2. Estas bases, así como a guía de procedementos e servizos, estarán dispoñibles no seguinte enderezo web https://sede.xunta.gal/guia-de-procedementos-e-servizos nas dependencias desta axencia e na súa páxina web, e tamén quedarán expostas no taboleiro de anuncios da Agadic e debidamente publicadas no Diario Oficial de Galicia (DOG).

3. Todos os trámites administrativos que as persoas interesadas deban realizar durante a tramitación deste procedemento deberán ser realizados electronicamente accedendo á Carpeta cidadá da persoa interesada disponible na sede electrónica da Xunta de Galicia.

4. En cumprimento do disposto no artigo 20 da Lei 38/2003, do 17 de novembro, xeral de subvencións, o texto da convocatoria anual e a información requirida no ordinal oitavo do devandito artigo será comunicado á Base de datos nacional de subvencións (BDNS). A BDNS dará traslado ao Diario Oficial de Galicia do extracto da convocatoria para a súa publicación.

Documentación complementaria necesaria para la tramitación do procedemento

1. Ademais da solicitude (anexo I), os interesados nestas subvencións presentarán, con carácter xeral, a seguinte documentación:

– Se a persoa solicitante é persoa xurídica, certificado do acordo de solicitude da axuda ou da autorización da persoa que a asine en nome da entidade.

– Estatutos rexistrados e escrituras de constitución inscritos no Rexistro Mercantil ou o que corresponda.

– Documentación que acredite suficientemente a representación de quen asina a solicitude.

Non será necesario achegar os documentos que xa fosen presentados anteriormente. Para estes efectos, a persoa interesada deberá indicar en que momento e ante que órgano administrativo presentou os citados documentos. Presumirase que esta consulta é autorizada polas persoas interesadas, salvo que conste no procedemento a súa oposición expresa.

Nos supostos de imposibilidade material de obter o documento, o órgano competente poderá requirirlle á persoa interesada a súa presentación, ou, na súa falta, a acreditación por outros medios dos requisitos a que se refire o documento, con anterioridade á formulación da proposta.

2. As persoas solicitantes deberán enviar a seguinte documentación técnica:

2.1. Documentación relativa á empresa, en que deberá constar:

a) Historial creativo e profesional da empresa produtora en que se detalle as obras audiovisuais producidas.

b) Documentación acreditativa en canto a presenza en festivais e certames de prestixio, nominación e obtención de premios, distribución e exhibición nacional, territorios de comercialización e repercusión en canles de televisión e plataformas da internet, se for o caso.

c) Historial das persoas responsables da produción executiva, no caso de compañías de nova creación.

2.2. Documentación relativa ao proxecto, en que deberá constar:

a) Datos identificativos do proxecto, especificando a versión lingüística orixinal da obra

b) Sinopse argumental cunha extensión máxima de 500 palabras.

c) Guión do proxecto. No caso de series e miniseries de ficción para televisión, deberá achegarse o guión dos dous primeiros capítulos máis un completo tratamento argumental, no caso das series, dos capítulos restantes. No caso das series de animación, presentarase como mínimo o equivalente a 80 minutos de programación máis o tratamento completo dos demais capítulos.

d) Descrición de intencións do proxecto audiovisual en canto ao tratamento formal, deseño da produción, elenco de actores e outros elementos artísticos e técnicos en relación co guión proposto.

e) Plan de traballo que inclúa:

– Cronograma de preprodución, produción e posprodución coas datas de inicio e finalización de rodaxe previstas.

– Lugares de localización.

– Recursos humanos e de produción que intervirán na execución do proxecto (relación nominal ou, de non estar en condicións de detallala, relación dos profesionais dos equipos creativo e artístico e relación de empresas auxiliares). No caso de detallar empresas e profesionais, haberá que achegar as correspondentes cartas de compromiso.

f) Contratos ou cartas de compromiso asinados en que consten as cantidades económicas acordadas con: director, guionista, produtor executivo (segundo proceda), no caso de obras de autoría galega.

g) Historial, facendo especial mención aos traballos previos no ámbito audiovisual dos seguintes profesionais, sempre que se poida acreditar o seu compromiso de participación no proxecto: director, guionista, produtor executivo, actores protagonistas e secundarios, director de fotografía, director artístico, deseñador de personaxes e fondos (animación), compositor da banda sonora orixinal. Contratos asinados ou cartas de compromiso que detallen as cantidades económicas, se os houbese, cos profesionais relacionados. De ser o caso, especificación de si o director ou directora ten a condición de novel e de si a porcentaxe de mulleres entre os profesionais mencionados supera o 50 %. De ser o caso, indicación dos profesionais de orixe galega ou con máis de dous anos de actividade profesional en Galicia cando a vinculación laboral coincida coas funcións que se definen e se teña dado en máis de dous proxectos audiovisuais ou baixo contrato cun mínimo de dúas empresas produtoras diferentes.

h) Estratexia de lanzamento, difusión e márketing nacional e internacional elaborada por unha empresa ou profesional especializado, acompañada polo historial correspondente, de ser o caso.

Se hai empresa de distribución interesada, historial desta. No caso de empresas distribuidoras de recente creación, currículo dos administradores da compañía.

i) Plan de financiamento e documentación xustificativa, de ser o caso, de: subvencións solicitadas e/ou concedidas, contratos ou cartas de interese relativos á explotación da obra en que se detallen as cantidades económicas (vendas ou cesión de dereitos con empresas titulares da explotación de canles de televisión e/ou plataformas da internet, vendas internacionais, dereitos de distribución, outros), acordos de coprodución, acordos de compromisos de investimento privado e achega de fondos propios. Para efectos de acreditación do financiamento, os contratos e cartas de compromiso deberán ter data posterior ao 1 de xaneiro de 2019.

j) Orzamento definitivo segundo os modelos publicados na páxina web da Agadic.

k) Documentación acreditativa de que o proxecto é obra orixinal e de posuír os dereitos suficientes do guión, obra literaria ou calquera outro medio que requira a obtención de dereitos ou opción de compra sobre eles.

l) Contrato ou carta de compromiso dunha emisora de televisión con ampla difusión no territorio galego, no caso da modalidade E. Cando se trate de canles de televisión que non teñan difusión en Galicia, deberá presentarse un contrato en firme.

m) Calquera outra documentación que o solicitante considere pertinente para mellor defensa do proxecto.

