Establecer as bases reguladoras e efectuar a convocatoria para o ano 2025 para a concesión, en réxime de concorrencia competitiva, de subvencións destinadas a apoiar a cooperación en actividades de información e promoción dos produtos agrícolas e alimenticios galegos cubertos por un réxime de calidade, realizadas por agrupacións de produtores, correspondentes á intervención 7132 “Cooperación para a promoción dos produtos agrícolas e alimenticios en réximes de calidade”, subintervención 7132.03 “Promoción réximes de calidade” (Promoción tipo 3), do Plan Estratéxico da PAC 2023-2027, de conformidade coas disposicións aplicables á axuda ao desenvolvemento rural a través do Fondo Europeo Agrícola de Desenvolvemento Rural.

A concesión das subvencións reguladas nesta resolución pretende contribuír á consecución dos seguintes obxectivos:

a) Mellorar a información ás persoas consumidoras sobre a existencia e as especificacións dos produtos agroalimentarios amparados por réximes de calidade.

b) Favorecer a penetración nos mercados dos alimentos con calidade diferenciada e inducir ao seu consumo.

c) Mellorar a posición dos agricultores na cadea de valor.

Para os efectos desta liña de axudas entenderase por:

a) Agrupación de produtores. Agrupacións ou organizacións de produtores agroalimentarios, asociacións sen ánimo de lucro ou entidades instrumentais que estean constituídas como órganos de xestión de figuras de calidade de produtos agroalimentarios, que cooperan entre si para a información e promoción dos produtos agrícolas e alimenticios nos réximes de calidade definidos no apartado b). En particular, teñen esa consideración os consellos reguladores que xestionen produtos do sector agroalimentario acollidos a un réxime de calidade e as entidades asociativas sen ánimo de lucro en que participan produtores -entendidos como tales os titulares de explotacións agrarias ou de instalacións de transformación- implicados nalgún réxime de calidade dos alimentos. No caso das ditas entidades asociativas, os seus asociados terán que ser maioritariamente produtores vinculados ao programa de calidade de que se trate e o obxecto social da entidade terá que incluír a realización de actividades relacionadas directamente coa información aos consumidores ou a promoción do produto de calidade a que se refira o programa.

b) Réxime de calidade. Teñen esa consideración:

1º. As denominacións de orixe protexidas, as indicacións xeográficas protexidas e as especialidades tradicionais garantidas do ámbito agroalimentario (Regulamento (UE) 2024/1143)

2º. A produción agraria ecolóxica (Regulamento (UE) 2018/848)

3º. A produción artesanal de alimentos (Decreto 174/2019).

c) Proxecto de información e promoción. Conxunto de accións cuxo alcance sexa axeitado para contribuír a aumentar a información sobre os produtos en cuestión, suficientemente elaborado para avaliar a súa coherencia, conformidade e rendibilidade. O proxecto conterá, cando menos, a situación inicial de partida e os integrantes do proxecto, as fases e obxectivos para o desenvolvemento de accións e actividades de información e promoción a realizar, e o detalle das actuacións, incluíndo os investimentos e gastos asociados e a acreditación da viabilidade técnica, económica e financeira. Unha mesma agrupación non poderá presentar máis dun proxecto en cada convocatoria anual e, para garantir un mínimo de impacto, os proxectos atendibles contemplarán un investimento non inferior a 60.000 euros.

d) Acción. Conxunto de operacións relacionadas que son necesarias para unha actuación promocional concreta. Tería esa consideración, sen ánimo exhaustivo, a organización ou participación nunha feira; unha campaña de publicidade nos puntos de venda ou a través doutras canles (medios de comunicación, soportes publicitarios, utilización de tecnoloxías da información e a comunicación, etc.), un estudo de mercado, técnico ou de avaliación do impacto das actividades sobre o público ou sobre a comercialización de cada produto; unha actuación para a formación e a promoción mediante a realización de cursos, seminarios, campañas, xornadas informativas, concursos, catas, degustacións e outros eventos, relativos ao produto e ao réxime de calidade que os ampara; ou unha misión comercial directa ou inversa.

e) Actividades. Son as actuacións realizadas no marco dunha acción.

Serán subvencionables as actividades das agrupacións de produtores enmarcadas en proxectos de cooperación dirixidos a inducir o consumidor a adquirir produtos incluídos no marco de réximes de calidade.

Poderán ser beneficiarias destas axudas as agrupacións de produtores que cooperen entre si para a información e promoción dos produtos agrícolas e alimenticios amparados por un réxime de calidade.

— Quedan excluídas da axuda as seguintes actuacións:

a) A promoción de marcas comerciais.

b) As accións que se desenvolvan fóra do mercado interior da Unión Europea.

c) Aquelas actividades que induzan o consumidor a comprar un produto pola súa orixe particular, excepto no caso das denominacións de orixe e das indicacións xeográficas reguladas no  Regulamento (UE) 2024/1143 do Parlamento Europeo e do Consello do 11 de abril de 2024. Non obstante, poderá indicarse a orixe dun produto sempre que tal indicación quede subordinada á mensaxe principal.

— Como requisito previo á realización das actividades que se pretende que sexan subvencionadas, o material piloto informativo, promocional e publicitario que se utilice deberá ser remitido á Axencia Galega da Calidade Alimentaria para verificar a súa adecuación á normativa comunitaria.

— Non serán subvencionables as campañas publicitarias e outras accións de promoción que inclúan mensaxes sexistas e discriminatorias para as mulleres

— Non poderán ser obxecto de subvención actividades xa realizadas antes da data de presentación da solicitude de subvención. Con todo, de forma excepcional e sempre que sexa debidamente acreditado, poderán admitirse traballos preparatorios de accións do proxecto, nos casos en que a data da convocatoria ou o prazo de presentación da solicitude dificulten a adaptación da actividade subvencionada aos citados períodos.

