Esta resolución ten por obxecto establecer as bases reguladoras polas cales se rexerá a realización de obradoiros culturais de especialización de carácter presencial dirixidos a persoas responsables de impartir docencia nas entidades galegas do exterior e a persoas galegas residentes fóra de Galicia.

Así mesmo, é obxecto desta resolución a convocatoria de axudas para participar nos obradoiros para o ano 2019.

As distintas actividades que se desenvolverán no programa consistirán na organización e participación en obradoiros de especialización de:

– Gaita tradicional galega.

– Baile tradicional galego.

– Percusión tradicional galega.

– Canto popular e pandeireta.

– Confección de traxe tradicional galego.

– Obradoiro de formación de persoal directivo.

Estes obradoiros terán as seguintes características comúns:

– Formación intensiva, de carácter participativo, cunha duración mínima de 50 horas lectivas teórico-prácticas.

– A formación será impartida por profesionais e expertos con experiencia nas distintas modalidades.

– Cada alumno deberá vir provisto dos instrumentos necesarios para o desenvolvemento dos obradoiros de carácter cultural.

– O lugar de celebración, o número de prazas de cada obradoiro por país, o desenvolvemento de cada unha das modalidades e a non realización dos obradoiros que non acaden un número mínimo de oito (8) solicitudes establecerase mediante resolución da persoa titular da Secretaría Xeral da Emigración. Así mesmo, no caso de que o número de solicitudes presentadas para algún dos obradoiros sexa elevado, poderase determinar a realización de máis dun obradoiro nalgunha das modalidades.

O número de prazas ofertadas ascende a un total de 80, distribuídas do seguinte xeito:

– Área 1 (países europeos): 18 prazas.

– Área 2 (países do resto do mundo): 62 prazas.

As prazas vacantes nunha das áreas poderanse adxudicar á outra área, de haber nela solicitudes admitidas e contar con crédito suficiente no programa. Nos obradoiros de gaita, baile, canto popular e pandeireta e percusión reservarase un total de catro (4) prazas para as solicitudes de persoas físicas que non exerzan docencia nunha entidade galega do exterior.

Para o obradoiro de formación de persoal directivo, de haber suficientes solicitudes admitidas, reservarase o 70 % das prazas para mulleres.

Os obradoiros desenvolveranse preferiblemente na cidade de Ourense durante o mes de xullo do ano 2019.

Aquelas persoas participantes que desexen prorrogar a súa estadía en Galicia unha vez finalizadas as actividades, ata completar un período aproximado de trinta (30) días desde o remate da actividade, deberán asumir todos os gastos desta prórroga.

A persoa que desexe prorrogar a súa estadía en Galicia segundo os termos anteriormente indicados, deberá reflectilo na solicitude de participación no programa cubrindo o recadro correspondente.

Persoas responsables de impartir docencia nas entidades galegas do exterior.

Poderán ser beneficiarias das subvencións establecidas para este programa as persoas responsables de impartir docencia naquelas entidades galegas asentadas fóra de Galicia que estean recoñecidas en calquera das categorías establecidas no artigo 4 da Lei 7/2013, do 13 de xuño, da galeguidade.

Persoal directivo das entidades galegas do exterior.

Para a modalidade de formación de persoal directivo, poderán ser beneficiarias aquelas persoas que pertenzan á xunta directiva daquelas entidades galegas que, no Rexistro da Galeguidade, estean inscritas na Sección de comunidades galegas, centros colaboradores ou federacións de entidades.

Así mesmo, poderán ser beneficiarias aquelas persoas que colaboren no exterior coa Secretaría Xeral da Emigración nun programa que esta xestione en materia de xuventude.

Persoas responsables de impartir docencia nas entidades galegas do exterior.

