Con fin de actualizar os censos das explotacións gandeiras, o artigo 4.3 do Real Decreto 479/2004, de 26 de marzo, polo que se establece e regula o Rexistro Xeral de Explotacións Gandeiras, esixe que se comuniquen os censos das explotacións á autoridade competente ao menos unha vez ao ano, antes do 1 de marzo de cada ano, facendo referencia ao censo do ano anterior.

Explotacións avícolas.

Segundo o Real Decreto 637/2021, do 27 de xullo, polo que se establecen as normas básicas de ordenación das granxas avícolas (BOE núm. 179, do 28 de xullo de 2021), no seu artigo 19 sobre obrigas dos titulares das explotacións avícolas, establécese que estes deben facilitarlle á autoridade competente antes do 1 de marzo de cada ano, conforme o establecido no artigo 4 do Real decreto 479/2004, do 26 de marzo, a información relativa ao censo dos seus animais.

Os criterios establecidos no Real Decreto 637/2021 para esta declaración censual anual son:

i) Para as explotacións de produción (excepto produción para posta) e as de recría de aves de cría (recrías de futuros reprodutores) e recría de aves de explotación (recrías de poñedoras ou de aves de cebo): o número de animais que se correspondan coa última entrada de aves efectuada entre o 1 de xaneiro e o 31 de decembro do ano anterior ao da comunicación do devandito censo.

ii) Para as explotacións avícolas de selección, multiplicación e produción para posta (poñedoras adultas de ovos de consumo): o censo presente na explotación o 31 decembro do ano anterior ao da comunicación do devandito censo.

iii) Para as incubadoras: o número de ovos incubados ao ano.

A declaración censual anual non é obrigatoria para:

- Explotacións gandeiras especiais de tratantes ou operadores comerciais e centros de concentración de animais, definidas no anexo III do Real decreto 479/2004, do 26 de marzo .

- Explotacións de autoconsumo

- Matadoiros

As declaracións censuais realizadas polos titulares das explotacións avícolas poden ser de dous tipos:

1- Declaración censual anual obrigatoria a realizar antes de 1 de marzo de cada ano, que deberase realizar cos criterios de declaración indicados anteriormente.

2- Declaración censual por calquera outro motivo distinto á declaración censual anual obrigatoria: neste caso a persoa titular declarará o número de aves (ou ovos incubables no caso das incubadoras) presentes na explotación na data concreta da declaración.

Outra información de interese en relación á declaración censual:

•         No caso de que nunha mesma explotación exista máis dunha especie de aves, débese cubrir este formulario MR515D por cada unha delas.

•         No caso de que nunha mesma explotación se utilicen sistemas de cría diferentes, débese cubrir a columna NÚMERO DE AVES do formulario MR515D para cada un dos devanditos sistemas.

•          No caso de ratites (avestruces): cubrirase un único dato na columna NÚMERO DE AVES aínda que na explotación se realice multiplicación de reprodutores e indicarase o censo de aves a 31 de decembro.

•         Outros fins: cubrirase naqueles casos de cría de aves con finalidades distintas aos sectores da produción de carne ou de ovos e indicarase o censo de aves a 31 de decembro.

•         No caso de explotacións dedicadas á produción de ovos de consumo de especies distintas ás galiñas débese cubrir a fila “Produción de ovos”.

• Solicitude segundo o Anexo.