Inscrición de asociacións sen ánimo de lucro: constitución e modificacións sucesivas.

As asociacións son agrupacións de persoas constituídas para realizar actividades colectivas de forma estable, organizadas democraticamente e sen ánimo de lucro.

O dereito fundamental de asociación, recoñecido no artigo 22 da Constitución e desenvolvido mediante a Lei Orgánica 1/2002, do 22 de marzo, reguladora do Dereito de Asociación, constitúe un fenómeno sociolóxico e político, como tendencia natural das persoas e como instrumento de participación, respecto ao cal os poderes públicos non poden permanecer a marxe.

As asociacións permiten aos individuos recoñecerse nas súas conviccións, perseguir activamente os seus ideais, cumprir tarefas útiles, encontrar o seu posto na sociedade, facerse oír, exercer algunha influencia e provocar cambios.

Ao organizarse, os cidadáns dótanse de medios máis eficaces para facer chegar a súa opinión sobre os diferentes problemas da sociedade a quen toma as decisións políticas. Fortalecer as estruturas democráticas na sociedade revirte no fortalecemento de todas as institucións democráticas e contribúe a preservación da diversidade cultural.

A crecente importancia que as asociacións teñen no tráfico xurídico aconsella, como garantía de quen entre no dito tráfico, que se tome como punto de referencia, en relación co seu réxime de responsabilidade, o momento en que se produce a inscrición no Rexistro correspondente.

Esta mesma garantía fai necesaria a regulación de extremos importantes no tráfico xurídico, como son o contido da acta fundacional e dos Estatutos, a modificación, disolución e liquidación das asociacións, as súas obrigas documentais e contables, e a publicidade da identidade dos membros dos órganos de dirección e administración.

A consecuencia da inscrición no Rexistro será a separación entre o patrimonio da asociación e o patrimonio dos asociados, sen prexuízo da existencia, e posibilidade de esixencia, da responsabilidade de aqueles que, cos seus actos ou omisións, causen a asociación ou a terceiros danos ou prexuízos.

As solicitudes de inscrición presentaranse no rexistro que corresponda segundo o ámbito territorial da asociación:

-    As de ámbito autonómico, ante o Rexistro Central de Asociacións dependente da Secretaría Xeral Técnica da Consellería de Presidencia, Xustiza e Turismo.

-  As de ámbito provincial, ante o Rexistro provincial dependente da respectiva Xefatura Territorial da Consellería de Presidencia, Xustiza e Turismo.

O prazo de inscrición no correspondente Rexistro será de tres meses dende a data en que a solicitude tivera entrada no rexistro electrónico da Administracion competente para a súa tramitación. Transcorrido ese prazo sen notificación expresa da resolución, poderase entender estimada por silencio administrativo.

Asociacións.

Prazo de presentación: ABERTO

Neste Rexistro inclúense todas as asociacións que non teñan fins de lucro e que non estean sometidas a un réxime asociativo específico.

Son asociacións sometidas a un réxime asociativo específico: os partidos políticos; os sindicatos e as organizacións empresariais; as igrexas, confesións e comunidades relixiosas; as federacións deportivas; as asociacións de consumidores e usuarios; así como calquera outra regulada por leis especiais.

Quedan excluídas deste Rexistro e do ámbito de aplicación da Lei Orgánica 1/2002, do 22 de marzo, as comunidades de bens e propietarios e as entidades que se rexan polas disposicións relativas ao contrato de sociedade, cooperativas e mutualidades, así como as unións temporais de empresas e as agrupacións de interese económico.

• Inscrición do acordo de constitución ( 30.39.01)
• Inscrición da xunta directiva ( 30.39.02)
• Inscrición do acordo de disolución ( 30.39.03)
• Inscrición da modificación de estatutos, da transformación ou da fusión ( 30.39.04)
• Inscrición de apertura, cambio e peche de delegacións ou establecementos ( 30.39.05)
• Inscrición de federación, confederación e unión de asociacións ( 30.39.06)
• Inscrición de incorporación/separación de asociacións a unha federación ou unión de asociacións; e incorporación/seperación de federacións a unha confederación ( 30.39.07)
• Copia de estatutos ( 30.39.08)
• Copia doutros documentos depositados no Rexistro e obtención de información, certificacións ou listaxes ( 30.39.09)
• Anotacións de calquera clase nos expedientes ou subministración de datos non incluídos nos apartados anteriores ( 30.39.10)

Pode realizar o pago destas taxas na Oficina Virtual Tributaria.

