A Concesión de subvencións para a promoción da artesanía galega e o fomento da súa comercialización.

O procedemento de concesión destas subvencións tramitarase en réxime de concorrencia competitiva. Así mesmo, quedará suxeito ao réxime de axudas de minimis (agás no caso dos concellos).

Poderán ser beneficiarias das subvencións, sen prexuízo de reuniren os demais requisitos establecidos nestas bases e sempre que nas persoas solicitantes non concorra algunha das circunstancias previstas no artigo 10 da Lei 9/2007, do 13 de xuño, as persoas físicas ou xurídicas, comunidades de bens ou calquera outro tipo de unidade económica ou patrimonio separado sen personalidade xurídica, legalmente constituídas

1. Titulares de obradoiros artesanais, xa sexan persoas físicas ou xurídicas e comunidades de bens, inscritos no Rexistro Xeral de Artesanía de Galicia. No caso de novos obradoiros, poderán solicitar a inscrición no dito rexistro ata o mesmo día en que presenten a solicitude de subvención.

2. Concellos da Comunidade Autónoma de Galicia. Os concellos deberán cumprir co deber de remisión das contas xerais de cada exercicio ao Consello de Contas, nos termos previstos no artigo 4 do Decreto 139/2011, do 6 de outubro, polo que se regulan especialidades nas subvencións ás entidades locais galegas.

Primaranse aqueles concellos que coordinen as súas solicitudes e compartan ou mancomunen obras ou servizos, dando cumprimento así ao Acordo do Consello da Xunta de Galicia do 28 de febreiro de 2013, polo que se aproban os criterios aplicables ás axudas e subvencións destinadas ás entidades locais da Comunidade Autónoma de Galicia para primar proxectos de xestión compartida e incentivar procesos de fusión municipal.

3. Asociacións profesionais e empresariais de persoas artesás de Galicia legalmente constituídas das cales cando menos o 80 % dos obradoiros asociados, cun mínimo de 10, figuren inscritos no Rexistro Xeral de Artesanía de Galicia.

Solicitudes

1. As solicitudes presentaranse obrigatoriamente por medios electrónicos, a través do formulario normalizado, anexo II (solicitude), dispoñible na sede electrónica da Xunta de Galicia, https://sede.xunta.gal

2. De conformidade co artigo 68.4 da Lei 39/2015, do 1 de outubro, do procedemento administrativo común das administracións públicas, se algunha das persoas interesadas presenta a súa solicitude presencialmente, requiriráselle para que a emende a través da súa presentación electrónica. Para estes efectos, considerarase como data de presentación da solicitude aquela na que fose realizada a emenda.

3. Para a presentación electrónica das solicitudes poderá empregarse calquera dos mecanismos de identificación e sinatura admitidos pola sede electrónica da Xunta de Galicia, incluído o sistema de usuario e clave Chave365 (https://sede.xunta.gal/chave365).

Documentación complementaria

1. As persoas/entidades interesadas deberán achegar coa solicitude, anexo II, a seguinte documentación xeral para todas as persoas/entidades solicitantes e a específica relacionada nos puntos 2 ao 6, segundo o caso:

a) Facturas, facturas pro forma ou, na súa falta, orzamento detallado de gastos previstos para a realización de cada unha das actividades ou adquisicións para as cales se solicita subvención. Non terán a consideración de orzamentos as estimacións de gastos realizadas pola persoa solicitante e que carezan do soporte da oferta do provedor ou tarifa oficial do gasto nin se admitirán aqueles orzamentos que non presenten a suficiente desagregación para determinar o carácter subvencionable dos conceptos relacionados nel.

b) No caso de que o gasto subvencionable supere as contías establecidas na Lei 9/2017, do 8 de novembro, de contratos do sector público, para o contrato menor, a persoa ou entidade beneficiaria deberá presentar como mínimo tres ofertas de diferentes provedores con carácter previo á contracción do compromiso para a prestación do servizo ou a entrega do ben.