2.3. As seguintes declaracións e/ou compromisos responsables, recollidos no anexo I:

a) Declaración de que a entidade solicitante ou, de ser o caso, as empresas que integran a entidade xurídica solicitante, cumpren cos requisitos de produtor independente tal e como establece o artigo 4.n) da Lei 55/2007, do 28 de decembro, do cinema.

b) Que a entidade solicitante é titular dos dereitos de propiedade da obra, de acordo co establecido no artigo 24.2 da Lei 55/2007, do 28 de decembro, do cinema.

c) No caso de obras de autoría galega, declaración responsable en que conste a orixe galega ou a vinculación de actividade profesional no sector audiovisual galego de máis de dous anos de antigüidade de dous dos seguintes profesionais: director, guionista, produtor executivo.

d) Declaración que especifique a lingua orixinal da rodaxe/gravación e en que conste a porcentaxe.

e) Declaración en que conste a porcentaxe de días de rodaxe que se desenvolverá en Galicia.

f) Declaración da porcentaxe de utilización de estudios principais de animación que desenvolven a súa actividade habitual en Galicia (en caso de proxectos de animación).

g) Declaración responsable coa relación de empresas auxiliares que desenvolven a súa actividade en Galicia e interveñen na produción.

h) Declaración responsable que exprese a orixe galega ou a vinculación laboral con Galicia de máis de dous anos de antigüidade de actividade profesional na Comunidade Autónoma cando a vinculación laboral coincida coas funcións que se definen e se teña dado en máis de dous proxectos audiovisuais ou baixo contrato cun mínimo de dúas empresas produtoras diferentes do equipo creativo (director, guionista, produtor executivo, director de produción, director de fotografía, responsable do son directo, compositor da banda sonora orixinal, director artístico, deseñador de personaxes e fondos, montador e outros profesionais creativos que interveñan na produción) e do equipo actoral. De ser o caso, especificación de empresas, proxectos e datas en que se deu a dita vinculación.

i) De ser o caso, declaración en que conste que a obra será a primeira ou segunda longametraxe do director.

j) De ser o caso, declaración en que conste que a dirección da obra estará integramente a cargo dunha muller.

k) De ser o caso, declaración en que conste que a porcentaxe de mulleres que formarán parte do equipo creativo segundo a relación proposta na presente convocatoria será superior ao 50 %.

l) Declaración en que consten as obras, indicando formatos e ano de produción, estreadas e difundidas pola empresa solicitante ou, de ser o caso, pola persoa responsable da produción executiva.

m) Se é o caso, declaración de que o proxecto tivo unha subvención para a escrita de guión ou desenvolvemento de proxectos en anteriores convocatorias da Consellería competente en materia de Cultura, ou da Agadic.

n) De ser o caso, declaración de que se presenta unha estratexia de lanzamento e distribución da obra elaborada e asinada por unha empresa especializada xunto co seu correspondente historial.

o) Declaración en que conste a porcentaxe de financiamento sobre o custo total do proxecto debidamente acreditado.

Calquera outra documentación que o solicitante considere pertinente para a mellor defensa do proxecto.

3. A documentación complementaria deberá presentarse electronicamente. As persoas interesadas responsabilizaranse da veracidade dos documentos que presenten. Excepcionalmente, a Administración poderá requirir a exhibición do documento orixinal para o cotexo da copia electrónica presentada.

Se algunha das persoas interesadas presenta a documentación complementaria presencialmente, requiriráselle para que a emende a través da súa presentación electrónica.

Para estes efectos, considerarase como data de presentación aquela en que fose realizada a emenda.

4. Sempre que se realice a presentación de documentos separadamente da solicitude deberase indicar o código e o órgano responsable do procedemento, o número de rexistro de entrada da solicitude e o número de expediente se se dispón del.

No caso de que algún dos documentos que vai presentar a persoa solicitante ou representante, de forma electrónica, supera os tamaños límites establecidos pola sede electrónica, permitirase a presentación deste de forma presencial dentro dos prazos previstos e na forma indicada no parágrafo anterior. A información actualizada sobre o tamaño máximo e os formatos admitidos pode consultarse na sede electrónica da Xunta de Galicia.

Comprobación dos datos

1. Para a tramitación deste procedemento consultaranse automaticamente os datos incluídos nos seguintes documentos elaborados polas administracións públicas:

– DNI ou NIE da persoa solicitante.

– DNI ou NIE da persoa representante.

– NIF da entidade solicitante.

– Certificado de estar dado de alta no imposto de actividades económicas, na epígrafe/subepígrafe que corresponda, no exercicio actual.

– Certificado de estar ao día nas obrigas tributarias coa AEAT.

– Certificado de estar ao día no pagamento coa Seguridade Social.

– Certificado de estar ao día no pagamento das obrigas coa Comunidade Autónoma.

2. No caso de que as persoas interesadas se opoñan a esta consulta, deberán indicalo no cadro correspondente habilitado no formulario de inicio e achegar os documentos.

3. Excepcionalmente, no caso de que algunha circunstancia imposibilite a obtención dos citados datos, poderase solicitar ás persoas interesadas a presentación dos documentos correspondentes.