Documentación para a presentación.

EN TODAS AS INSCRICIÓNS:

•  Solicitude modelo PR308A

•  Autorización para a consulta no Sistema de Verificación de Datos de Identidade, no caso de non presentar a copia do NIF do solicitante e do DNI/NIF do representante (Anexo II).

•  Documento acreditativo da representación, no seu caso.

•  Xustificante de pagamento da taxa correspondente.

E segundo o tipo de solicitude:

INSCRICIÓN DE ASOCIACIÓNS/FEDERACIÓNS/CONFEDERACIÓNS.

•  Acta de constitución asinada por todas as persoas promotoras .

•  Estatutos asinados por todas as persoas promotoras.

•   Autorización para a comprobación de datos de identidade das persoas promotoras (anexo II).

•  No caso de persoas xurídicas promotoras, deben presentar certificación do acordo do órgano competente para constituír a asociación e da designación da persoa física representante.

Pode consultar toda a información e os modelos de documentos para inscribir asociacións en: https://cpxt.xunta.gal/asociacions/constitucion

Pode consultar toda a información e os modelos de documentos para inscribir federacións e confederacións en: https://cpxt.xunta.gal/asociacions/federacions

INSCRICIÓN DA MODIFICACIÓN DE ESTATUTOS.

•  Acta ou certificación expedida polo/a secretario/a co visto e prace do/a presidente/a, do acordo adoptado pola asemblea xeral, na que conste a relación dos artigos modificados e a data da aprobación.

•  Novos estatutos asinados polo/a secretario/a e o/a presidente/a, acompañados dunha dilixencia final que faga constar que os estatutos foron redactados coa inclusión das modificacións acordadas na asemblea xeral e a data na que se adoptou o acordo.

Pode consultar toda a información e os modelos de documentos en: https://cpxt.xunta.gal/asociacions/modificacion-de-estatutos

INSCRICIÓN DA XUNTA DIRECTIVA OU ÓRGANO DE REPRESENTACIÓN.

•  Acta ou certificación expedida polo/a secretario/a co visto e prace do/a presidente/a, do acordo adoptado polo órgano competente para a designación das persoas titulares da xunta directiva, na que conste: data do nomeamento, sinaturas das persoas titulares entrantes e reelixidas e, no seu caso, das saíntes. De non poder aportarse a sinatura das saíntes, acompañarase xustificación suficiente de tal circunstancia.

•  Autorización para a comprobación de datos de identidade das persoas titulares da xunta directiva (anexo II).

Pode consultar toda a información e os modelos de documentos en: https://cpxt.xunta.gal/asociacions/modificacion-xunta-directiva

INSCRICIÓN DE APERTURA/PECHE DELEGACIÓN.

•  Acta ou certificación do acordo adoptado polo órgano competente, na que conste a apertura ou peche de delegacións, a súa data, e o domicilio social das delegacións.

Pode consultar toda a información e os modelos de documentos en: https://cpxt.xunta.gal/asociacions/apertura-peche-delegacions

INSCRICIÓN DE INCORPORACIÓN/SEPARACIÓN DUNHA ASOCIACIÓN NUNHA FEDERACIÓN, OU DUNHA FEDERACIÓN NUNHA CONFEDERACIÓN.

•  Acta ou certificación do acordo adoptado polo órgano competente da federación/confederación.

•  Acta ou certificación do acordo da asociación/federación que se incorpora.

Pode consultar toda a información e os modelos de documentos en: https://cpxt.xunta.gal/asociacions/federacions

INSCRICIÓN DE TRANSFORMACIÓN DE ASOCIACIÓNS.

•  Acta ou certificación do acordo da asemblea xeral, expresando o motivo da transformación: por modificación do ámbito territorial ou por cambio de réxime xurídico, na que conste a composición do órgano de representación.

•  Novos estatutos asinados polo/a secretario/a e o/a presidente/a, acompañados dunha dilixencia final que faga constar que os estatutos foron redactados coa inclusión das modificacións acordadas na asemblea xeral e a data na que se adoptou o acordo.

•  Autorización para a comprobación de datos das persoas titulares da xunta directiva (anexo II).

