A alta en Chave365 xa se pode xestionar nos centros de saúde da área sanitaria de Santiago

Desde o mércores 27 de outubro todos os centros de saúde do Sergas da área sanitaria de Santiago de Compostela estarán habilitados para solicitar neles a alta no servizo de identificación e sinatura fácil Chave365. Os novos centros de saúde nos que se pode solicitar Chave365 son os das comarcas coruñesas de Santiago, A Barbanza, Muros, Noia, Arzúa, Sar, Xallas, Muros, Terra de Melide e A Barcala e da comarca pontevedresa do Deza, ademais dos centros de concellos situados noutras comarcas, como Ordes, Tordoia, Trazo, Valga, Pontecesures e A Estrada.

Actualmente o sistema pode usarse en máis de 1.000 procedementos da sede electrónica da Xunta de Galicia e na plataforma é-Saúde.

Coa incorporación destes 54 novos centros do Servizo Galego de Saúde, son xa 95 os puntos distribuídos por toda Galicia habilitados como centros acreditadores do servizo de claves concertadas da Administración xeral e do sector público autonómico. En http://www.xunta.gal/chave365/solicitude pode localizar as oficinas no mapa. Ademais, a alta pode realizarse a través da sede electrónica da Xunta de Galicia.

Para a súa utilización en é-Saúde e independentemente da canle utilizada para a alta no servizo Chave365 (sede electrónica, rexistros da Xunta de Galicia ou centros de saúde), será necesario acudir a calquera dos centros de saúde e hospitais habilitados do Servizo Galego de Saúde.