Poderán solicitar participar neste programa aquelas persoas responsables de impartir docencia nas entidades galegas:

a) Que teñan constituídas escolas ou grupos consolidados da especialidade solicitada cunha actividade continuada, cando menos, nos dous últimos anos.

b) Aquelas entidades que, non cumprindo o establecido no parágrafo anterior, tivesen grupos constituídos nos últimos dez anos e estean no seu proceso de recuperación.

c) No caso de persoas que soliciten participar no obradoiro de confección de traxe tradicional galego, a entidade galega deberá ter grupo de baile ou música debidamente constituído e cun funcionamento ininterrompido, como mínimo, durante catro anos.

As persoas solicitantes deben ser maiores de 18 anos e menores de 65 e ser responsables de impartir a docencia na modalidade solicitada dentro da entidade galega na cal exercen a súa función docente. Malia o anterior, mediante resolución razoada, á vista de circunstancias excepcionais de excelencia ou dedicación nas materias que se impartirán no obradoiro correspondente, a persoa titular da Secretaría Xeral da Emigración poderá autorizar a participación dalgunha persoa maior ou menor destas idades.

Persoal directivo das entidades galegas do exterior.

As persoas solicitantes desta modalidade deberán ter unha idade comprendida entre os 21 e 35 anos, e formar parte da xunta directiva da entidade no último ano, cando menos, na data do remate do prazo de presentación de solicitudes.

 Non poderán ser beneficiarias dos distintos obradoiros as persoas en que concorra algunha das prohibicións establecidas nos números 2 e 3 do artigo 10 da Lei 9/2007, do 13 de xuño, de subvencións de Galicia, nin poderán ter participado no Programa de escolas abertas máis de dúas veces nos últimos catro anos, en calquera modalidade. Se así for, quedarán excluídas.

Non poderán ser beneficiarias aquelas persoas solicitantes que exerzan o seu labor docente ou pertenzan a entidades en que concorra algunha das prohibicións establecidas nos números 2 e 3 do artigo 10 da Lei 9/2007, do 13 de xuño, de subvencións de Galicia.

Os requisitos teñen que cumprirse o último día do prazo de presentación de solicitudes.

As solicitudes presentaranse preferiblemente por vía electrónica a través do formulario normalizado dispoñible na sede electrónica da Xunta de Galicia https://sede.xunta.gal

Opcionalmente, poderanse presentar as solicitudes presencialmente en calquera dos lugares e rexistros establecidos na normativa reguladora do procedemento administrativo común.

Para a presentación das solicitudes poderase empregar calquera dos mecanismos de identificación e sinatura admitidos pola sede electrónica da Xunta de Galicia, incluído o sistema de usuario e clave Chave365 (https://sede.xunta.gal/chave365).

Documentación complementaria necesaria para a tramitación do procedemento

1. Persoas responsables de impartir docencia nas entidades galegas do exterior (código de procedemento PR923E).

1.1. Para os obradoiros de gaita, baile, percusión, canto e confección de traxe:

a) Documento identificativo da persoa solicitante. Se dispón de DNI/NIE, só se achegará no caso de opoñerse expresamente á súa consulta no anexo I.

b) Unha fotografía recente tamaño carné.

c) Documentación identificativa da entidade en que exerce as súas funcións.

d) Ficha da entidade colaboradora que certifica, segundo o modelo do anexo II.

e) Unha declaración da persoa aspirante pola cal se comprometen a ensinar os coñecementos adquiridos no seo da entidade en que imparte ensino durante, como mínimo, dous anos, incluída no anexo I.

f) Breve currículo da persoa aspirante, con especial referencia aos grupos ou escolas en que impartiu docencia, os coñecementos e o nivel de estudos musicais realizados, títulos, experiencia, actuacións, gravacións, etc., na materia obxecto do obradoiro.

g) Para os obradoiros de gaita, baile, percusión e canto popular e pandeireta: unha gravación en vídeo dixital (CD, VCD, DVD...) da modalidade solicitada que non exceda os catro (4) minutos, sen ningún outro instrumento acompañando, no caso de gaita e percusión. No caso de canto e baile, a gravación deberá ser solista.

h) Certificación da entidade do nome da escola ou grupo e do número de alumnos que os compoñen, segundo o modelo que figura como anexo IV.

i) Para o obradoiro de confección de traxe tradicional galego, certificación da entidade na cal acredite a experiencia en corte e confección de traxe tradicional galego e, de ser o caso, copia do título oficial de corte e confección.

