Xa se pode solicitar Chave365 nos centros de saúde da área sanitaria de Pontevedra

Desde o venres 18 de novembro xa é posible solicitar a alta no servizo de identificación e sinatura fácil Chave365 en todos os centros de saúde do Sergas da área sanitaria de Pontevedra.

Coa incorporación destes centros, son xa máis de 300 os puntos distribuídos por toda Galicia que están habilitados como centros acreditadores do servizo de claves concertadas da Administración xeral e do sector público autonómico. En http://www.xunta.gal/chave365/solicitude pode localizar as oficinas no mapa. Ademais, a alta pode realizarse a través da sede electrónica da Xunta de Galicia.

Actualmente o sistema pode usarse en máis de 1.000 procedementos da sede electrónica e na plataforma é-Saúde.

Para a súa utilización nesta última, e independentemente da canle utilizada para a alta no servizo Chave365 (sede electrónica, rexistros da Xunta de Galicia ou centros de saúde), será necesario acudir a calquera dos centros de saúde e hospitais habilitados do Servizo Galego de Saúde.