— Cando a agrupación de produtores solicitante da axuda sexa un consello regulador, como entidade xestora do correspondente réxime de calidade esixirase que todas as accións de promoción que se presenten se enmarquen dentro dun plan de promoción anual ou plurianual no que se detallen os obxectivos a perseguir no período ao que se refira e a estratexia e as accións deseñadas para acadalos. Os gastos relacionados cos estudios de mercado precisos para a elaboración do dito plan de promoción serán tamén elixibles.

— No caso de que no proxecto de cooperación presentado por una agrupación se prevexa algunha acción consistente na participación nalgunha feira, certame ou outro evento no que tamén participe a Axencia Galega da Calidade Alimentaria, o proxecto debe contemplar a cooperación coa Axencia en aras a contribuír de mellor forma ao obxectivo da promoción coherente dos diferentes réximes de calidade de Galicia.

— Para os efectos da moderación dos custos, no anexo III recóllense importes máximos de gasto subvencionable para determinadas actuacións relacionadas coas actividades que poden beneficiarse das axudas reguladas nesta resolución.

— Os gastos derivados da cooperación e coordinación do proxecto de promoción non poderán ser superiores ao 10 % do orzamento do proxecto.

— No caso de asistencia a feiras e certames comerciais, no proxecto de cooperación poderase incluír os gastos correspondentes á contratación dun máximo de dúas persoas para a atención do posto ou, de ser o caso, os gastos de desprazamento, aloxamento e manutención dun máximo de dúas persoas por entidade solicitante. No caso de accións desenvolvidas no estranxeiro, poderá admitirse adicionalmente o gasto relativo a unha persoa de atención ao público que poida actuar de intérprete.

— Nas accións consistentes na asistencia a feiras e certames comerciais, o gasto elixible máximo será de 30.000 euros cando se trate dun evento realizado no territorio da comunidade autónoma, de 40.000 euros se se realizase no resto do territorio peninsular e de 60.000 euros no caso de ser fóra do territorio peninsular.

No caso de asistencia a feiras de dous ou máis consellos reguladores de forma conxunta baixo un pavillón común da Comunidade Autónoma de Galicia, non se terán en conta os límites establecidos no parágrafo anterior. Nese caso, o gasto para o deseño e construción do posto poderá superar os custos de referencia indicados, pero non será superior a 250 euros por metro cadrado ocupado no caso de feiras celebradas en España e de 550 euros por metro cadrado en feiras celebradas fóra de España.

— No caso de accións consistentes na organización de feiras ou certames comerciais, o gasto elixible non superará os 60.000 euros por cada evento.

— Nas accións consistentes en estudos técnicos, estudos de mercado, estudos de concepción e creación de produtos, o gasto elixible non superará os 20.000 euros por estudo. Non obstante, cando se trate dun estudo de mercado para a realización dunha estratexia de promoción global do réxime de calidade do que se trate, o gasto subvencionable poderá chegar ata 90.000 euros. Neste caso, só se poderá aprobar un estudo de mercado en todo o período de aplicación desta subintervención do PEPAC.

Documentación para a presentación.

Todas as accións de información e promoción que presente unha mesma agrupación incluiranse nun único proxecto que, para garantir un mínimo de impacto, contemplará un investimento non inferior a 60.000 euros.

As solicitudes presentaranse en formulario dirixido á Axencia de acordo co modelo que figura no anexo I da resolución, acompañado da seguinte documentación complementaria:

a) Memoria explicativa do proxecto de cooperación na que se recollan, cando menos, os seguintes aspectos:

1º Produtoras e produtores que participan no proxecto.

2º Situación inicial de partida.

3º Obxectivos que se pretenden acadar.

4º. Descrición detallada das accións que se van desenvolver: descrición de cada unha das actividades previstas que vai realizar a agrupación. Detallaranse e describiranse ao máximo todas e cada unha das actividades.

5º Acreditación da viabilidade técnica, económica e financeira do proxecto.

6º. Relación de efectivos humanos e medios materiais de que se dispón.

7º. Plan cronolóxico dos traballos.

b) Orzamento pormenorizado dos gastos previstos, en que se detallará especificamente o ámbito territorial (Galicia, España, exterior) a que corresponde o gasto de cada partida en cada acción, de non corresponderen todas a un mesmo ámbito xeográfico.

No caso de que no orzamento se imputen gastos de persoal propio, deberá cuantificarse e xustificarse o importe previsto destes gastos para cada acción segundo o que se indica na letra c) do artigo 7.2 e sen prexuízo da excepción que se recolle nel.

c) No caso das solicitudes de agrupacións de produtores que non sexan consellos reguladores, xustificación relativa ao volume de produción certificado dentro do réxime de calidade no ano anterior ao da solicitude das persoas que participan na agrupación.

d) No caso de agrupacións de produtores para as que o imposto do valor engadido non é susceptible de recuperación ou compensación, declaración responsable ou outra documentación acreditativa desta circunstancia.

e) Ademais, no caso de agrupacións de produtores distintas dos consellos reguladores, achegarase a seguinte documentación:

- Copia dos estatutos.

- Relación de persoas inscritas e certificado emitido pola persoa que ostente a secretaría da entidade no cal se indique cales delas participan nun réxime de calidade dos alimentos aos que se refire a letra b) do artigo 3 desta resolución.

- Documentación acreditativa da condición de representante da persoa que asina a solicitude.

Prazo de resolución:

Cinco meses

Sentido do silencio:

Negativo