Poderán ser beneficiarias destas axudas:

1. Entidades locais.

a) Os concellos situados na área de influencia socioeconómica do parque nacional (Bueu, Ribeira, Vilagarcía de Arousa e Vigo).

2. Entidades empresariais.

a) As entidades empresariais que teñan a consideración de pequenas e medianas empresas, cuxa sede social estea radicada na área de influencia socioeconómica do Parque Nacional Marítimo-Terrestre das Illas Atlánticas e cuxa actividade principal se desenvolva nesta área. Incluídas as empresas de inserción laboral (EIL) e de centros especiais de emprego.

b) As persoas empresarias que teñan a condición de autónomas ou as comunidades de bens nos seguintes supostos:

1º. Cando a súa residencia e actividade se localicen na área de influencia socioeconómica do parque nacional.

2º. Cando residan na área de influencia socioeconómica do parque nacional e pretendan implantar a súa actividade nela.

3º. Cando non residan na dita área de influencia socioeconómica, pero veñan realizando no interior do parque nacional actividades produtivas de carácter artesanal ligadas ao sector primario, sempre que tales actividades fosen especificamente reguladas nos instrumentos de planificación.

3. Persoas físicas: as persoas físicas residentes e empadroadas na área de influencia socioeconómica do parque nacional, ou titulares dunha concesión, segundo o Decreto 174/2010, que regula o procedemento para o outorgamento das concesións da illa de Ons e que estean ao día nas súas obrigas derivadas da súa concesión, e as persoas propietarias dunha vivenda dentro do parque nacional.

4. Institucións sen fins de lucro: as fundacións e asociacións sen ánimo de lucro legalmente constituídas e cuxa sede social ou a dalgunha das súas seccións ou delegacións estea na área de influencia socioeconómica do parque nacional, sempre e cando entre os seus fins estatutarios figure expresamente a realización de actuacións en materia de conservación ou uso sustentable dos recursos naturais, de protección do patrimonio histórico-artístico ou de promoción da cultura tradicional incluídos os centros especiais de emprego.

5. As entidades de dereito público constituídas ao abeiro dalgunha lexislación sectorial en materia de recursos naturais renovables e cuxa actividade estea relacionada co aproveitamento ordenado destes recursos na área de influencia socioeconómica do parque nacional.

En ningún caso poderán ter a condición de beneficiarias aquelas entidades ou persoas que incorran nalgunha das circunstancias previstas nos artigos 10.2 e 3 da Lei 9/2007, do 13 de xuño.

Solicitudes.

1. As solicitudes de subvención realizaranse cubrindo correctamente o modelo que figura no anexo I, dirixiranse á DXPN e irán acompañadas, se for o caso, da documentación administrativa e técnica que se especifica no artigo 12.

2. Consonte o disposto no artigo 68 da Lei 39/2015, do procedemento administrativo común das administracións públicas, se a solicitude de iniciación non reúne os requisitos sinalados, requirirase a persoa interesada para que nun prazo máximo e improrrogable de dez (10) días, emende a falta ou acompañe os documentos preceptivos, con indicación de que, se así non o fixer, se terá por desistida da súa petición, logo da resolución, que deberá ser ditada nos termos previstos no artigo 21 da devandita lei.

3. As solicitudes presentaranse preferiblemente por vía electrónica a través do formulario normalizado dispoñible na sede electrónica da Xunta de Galicia, https://sede.xunta.gal

Para a presentación electrónica das solicitudes poderá empregarse calquera dos mecanismos de identificación e sinatura admitidos pola sede electrónica da Xunta de Galicia, incluído o sistema de usuario e clave Chave 365 (https://sede.xunta.gal/chave365).

A presentación electrónica será obrigatoria para as administracións públicas, as persoas xurídicas, as entidades sen personalidade xurídica, as persoas que exerzan unha actividade profesional para a que se requira colexiación obrigatoria, as persoas traballadoras autónomas, o estudantado universitario, as persoas representantes dalgunha das anteriores e as persoas empregadas das administracións públicas.

