Orientámolo/a, paso a paso, para presentar unha solicitude no rexistro electrónico
AU231C - Exención no canon da auga e coeficiente de vertedura
Aberto todo o ano Obxecto
A presente resolución ten por obxecto establecer o modelo normalizado de solicitude de exención do canon da auga e coeficiente de vertedura establecida no artigo 4.2 da Lei 4/2021, do 28 de xaneiro, de medidas fiscais e administrativas, pola que se modifica o artigo 59 da Lei 9/2010, do 4 de novembro, de augas de Galicia.
A solicitude de exención que figura no anexo desta resolución habilitarase na Guía de procedementos e servizos, dispoñible na sede electrónica da Xunta de Galicia co código de procedemento administrativo AU231C.
A quen vai dirixido?
Poderán solicitar a exención do canon da auga e coeficiente de vertedura os titulares de consumos de auga nos seguintes establecementos, nos supostos en que visen diminuída significativamente a súa actividade:
a) Establecementos de restauración: restaurantes, salóns de banquetes, cafetarías e bares.
b) Establecementos de lecer e entretemento: salas de festas, discotecas, pubs, cafés espectáculo e furanchos.
c) Hoteis e aloxamentos turísticos.
d) Albergues turísticos.
A acreditación desta circunstancia realizarase mediante declaración responsable contida no anexo de solicitude.
Requisitos
Diminución significativa da actividade .
Segundo o disposto no artigo 4 da Lei 4/2021, do 28 de xaneiro, para os efectos da aplicación da exención, entenderase producida unha diminución significativa da actividade nos establecementos indicados cando no período de vixencia da exención:
a) Os consumos realizados sexan iguais ou inferiores ao 25 % do consumo realizado no período de facturación inmediatamente anterior ao 5 de novembro de 2020, no caso de que dispoñan de contador.
b) Dos rexistros de aloxamentos, dos servizos efectivamente realizados ou do consumo eléctrico se desprenda unha diminución da actividade no período de vixencia da exención de, polo menos, o 75 % respecto da actividade desenvolvida no período de facturación inmediatamente anterior ao 5 de novembro de 2020.
A acreditación do cumprimento do requisito previsto na alínea a) realizarao a entidade subministradora e, no caso de se abastecer de captacións propias, por Augas de Galicia.
A acreditación do cumprimento do requisito previsto na alínea b) realizarase mediante unha declaración responsable do solicitante contida no anexo desta resolución.
Período de exención .
O período de exención do canon da auga e coeficiente de vertedura é o comprendido entre o 5 de novembro de 2020 e a data en que se levante a declaración de situación de emerxencia sanitaria de interese galego efectuada polo Acordo do Consello da Xunta do 13 de marzo de 2020, ambas as datas incluídas.
No caso de que non dispoñan de contador, os solicitantes deberán presentar unha solicitude por cada período de facturación onde o contribuínte considere que cumpre os requisitos de diminución significativa de actividade durante todo o período de vixencia da exención.
A onde acudir
Xunta de Galicia
Consellería de Medio Ambiente e Cambio Climático
Augas de Galicia
Dirección de Augas de Galicia
Subdirección Xeral de Réxime Económico-Financeiro
Praza de Camilo Díaz Baliño, 7, 9
15704 Santiago de Compostela (Coruña, A)
Teléfono: 981545081/ 981544575/ 981544968
Email: canondaauga@xunta.gal
Órgano responsable
Subdirección Xeral de Réxime Económico-Financeiro
Normativa
Ámbito Autonómico
Lei 9/2010, do 4 de novembro, de augas de Galicia (DOG nº 222 do 18 de novembro de 2010).
Lei 4/2021, do 28 de xaneiro, de medidas fiscais e administrativas (DOG nº 19 do 29 de xaneiro de 2021).
Resolución do 17 de febreiro de 2021 pola que se establece o modelo normalizado para a solicitude da exención no canon da auga e coeficiente de vertedura establecida no artigo 4.2 da Lei 4/2021, do 28 de xaneiro, de medidas fiscais e administrativas (DOG nº 34 do 19 de febreiro de 2021).
Ámbito Estatal
Lei 58/2003, de 17 de decembro, Xeral Tributaria (BOE nº 302, de 18 de decembro de 2003).
Prazo
Prazo de presentación: Aberto todo o ano
Decimo primeiro. Vixencia (segundo a Resolución do 17 de febreiro de 2021).
Esta resolución producirá efectos o día seguinte ao da súa publicación no Diario Oficial de Galicia.
Documentación para a presentación
Forma e lugar de presentación das solicitudes .
1. As solicitudes presentaranse preferiblemente por vía electrónica a través do formulario normalizado (anexo I) dispoñible na sede electrónica da Xunta de Galicia https://sede.xunta.gal
A presentación electrónica será obrigatoria para as administracións públicas, as persoas xurídicas, as entidades sen personalidade xurídica, as persoas traballadoras autónomas e as persoas representantes dalgunha das anteriores.