Será necesario presentar unha memoria xustificativa cando a elección do provedor non recaia na oferta máis ventaxosa ou cando polas súas especiais características non exista no mercado suficiente número de entidades que realicen o servizo ou presten ou subministren, e tampouco cando o gasto se realizase con anterioridade á solicitude da subvención.

c) Documento acreditativo de poder suficiente para actuar ante a Administración da persoa ou entidade representante legal da persoa ou entidade solicitante, ou tamén poderá achegar, debidamente cuberto e asinado, o modelo de representación para procedementos ante a Xunta de Galicia que figura na sede electrónica.

2. Documentación específica que deberán achegar os titulares de obradoiros artesanais:

a) No caso de que o titular do obradoiro solicite axuda pola participación como expositor en feiras ou eventos do Nadal 2025-2026, achegará, xunto coa solicitude, anexo II, a documentación xustificativa segundo o artigo 23 das bases reguladoras (facturas, xustificantes dos pagamentos, certificación expresa de participación na feira ou evento e documentación gráfica que acredite o cumprimento da utilización de logos e sinaléticas).

b) No caso de participación como expositor en feiras ou eventos profesionais e/ou non profesionais das que dispoña de documentación acreditativa, achegará a factura ou factura pro forma da feira/evento.

c) No caso de organización de eventos de comercialización de artesanía, dos que dispoña de documentación acreditativa, achegará o contrato de alugamento ou de cesión do espazo onde se desenvolva o evento.

d) No caso de agrupacións de persoas físicas ou xurídicas, comunidades de bens ou calquera outro tipo de unidade económica ou patrimonio separado sen personalidade xurídica, anexo III –declaración-compromiso para os efectos do sinalado no artigo 8.3 da Lei 9/2007, do 13 de xuño, de subvencións de Galicia–, no cal deberán constar expresamente os compromisos de execución asumidos por cada membro da agrupación e o importe de subvención que se aplicará por cada un, que terán igualmente a consideración de persoas beneficiarias. Deberá nomearse unha persoa representante única da agrupación, con poderes suficientes para cumprir as obrigas que corresponden á agrupación. Non se poderá disolver ata que transcorra o prazo de prescrición previsto nos artigos 35 e 63 da Lei 9/2007, do 13 de xuño, de subvencións de Galicia.

3. Documentación específica para asociacións profesionais e empresariais de persoas artesás:

a) Acta, escritura ou documento de constitución, estatutos e, se for o caso, modificación deles, debidamente legalizados. A referida documentación deberá acreditar que o seu obxecto social abrangue a actividade para a cal se solicita a subvención.

b) Certificado expedido pola persoa que exerza a secretaría ou representación da asociación profesional e empresarial de persoas artesáns que acredite a relación de persoas asociadas que a integran, con indicación do seu NIF/NIE correspondente.

c) Memoria que deberá incluír unha descrición da actuación subvencionable indicada no artigo 8 (mantemento da páxina web), con indicación da denominación da páxina web e o orzamento desagregado en que se detallen de forma separada os conceptos obxecto da axuda e os importes.

As facturas, facturas pro forma ou os orzamentos referidos ás ferramentas de posicionamento dixital deberán estar emitidas polos provedores que presten os referidos servizos ou, de ser o caso, pormenorizar as actuacións, o custo e os fitos/obxectivos que se prevé cumprir.

4. Documentación específica para concellos:

Xustificante de estar ao día na rendición de contas xerais ante o Consello de Contas de Galicia, de acordo co previsto no artigo 4.1 do Decreto 193/2011, do 6 de outubro, polo que se regulan as especialidades nas subvencións ás entidades locais galegas.

5. Documentación común para concellos e asociacións profesionais e empresariais de persoas artesás:

a) Anexo IV. Información e memoria das características da feira/evento. Achegarase un anexo por cada unha das feiras/eventos que se soliciten.

b) Bosquexo do recinto feiral, de cada unha das feiras que se soliciten; infraestrutura do recinto con servizos con que conta e características das casetas, campaña publicitaria que se vai realizar para a difusión da feira/evento ou calquera outro aspecto relacionado coa feira/evento.

6. Para os efectos sinalados no artigo 14 destas bases reguladoras achegarase, se é o caso, a seguinte documentación que, en ningún caso, será obxecto de requirimento:

– Acreditación da organización de cursos de formación nos últimos 12 meses, anteriores á data do inicio da presentación da solicitude desta convocatoria.