De conformidade co artigo 68.4 da Lei 39/2015, do 1 de outubro, do procedemento administrativo común das administracións públicas, se algunha das persoas interesadas obrigadas á presentación electrónica presenta a súa solicitude presencialmente, requiriráselle para que a emende a través da súa presentación electrónica. Para estes efectos, considerarase como data de presentación da solicitude aquela en que fose realizada a emenda.

Aquelas persoas interesadas non obrigadas á presentación electrónica, opcionalmente, poderán presentar as solicitudes presencialmente en calquera dos lugares e dos rexistros establecidos na normativa reguladora do procedemento administrativo común, utilizando o formulario normalizado dispoñible na sede electrónica da Xunta de Galicia.

Documentación complementaria.

1. As persoas interesadas deberan achegar coa solicitude a seguinte documentación:

a) Para toda persoa interesada:

1º. Acreditación da representación da persoa solicitante por calquera medio válido en dereito, se procede.

2º. Memoria descritiva da finalidade para a que se solicita a axuda na que se incluirá a avaliación do impacto de xénero dos proxectos, a argumentación técnica que xustifique que se cumpre o principio de «non causar dano significativo ao ambiente (DNSH)» e do cumprimento da normativa en materia de igualdade. Conterá, como mínimo, a descrición dos traballos ou actividades, os obxectivos ambientais a que contribuirá a actuación, o orzamento detallado en unidades de obra e co IVE desagregado, o prazo aproximado de execución e o calendario, tendo en conta que as actividades subvencionables deben comezar e rematar no exercicio 2025.

3º. Tres ofertas de diferentes persoas que teñan a condición de provedoras, con carácter previo á contratación do compromiso para a prestación do servizo ou a entrega do ben, (agás que polas especiais características dos gastos subvencionables non exista no mercado suficiente número de entidades que o subministren ou presten) no caso en que o gasto subvencionable supere os 40.000,00 €, no caso de obras, ou 15.000,00 € no suposto de subministración de bens de equipamento ou prestación de servizos por empresas de consultoría ou asistencia técnica. As ofertas presentadas para cada gasto deberán cumprir cos seguintes requisitos:

i. Os prezos das unidades de obra das actuacións subvencionables deben axustarse ao valor do mercado.

ii. As ofertas presentadas deberán incluír os mesmos elementos para ser comparables.

iii. En ningún caso poderá fraccionarse un contrato co obxecto de diminuír a contía deste e eludir o cumprimento dos requisitos de contratación e subcontratación establecidos nestas bases.

iv. Deberán proceder de empresas que teñan como obxecto social a fabricación ou a subministración dos bens ou servizos incluídos na oferta.

v. Non poderán proceder de empresas vencelladas entre elas nin coa solicitante, nos termos establecidos pola lexislación de contratos do sector público.

vi. Deberán incluír, como mínimo, o NIF, o nome e o enderezo da empresa ofertante, o nome ou a razón social da solicitante da axuda, a data de expedición e unha descrición detallada dos conceptos ofertados.

vii. Non se considerarán admisibles as ofertas presentadas que non reúnan estes requisitos, o que poderá dar lugar á exclusión como subvencionable do gasto xustificado con esa oferta.

viii. Excepcionalmente, no caso de conceptos subvencionables que polas súas características especiais non exista no mercado suficiente número de entidades que o ofrezan, a moderación de custos poderá xustificarse alternativamente mediante un informe dun taxador, dun perito ou dun organismo público autorizado no cal se determine xustificadamente o seu valor de mercado.

ix. Non se considerarán subvencionables os gastos en que non se xustifique a moderación de custos conforme os criterios e requisitos sinalados nesta liña 3º.

4º. No caso de que a actuación se localice nun lugar concreto, achegarase un plano de situación e detalle deste, sen prexuízo dos demais planos de detalle que exixa a definición técnica da actuación.

5º. No caso de actuacións dos tipos recollidos nos números 1.a) e 1.c) do artigo 6, achegarase un arquivo SIX compatible coa delimitación da zona da actuación.