Así mesmo, deberase presentar unha certificación de ter grupo de baile ou música debidamente constituído e cun funcionamento ininterrompido, como mínimo, durante catro anos, segundo o modelo que figura como anexo III.

1.2. Para o obradoiro de formación de persoal directivo das entidades galegas deberase achegar a seguinte documentación:

a) Certificación de que a persoa solicitante leva pertencendo á xunta directiva da entidade durante o ano anterior á data da convocatoria incluída no anexo II.

b) Acta da entidade na cal apareza o seu nomeamento como membro da xunta directiva na cal exerza as funcións directivas.

c) A recollida nas alíneas a), b), c) e e) do número 1.1 deste artigo.

d) Para aquelas persoas que soliciten esta modalidade e que colaboren coa Secretaría Xeral da Emigración nun programa que esta xestione en materia de xuventude, abondará con que acrediten tal colaboración.

A documentación complementaria presentarase preferiblemente por vía electrónica. As persoas interesadas responsabilizaranse da veracidade dos documentos que presenten. Excepcionalmente, cando a relevancia do documento no procedemento o exixa ou existan dúbidas derivadas da calidade da copia, a Administración poderá requirir de maneira motivada a exhibición do documento orixinal para o cotexo da copia electrónica presentada.

Opcionalmente, as persoas interesadas poderán presentar a documentación complementaria de maneira presencial en calquera dos lugares e rexistros establecidos na normativa reguladora do procedemento administrativo común.

 Sempre que se realice a presentación de documentos separadamente da solicitude, deberanse indicar o código e o órgano responsable do procedemento, o número de rexistro de entrada da solicitude e o número de expediente, se se dispón del.

A sede electrónica da Xunta de Galicia ten á disposición das persoas interesadas unha serie de modelos normalizados para facilitar a realización de trámites administrativos logo da presentación das solicitudes de inicio. Estes modelos presentaranse por medios electrónicos accedendo á carpeta cidadán da persoa interesada dispoñible na sede electrónica da Xunta de Galicia. Cando as persoas interesadas non resulten obrigadas á presentación electrónica das solicitudes, tamén os poderán presentar presencialmente en calquera dos lugares e rexistros establecidos na normativa reguladora do procedemento administrativo común.

A falsidade ou ocultación de datos na documentación presentada para a obtención da axuda comportará a exclusión do proceso de valoración e, polo tanto, a imposibilidade de ser persoa beneficiaria das axudas establecidas nesta resolución.

O material audiovisual poderase presentar nos seguintes formatos de uso común: mp4, avi, mov ou wmv e non pode superar os 12 MB.

Comprobación de datos

1. Para a tramitación dos procedementos PR923E/PR923H consultarase automaticamente o DNI/NIE da persoa solicitante, de ser o caso.

Para a tramitación do procedemento PR923H, consultaranse os datos oficiais acreditativos de que está vinculada con calquera concello galego no Censo electoral de residentes ausentes.

Só no caso de oposición expresa no modelo de solicitude, as persoas interesadas deberán achegar os documentos acreditativos correspondentes.

2. Excepcionalmente, no caso de que algunha circunstancia faga imposible a obtención dos citados datos, poderáselles solicitar ás persoas interesadas que presenten os documentos correspondentes.

• Fase de solicitude
• Solicitude (anexo I)
• Ficha da entidade colaboradora que certifica (Anexo II)
• Certificación do número de alumnos/as que compoñen a escola ou grupo de baile, gaita ou canto e percusión da entidade (Anexo IV)
• Certificación da entidade de que dispón de grupo de baile ou música debidamente constituído (Anexo III)

Prazo de resolución: Catro meses

Sentido do silencio: Negativo