Pode consultar toda a información e os modelos de documentos en: https://cpxt.xunta.gal/asociacions/transformacion

INSCRICIÓN DE FUSIÓN DE ASOCIACIÓNS.

Por absorción (no caso dunha asociación que absorbe a outras):

•  Acta ou certificación dos acordos das asembleas xerais das asociacións afectadas, nas que consten os respectivos acordos de fusión e as datas de aprobación, con indicación de que a fusión se aprobou conforme aos estatutos.

•  Novos estatutos ou, no seu caso, certificación na que conste que seguen vixentes os estatutos da asociación absorbente.

Por constitución dunha nova asociación (no caso de que se constitúa unha nova asociación):

•  Acta ou certificación dos acordos das asembleas xerais das asociacións afectadas, nas que consten os respectivos acordos de fusión, e as datas de aprobación con indicación de que a fusión se aprobou conforme aos estatutos.

•  Acta ou certificación da composición da xunta directiva ou órgano de representación da asociación resultante.

•  Estatutos da nova asociación asinados polas persoas representantes das asociacións promotoras da fusión.

•  Autorización para a comprobación dos datos de identidade das persoas promotoras da fusión (anexo II).

Pode consultar toda a información e os modelos de documentos en: https://cpxt.xunta.gal/asociacions/fusion

INSCRICIÓN DE DISOLUCIÓN.

•  Acta ou certificación do acordo de disolución adoptado pola asemblea xeral, na que conste o cese das persoas titulares da xunta directiva ou órgano de representación.

•  Documento xustificativo da aplicación do patrimonio remanente, no seu caso, ou indicación de que carece de patrimonio.

Pode consultar toda a información e os modelos de documentos en: https://cpxt.xunta.gal/asociacions/disolucion-baixa

SOLICITUDES DE CERTIFICACIÓNS OU INFORMACIÓN REXISTRAL:

•    Solicitude modelo PR308A

•    Xustificante de pagamento da taxa (código 30.39.09)

PRESENTACIÓN DE SOLICITUDES.

•  As solicitudes presentaranse obrigatoriamente por medios electrónicos a través do formulario normalizado dispoñible na sede electrónica da Xunta de Galicia,  https://sede.xunta.gal. De conformidade co artigo 68.4 da Lei 39/2015, do 1 de outubro, do procedemento administrativo común das Administracións Públicas, se algunha das persoas interesadas presenta a súa solicitude presencialmente, requiriráselle para que a emende a través da súa presentación electrónica. Para estes efectos, considerarase como data de presentación da solicitude aquela na que fose realizada a emenda. Para a presentación electrónica poderá empregarse calquera dos mecanismos de identificación e sinatura admitidos pola sede electrónica da Xunta de Galicia, incluído o sistema de usuario e clave Chave365 ( https://sede.xunta.gal/chave365 ) .

•  Os documentos orixinais requiridos para a tramitación deste procedemento deberán ser: documentos orixinais asinados dixitalmente ou copias electrónicas auténticas* dos documentos asinados en papel, non sendo válidos documentos escaneados.

•  Copias electrónicas auténticas.

De non dispoñer de documentos asinados dixitalmente, con carácter previo á presentación electrónica da súa solicitude, pode dixitalizar o documento/s asinado/s manualmente e obter unha copia auténtica.

Nas oficinas de atención á cidadanía e do rexistro xeral da Xunta de Galicia (A Coruña, Lugo, Ourense, Pontevedra, Vigo, Ferrol e Santiago de Compostela) poderá obter unha copia electrónica auténtica da documentación orixinal en papel, previo pago da correspondente taxa.

• Sinatura de documentos.

Para a sinatura dixital de documentos poderanse utilizar, entre outros, o seguinte sistema de sinatura:

o Autofirma : permite a execución de operacións de firma de ficheiros locais en entornos de escritorio. Poderá descargar o cliente de autorfirma dende o enlace: https://sede.xunta.gal/axuda/necesita-axuda/axuda-tecnica/autofirma?langId=es_ES.

COMPROBACIÓN DE DATOS

• DNI/NIE da persoa representante.

• NIF da entidade solicitante.

• Inicio
• Autorización para a comprobación de datos de identidade das persoas promotoras (Anexo II)
• Información cobertura impreso de taxas
• Códigos taxas asociacións

Prazo de resolución: Tres meses

Sentido do silencio: Positivo