6º. Se é o caso, acreditación de ter realizadas as comunicacións previas necesarias e/ou solicitadas ou concedidas as licenzas e as autorizacións necesarias para o exercicio da actividade ou a execución das actuacións, segundo corresponda.

7º. No caso de que o terreo obxecto dos traballos sexa propiedade de varias persoas copropietarias deberase presentar:

i. Documento que acredite o consentimento de todas as persoas copropietarias.

ii. Representación da persoa solicitante para realizar a acción obxecto da subvención.

8º. Declaración responsable relativa ao cumprimento do principio de «non causar un prexuízo significativo ao ambiente (DNSH)» (anexo II).

9º. No caso de que a persoa solicitante non sexa titular da propiedade onde se teña previsto executar as actuacións, certificación da persoa titular ou titulares da súa conformidade e dispoñibilidade (anexo III).

10º. Se é o caso, a declaración responsable (anexo IV) recollida no artigo 7.5 desta orde en que se acredite que as actuacións non foron iniciadas antes da presentación da solicitude de axuda.

11º. No caso de que as persoas beneficiarias desenvolvan actividades económicas, acreditarán a súa inscrición no Censo de empresarios, profesionais e retedores da Axencia Estatal da Administración Tributaria, que debe reflectir a actividade económica efectivamente desenvolvida na data de solicitude da axuda.

2. Deberase xuntar, ademais, a seguinte documentación complementaria, dependendo da natureza da persoa beneficiaria:

a) No caso de persoas concesionarias segundo o Decreto de concesións da illa de Ons, a documentación que exprese a dita condición.

b) No caso de persoas arrendatarias, o documento que acredite a condición, así como a manifestación do consentimento, o coñecemento ou non oposición pola persoa propietaria das obras, de acordo co disposto no artigo 30 da Lei 29/1994, de arrendamentos urbanos.

c) Para entidades locais, privadas e institucións sen ánimo de lucro, o documento acreditativo do acordo adoptado pola entidade para efectuar a solicitude de subvención, así como da representación das persoas que a subscriban.

d) No caso de asociacións, o acordo da Xunta de Goberno ou figura similar para solicitar as axudas, e a certificación do concello, ou o documento semellante, que acredite que máis do 50 % das persoas que teñen a condición de socias residen nalgún dos concellos do parque nacional.

e) Para institucións sen ánimo de lucro (fundacións e asociacións): a copia dos seus estatutos.

f) No caso de empresas, persoas autónomas, institucións sen fins de lucro e comunidades de bens: a acreditación de posuír a sede social, ou o domicilio, se é o caso, nalgún concello do parque nacional.

g) No caso de persoas físicas: o certificado de empadroamento.

h) No caso de comunidades de ben, a declaración responsable sobre o importe do investimento, que se aplicará para cada unha das persoas membro da agrupación, expresada en forma de porcentaxe sobre o total, e identificación de cada unha das persoas integrantes mediante o DNI.

3. De conformidade co artigo 28.3 da Lei 39/2015, do 1 de outubro, do procedemento administrativo común das administracións públicas, non será necesario achegar os documentos que xa fosen presentados anteriormente pola persoa interesada ante calquera Administración. Neste caso, a persoa interesada deberá indicar en que momento e ante que órgano administrativo presentou os citados documentos, que serán recollidos electronicamente a través das redes corporativas ou mediante consultas ás plataformas de intermediación de datos ou outros sistemas electrónicos habilitados para o efecto, agás que conste no procedemento a oposición expresa da persoa interesada.

4. De forma excepcional, se non se poden obter os citados documentos, poderá solicitarse novamente á persoa interesada a súa achega.

