Constitución, modificación supresión de comisións e outros órganos polo padroado, así como o nomeamento e cesamento dos seus membros: escritura pública que indique o acordo do padroado e as súas competencias, facultades e funcións (constitución ou modificación) e o nomeamento e aceptación expresa dos seus membros, a través de calquera das formas establecidas na Lei de Fundacións de Interese Galego.

- Nomeamento e cesamento da xerencia da fundación: escritura pública que indique o acordo do padroado e as súas competencias, facultades e funcións.

- Liquidación e baixa rexistral: escritura pública na que conste o contido da acta da sesión do padroado na que se acorde (incluíndo o balance e inventario na data do inicio do procedemento de liquidación); a documentación referida á adxudicación do haber resultante; e os documentos contables referidos ao peche da contabilidade.

ANOTACIÓNS DE CALQUERA CLASE NOS EXPEDIENTES

- Autocontratación de patróns: certificado do acordo do padroado polo que se decide a realización do negocio xurídico, incluíndo o custo máximo anual que supoñerá para a fundación, así como que non existe disposición en contra da persoa fundadora.

- Outras anotacións e subministración de datos: mediante o procedemento indicado para todas as inscricións/anotacións.

CERTIFICACIÓNS OU INFORMACIÓN DO REXISTRO

Mediante solicitude a través do modelo normalizado PR750A dispoñible na Sede electrónica.

EXPEDICIÓN DE LISTAXES INSCRITAS

Mediante solicitude a través do modelo normalizado PR750A dispoñible na Sede electrónica.

EXPEDICIÓN DE COPIAS DE ESTATUTOS

Mediante solicitude a través do modelo normalizado PR750A dispoñible na Sede electrónica.

DILIXENCIADO DE LIBROS

En formato dixital (pdf). Non é admisible a presentación de libros físicos.

PRESENTACIÓN DE DOCUMENTACIÓN (non suxeita ao pago de taxas)

- Contas anuais: certificado do acordo do padroado de aprobación das contas; e o balance, a memoria e a conta de resultados redactados, conforme aos modelos aprobados no Real decreto 1491/2011, do 24 de outubro, polo que se aproban as normas de adaptación do Plan Xeral de Contabilidade ás entidades sen fins lucrativos e o modelo de plan de actuación das entidades sen fins lucrativos, de conformidade co establecido na Resolución do 26 de marzo  de 2013, do Instituto de Contabilidade e Auditoría de Contas, pola que se aproba o Plan de Contabilidade das entidades sen fins lucrativos.

Pode consultar toda a información e os modelos de contas na seguinte ligazón https://conselleriadepresidencia.xunta.gal/es/fundacions/contas-plan-libros

- Plan de actuación: certificado do acordo do padroado de aprobación do plan e o plan redactado conforme aos modelos aprobados no Real decreto 1491/2011, do 24 de outubro, polo que se aproban as normas de adaptación do Plan Xeral de Contabilidade ás entidades sen fins lucrativos e o modelo de plan de actuación das entidades sen fins lucrativos.

Pode consultar toda a información e os modelos do plan na seguinte ligazón https://conselleriadepresidencia.xunta.gal/es/fundacions/contas-plan-libros

PRESENTACIÓN DE SOLICITUDES

•      As solicitudes presentaranse obrigatoriamente por medios electrónicos a través do formulario normalizado PR750A dispoñible na Sede electrónica da Xunta de Galicia.

•      Para a presentación electrónica poderá empregarse calquera dos mecanismos de identificación e firma admitidos pola Sede electrónica da Xunta de Galicia, incluído o sistema de usuario e clave Chave365 ( https://sede.xunta.gal/tramites-e-servizos/chave365 ).

•      Non será admitida a presentación presencial da documentación. Neste caso requiriráselle para que, no prazo de 10 días, a emende a través da súa presentación electrónica. Para estes efectos, considerarase como data de presentación da solicitude aquela en a que fose realizada a emenda, conforme ao artigo 68.4 da Lei 39/2015, do 1 de outubro, do procedemento administrativo común das Administracións Públicas.

•      Os documentos orixinais para que teñan dita condición deben ser copias electrónicas auténticas ou estar asinados dixitalmente. Non son válidas as copias nin os documentos escaneados.

Copias electrónicas auténticas 

o    De non dispoñer de documentos asinados dixitalmente, con carácter previo á presentación electrónica da súa solicitude, pode dixitalizar os documentos asinados manualmente e obter unha copia auténtica.

o    Nas oficinas de atención á cidadanía e do rexistro xeral da Xunta de Galicia (A Coruña, Lugo, Ourense, Pontevedra, Vigo, Ferrol e Santiago de Compostela) poderá obter unha copia electrónica auténtica da documentación orixinal en papel, previo pago da correspondente taxa.

Firma dixital do documento

o    Para a firma dixital de documentos poderase utilizar, entre outros, o seguinte sistema:

- Autofirma: permite a execución de operacións de firma de ficheiros locais en contornas de escritorio. Poderá descargar o cliente de autorfirma desde a ligazón: https://sede.xunta.gal/axuda/necesita-axuda/axuda-tecnica/autofirma

REPRESENTACIÓN:

·         A representación pode acreditarse mediante calquera medio válido en Dereito que deixe constancia fidedigna da súa existencia, entre outros, poderá utilizar o modelo dispoñible na Sede https://sede.xunta.gal/ficheiros/modelos-normalizados/Representacion-C.pdf e anexalo á solicitude.

COMPROBACIÓN DE DATOS

Os documentos relacionados serán obxecto de consulta ás Administracións públicas. No caso de que as persoas interesadas se opoñan a esta consulta, deberán indicalo no cadro correspondente e achegar unha copia dos documentos.

• DNI o NIE da persoa solicitante

CONSENTIMENTO PARA A COMPROBACIÓN DE DATOS

A persoa interesada autoriza a consulta a outras administracións públicas dos seguintes datos. De non autorizar a consulta, deberá achegar o documento correspondente.

• NIF da entidade solicitante

Prazo de resolución:

Seis meses, cando se trate da primeira inscrición, modificación ou nova redacción dos estatutos, fusión, escisión e extinción da fundación, e tres meses para os restantes casos.

Sentido do silencio:

Positivo