4. Para a presentación electrónica poderá empregarse calquera dos mecanismos de identificación e sinatura admitidos pola sede electrónica da Xunta de Galicia, incluído o sistema de usuario e clave Chave 365 (https://sede.xunta.gal/chave365).

Documentación complementaria

1. As entidades interesadas deberán achegar coa solicitude modelo do anexo II a seguinte documentación:

1.1. Acreditación da representación por calquera medio válido en dereito, se procede.

1.2. Memoria técnica descritiva das actuacións obxecto de solicitude para a adaptación e/ou modificación da liña eléctrica correspondente, onde se especifiquen e se describan as medidas que se van tomar co obxectivo de dar cumprimento ao Real decreto 1432/2008, do 29 de agosto. O contido mínimo da memoria será o seguinte:

a) Descrición do trazado con plano a escala mínima 1:10.000 en formato .pdf e dixital (.shp, .dxf ou similar) onde se identifiquen e localicen as liñas e apoios.

b) Planos de localización e detalle, onde se identifiquen a localización das liñas e apoios con respecto ás zonas de protección para a avifauna.

c) Tipos de apoios e armados instalados ou para instalar.

d) Características dos sistemas de illamento para cada apoio, con certificación da súa homologación cando menos para a tensión dos tendidos que vaian ser corrixidos.

e) Descrición das instalacións de seccionamento, transformación e interruptores con corte en intemperie.

f) Características dos dispositivos anticolisións que se van instalar e a localización destes, así como as medidas anticolisión e as medidas antinidificación nas liñas.

g) Xustificación técnica, asinada por técnico competente, de que as medidas propostas dan cumprimento ao establecido polo Real decreto 1432/2008, do 29 de agosto.

h) Xustificación do cumprimento do principio DNSH.

i) Obxectivos ambientais aos cales contribuirá a actuación, segundo o que establece o Regulamento (UE) 2020/852 do Parlamento Europeo e do Consello, do 18 de xuño de 2020, relativo ao establecido no marco para facilitar os investimentos sustentables e polo que se modifica o Regulamento (UE) 2019/2088.

j) Orzamento detallado co IVE desagregado.

k) Prazo de execución e calendario, tendo en conta que as actividades subvencionables descritas nas presentes bases reguladoras deben rematar antes do 31 de outubro de 2023.

1.3. Arquivo en formato compatible con SIX (.shp, .dxf ou similar) onde se identifiquen e localicen as liñas e apoios, diferenciando aqueles en que se realizarán actuacións dos que non.

1.4. Tres ofertas de diferentes persoas que teñan a condición de provedoras, con carácter previo á contratación do compromiso para a prestación do servizo ou a entrega do ben, agás que polas especiais características dos gastos subvencionables non exista no mercado suficiente número de entidades que o subministren ou presten, no caso en que o gasto subvencionable supere os 40.000 €, no caso de obras, ou 15.000 €, no suposto de subministración de bens de equipamento ou prestación de servizos por empresas de consultoría ou asistencia técnica. As ofertas presentadas para cada gasto deberán cumprir cos seguintes requisitos:

a) Os prezos das unidades de obra das actuacións subvencionables deben axustarse ao valor do mercado.

b) As ofertas presentadas deberán incluír os mesmos elementos para ser comparables.

c) En ningún caso poderá fraccionarse un contrato co obxecto de diminuír a contía deste e eludir o cumprimento dos requisitos de contratación e subcontratación establecidos nestas bases.

d) Deberán proceder de empresas que teñan como obxecto social a fabricación ou subministración dos bens ou servizos incluídos na oferta.

e) Non poderán proceder de empresas vencelladas entre elas nin coa solicitante, nos termos establecidos pola lexislación de contratos do sector público.

f) Deberán incluír, como mínimo, o NIF, nome e enderezo da empresa ofertante, o nome ou razón social da solicitante da axuda, a data de expedición e unha descrición detallada dos conceptos ofertados.

g) Non se considerarán admisibles as ofertas presentadas que non reúnan estes requisitos, o que poderá dar lugar á exclusión como subvencionable do gasto xustificado con esa oferta.

h) Excepcionalmente, no caso de conceptos subvencionables dos cales, polas súas características especiais, non exista no mercado suficiente número de entidades que o ofrezan, a moderación de custos poderá xustificarse alternativamente mediante un informe dun taxador, perito ou dun organismo público autorizado no cal se determine xustificadamente o seu valor de mercado.

i) Non se considerarán subvencionables os gastos en que non se xustifique a moderación de custos conforme os criterios e requisitos sinalados no presente artigo.