5. A documentación complementaria presentarase preferiblemente por vía electrónica.

a) A presentación electrónica será obrigatoria para os suxeitos obrigados á presentación electrónica da solicitude. Se algunha das persoas interesadas presenta a documentación complementaria presencialmente, será requirida para que a emende a través da súa presentación electrónica. Para estes efectos, considerarase como data de presentación aquela en que fose realizada a emenda.

b) Aquelas persoas non obrigadas á presentación electrónica, opcionalmente, poderán presentar a documentación complementaria presencialmente en calquera dos lugares e rexistros establecidos na normativa reguladora do procedemento administrativo común.

c) Sempre que se realice a presentación de documentos separadamente da solicitude deberase indicar o código e o órgano responsable do procedemento, o número de rexistro de entrada da solicitude e o número de expediente, se se dispón del.

d) No caso de que algún dos documentos que se van presentar de forma electrónica supere os tamaños máximos establecidos ou teña un formato non admitido pola sede electrónica da Xunta de Galicia, permitirase a presentación deste de forma presencial dentro dos prazos previstos e na forma indicada no parágrafo anterior. A información actualizada sobre o tamaño máximo e os formatos admitidos pode consultarse na sede electrónica da Xunta de Galicia.

6. As persoas solicitantes responsabilizaranse da veracidade dos documentos que presenten. Excepcionalmente, cando a relevancia do documento no procedemento o exixa ou existan dúbidas derivadas da calidade da copia, a Administración poderá solicitar, de maneira motivada, o cotexo das copias achegadas pola persoa solicitante, para o que poderán requirir a exhibición do documento ou da información orixinal.

7. A DXPN poderá requirir motivadamente, consonte prevé o artigo 28 da Lei 39/2015, do procedemento administrativo común das administracións públicas, calquera documentación aclaratoria necesaria en relación coas subvencións que se van outorgar, que considere conveniente.

Comprobación de datos.

1. Para a tramitación deste procedemento consultaranse automaticamente os datos incluídos nos seguintes documentos en poder da Administración actuante ou elaborados polas administracións públicas, agás que a interesada se opoña á súa consulta:

a) DNI ou NIE da persoa solicitante.

b) DNI ou NIE da persoa representante.

c) Certificación de titularidade da persoa solicitante.

d) Titularidade dunha concesión segundo o Decreto 174/2010, relativo ás concesións da illa de Ons.

e) Certificado de estar ao día no pagamento coa Seguridade Social.

f) Certificado de estar ao día no pagamento de obrigas tributarias da consellería competente en materia de facenda da Xunta de Galicia.

g) Certificado de inscrición da institución sen ánimo de lucro, no rexistro público correspondente.

h) Certificado de inscrición das asociacións no Rexistro de Asociacións.

i) Consulta de inhabilitacións para obter subvencións e axudas.

j) Consulta de concesión de subvencións e axudas.

k) Consulta de concesións pola regra de minimis.

No caso de que as persoas interesadas se opoñan a esta consulta, deberán indicalo no recadro correspondente habilitado no formulario correspondente e achegar os documentos.

2. Cando así o exixa a normativa aplicable, solicitarase o consentimento expreso da persoa interesada para realizar a consulta de:

a) NIF da entidade solicitante.

b) NIF da entidade representante.

c) Certificado de estar ao día das obrigas tributarias coa Axencia Estatal da Administración Tributaria.

d) Alta no imposto de actividades económicas (IAE).

Excepcionalmente, no caso de que algunha circunstancia imposibilite a obtención dos citados datos, poderase solicitar ás persoas interesadas a presentación dos documentos correspondentes.

Trámites administrativos posteriores á presentación de solicitudes.

A sede electrónica da Xunta de Galicia permite ás persoas interesadas realizar trámites electrónicos, con posterioridade ao inicio do expediente, accedendo á Carpeta cidadá da persoa interesada. Cando as persoas interesadas non resulten obrigadas á presentación electrónica tamén poderán realizarse os ditos trámites presencialmente en calquera dos lugares e dos rexistros establecidos na normativa reguladora do procedemento administrativo común.

Prazo de resolución:

Tres meses

Sentido do silencio:

Negativo

• Fase posterior
• Renuncia (Anexo V)
• Solicitude de pagamento (Anexo VI)