De conformidade co artigo 89 do Real decreto 1065/2007, do 27 de xullo, polo que se aproba o Regulamento xeral das actuacions e os procedementos de xestión e inspección tributaria e de desenvolvemento das normas comúns dos procedementos de aplicación dos tributos, se algunha das persoas interesadas obrigadas á presentación electrónica presentase a solicitude presencialmente, requerirase para que a emende a través da súa presentación electrónica. Para estes efectos, considerarase como data de presentación da solicitude aquela en que fose realizada a emenda.
Para a presentación electrónica poderá empregarse calquera dos mecanismos de identificación e sinatura admitidos pola sede electrónica da Xunta de Galicia, incluído o sistema de usuario e clave Chave365 (https://sede.xunta.gal/chave365).
Aquelas persoas interesadas non obrigadas á presentación electrónica, opcionalmente, poderán presentar as solicitudes presencialmente en calquera dos lugares e rexistros establecidos na normativa reguladora do procedemento administrativo común, utilizando o formulario normalizado dispoñible na sede electrónica da Xunta de Galicia.
2. Ademais, as solicitudes poderán presentarse ante a entidade subministradora, a través do anexo desta resolución e polos medios que teña establecidos.
Documentación complementaria .
1. As persoas interesadas deberán achegar coa solicitude a seguinte documentación:
a) Copia da ultima factura de auga.
b) A acreditación da representación, no caso de actuar a través de representante.
De conformidade co artigo 99.2 da Lei 58/2003, do 17 de decembro, xeral tributaria, non será necesario achegar os documentos que non resulten exixibles pola normativa tributaria e aqueles que fosen previamente presentados polos interesados e que se atopen en poder da Administración tributaria actuante. Poderáselle, en todo caso, requirir ao interesado a ratificación de datos específicos propios ou de terceiros, previamente achegados. Neste caso, a persoa interesada deberá indicar en que momento e ante que órgano administrativo presentou eses documentos, que serán recadados electronicamente a través das redes corporativas ou mediante consulta ás plataformas de intermediación de datos ou outros sistemas electrónicos habilitados para o efecto, agás que conste no procedemento a oposición expresa da persoa interesada. De forma excepcional, se non se puideren obter os citados documentos, poderá solicitárselle novamente á persoa interesada a súa achega.
2. A documentación complementaria presentarase preferiblemente por vía electrónica.
A presentación electrónica será obrigatoria para os suxeitos obrigados á presentación electrónica da solicitude. Se algunha destas persoas presenta a documentación complementaria presencialmente, requirirase para que a emende a través da súa presentación electrónica. Para estes efectos, considerarase como data de presentación aquela en que fose realizada a emenda.
Aquelas persoas non obrigadas á presentación electrónica, opcionalmente, poderán presentar a documentación complementaria presencialmente en calquera dos lugares e rexistros establecidos na normativa reguladora do procedemento administrativo común.
A presentación ante a entidade subministradora realizarase polos medios que teña establecidos.
As persoas interesadas responsabilizaranse da veracidade dos documentos que presenten. Excepcionalmente, cando a relevancia do documento no procedemento o exixa ou existan dúbidas derivadas da calidade da copia, a Administración poderá solicitar de maneira motivada o cotexo das copias achegadas pola persoa interesada, para o que poderán requirir a exhibición do documento ou da información orixinal.
Comprobación de datos .
1. Para a tramitación deste procedemento consultaranse automaticamente os datos incluídos nos seguintes documentos en poder da Administración actuante ou elaborados polas administracións públicas, agás que a persoa interesada se opoña á súa consulta:
a) NIF da entidade solicitante.
b) DNI/ NIE da persoa física solicitante ou representante.
2. No caso de que as persoas interesadas se opoñan á consulta, deberán indicalo no recadro correspondente habilitado no formulario correspondente e achegar os documentos.
Cando así o exixa a normativa aplicable, solicitarase o consentimento expreso da persoa interesada para realizar a consulta.
3. Excepcionalmente, no caso de que algunha circunstancia imposibilitase a obtención dos citados datos, poderase solicitar ás persoas interesadas a presentación dos documentos correspondentes.
Trámites administrativos posteriores á presentación da solicitude .
A sede electrónica da Xunta de Galicia permítelles ás persoas interesadas realizar trámites electrónicos, con posterioridade ao inicio do expediente, accedendo á carpeta cidadá da persoa interesada. Cando as persoas interesadas non resulten obrigadas á presentación electrónica, tamén poderán realizarse eses trámites presencialmente en calquera dos lugares e rexistros establecidos na normativa reguladora do procedemento administrativo común.
Procedementos e servizos relacionados
Aberto todo o ano AU230C
Declaración de datos das fontes de abastecemento de auga.
Aberto todo o ano AU230D
Declaración de contador nas captacións propias de auga.