– Declaración responsable, debidamente asinada, sobre o cumprimento dos criterios establecidos no artigo 14.1, letra c), coa identificación da empresa provedora, o ano da contratación e o importe aboado no caso de contratación con provedores de empresas de inserción social e, se é o caso, número de persoas empregadas con capacidades diferentes, así como a documentación xustificativa de ter implantadas medidas de responsabilidade social na xestión da actividade artesanal ou comercial.

7. De conformidade co artigo 28.3 da Lei 39/2015, do 1 de outubro, non será necesario achegar os documentos que xa fosen presentados anteriormente pola persoa interesada ante calquera Administración. Neste caso, a persoa interesada deberá indicar en que momento e ante que órgano administrativo presentou os ditos documentos, que serán recadados electronicamente a través das redes corporativas ou mediante consulta ás plataformas de intermediación de datos ou outros sistemas electrónicos habilitados para o efecto, agás que conste no procedemento a oposición expresa da persoa interesada.

De forma excepcional, se non se puidesen obter os citados documentos, poderáselle solicitar a súa achega novamente á persoa interesada.

8. A documentación complementaria deberá presentarse electronicamente. Se algunha das persoas interesadas presenta a documentación complementaria presencialmente, será requirida para que a emende a través da súa presentación electrónica. Para estes efectos considerarase como data de presentación aquela en que fose realizada a emenda.

9. As persoas e entidades interesadas responsabilizaranse da veracidade dos documentos que presenten. Excepcionalmente, cando a relevancia do documento no procedemento o exixa ou existan dúbidas derivadas da calidade da copia, a Administración poderá solicitar de maneira motivada o cotexo das copias achegadas pola persoa interesada, para o cal poderán requirir a exhibición do documento ou da información orixinal.

10. Sempre que se realice a presentación de documentos separadamente da solicitude, deberase indicar o código e o órgano responsable do procedemento, o número de rexistro de entrada da solicitude e o número de expediente, se se dispón del.

11. No caso de que algún dos documentos que se presente de forma electrónica supere os tamaños máximos establecidos ou teña un formato non admitido pola sede electrónica da Xunta de Galicia, permitirase a súa presentación de forma presencial dentro dos prazos previstos e na forma indicada no parágrafo anterior. A información actualizada sobre o tamaño máximo e os formatos admitidos pode consultarse na sede electrónica da Xunta de Galicia.

Comprobación de datos

1. Para a tramitación deste procedemento consultaranse automaticamente os datos incluídos nos seguintes documentos en poder da Administración actuante ou elaborados polas administracións públicas, agás que a persoa interesada se opoña á súa consulta:

a) DNI ou NIE da persoa solicitante.

b) DNI ou NIE da persoa representante.

c) NIF da entidade solicitante.

d) NIF da entidade representante

e) Certificado de estar ao día no pagamento coa Axencia Estatal de Administración Tributaria para os efectos de percibir subvencións.

f) Certificado de estar ao día no pagamento coa Seguridade Social.

g) Certificado de estar ao día no pagamento coa Axencia Tributaria de Galicia para os efectos de percibir subvencións.

h) Comprobación de subvencións e axudas públicas concedidas.

i) Consulta de inhabilitacións para obter subvencións e axudas.

j) Consulta de subvencións e axudas públicas afectadas pola regra de minimis.

2. No caso de que as persoas interesadas se opoñan a esta consulta, deberán indicalo no recadro correspondente habilitado no formulario que corresponda e achegar os documentos pertinentes.

Cando así o exixa a normativa aplicable, solicitarase o consentimento expreso da persoa solicitante ou persoa representante para realizar a consulta.

3. Excepcionalmente, no caso de que algunha circunstancia imposibilite a obtención dos citados datos, poderáselles solicitar ás persoas interesadas que presenten os documentos correspondentes.

Trámites administrativos posteriores 

Todos os trámites administrativos que as persoas ou entidades interesadas deban realizar logo da presentación da solicitude deberán ser efectuados electronicamente accedendo á carpeta cidadá da persoa ou entidade interesada dispoñible na sede electrónica da Xunta de Galicia.

Prazo de resolución:

Cinco meses

Sentido do silencio:

Negativo