1.5. De ser o caso, documentación xustificativa que acredite o cumprimento dos criterios de avaliación 1, 2 e 3 das solicitudes establecidos no artigo 9 das bases reguladoras; documentación xustificativa que acredite a mortalidade de avifauna de cada un dos exemplares tidos en conta nos criterios de valoración.

1.6. Se é o caso, acreditación de dispor de todas as licenzas e autorizacións necesarias para o exercicio da actividade ou de estar en trámite de conseguilas.

1.7. Anexo III debidamente cuberto (memoria resumo das actuacións).

1.8. Se é o caso, a declaración responsable (anexo VII) en que se acredite que as actuacións non foron iniciadas antes do 1 de xaneiro de 2023.

1.9. Declaración responsable relativa ao compromiso de cumprimento dos principios transversais establecidos no PRTR e que puidesen afectar o ámbito obxecto de xestión, incluíndo o cumprimento do principio de «non causar un prexuízo significativo ao ambiente» (DNSH) (anexo VIII), de acordo co recollido no artigo 8.1 da Orde HFP/1030/2021, do 29 de setembro, en todas as fases de deseño e execución das actuacións.

1.10. Aceptación da cesión de datos entre as administracións públicas implicadas para dar cumprimento ao previsto na normativa europea de aplicación e de conformidade coa Lei orgánica 3/2018, do 5 de decembro, de protección de datos persoais e garantía dos dereitos dixitais, de acordo co recollido no artigo 8.1 da Orde HFP/1030/2021, do 29 de setembro, pola que se configura o sistema de xestión do PRTR (anexo IX).

1.11. No caso de que as beneficiarias desenvolvan actividades económicas, acreditarán a súa inscrición no Censo de empresarios, profesionais e retedores da Axencia Estatal de Administración Tributaria, que debe reflectir a actividade económica efectivamente desenvolvida na data de solicitude da axuda, de acordo co recollido no artigo 8.1 da Orde HFP/1030/2021, do 29 de setembro.

1.12. Calquera outra documentación adicional que o interesado considere conveniente para a correcta avaliación do proxecto.

1.13. A Dirección Xeral de Planificación Enerxética e Recursos Naturais poderá requirir motivadamente, consonte prevé o artigo 28 da Lei 39/2015, do 1 de outubro, do procedemento administrativo común das administracións públicas, calquera documentación aclaratoria necesaria en relación coas subvencións que se van outorgar que considere conveniente.

2. A documentación complementaria deberá presentarse electronicamente.

Se algunha das entidades interesadas presenta a documentación complementaria presencialmente, será requirida para que a emende a través da súa presentación electrónica. Para este efectos, considerarase como data de presentación aquela en que fose realizada a emenda.

As entidades interesadas responsabilizaranse da veracidade dos documentos que presenten. Excepcionalmente, cando a relevancia do documento no procedemento o exixa ou existan dúbidas derivadas da calidade da copia, a Administración poderá solicitar de maneira motivada o cotexo das copias achegadas pola persoa interesada, para o que poderán requirir a exhibición do documento ou da información orixinal.

3. Sempre que se realice a presentación de documentos separadamente da solicitude, deberase indicar o código e o órgano responsable do procedemento, o número de rexistro de entrada da solicitude e o número de expediente, se se dispón del.

4. De conformidade co artigo 28.3 da Lei 39/2015, do 1 de outubro, do procedemento administrativo común das administracións públicas, non será necesario achegar os documentos que xa foron presentados anteriormente pola persoa interesada ante calquera Administración. Neste caso, a persoa interesada deberá indicar en que momento e ante que órgano administrativo presentou os ditos documentos, que serán obtidos electronicamente a través das redes corporativas ou mediante consulta ás plataformas de intermediación de datos ou outros sistemas electrónicos habilitados para o efecto, agás que conste no procedemento a oposición expresa da persoa interesada.

De forma excepcional, se non puideran obter os citados documentos, poderáselle solicitarse novamente á persoa interesada a súa achega.

Comprobación de datos

Para tramitar este procedemento consultaranse automaticamente os datos incluídos nos seguintes documentos en poder da Administración actuante ou elaborados polas administracións públicas, agás que a persoa interesada se opoña á súa consulta:

a) NIF da entidade solicitante.

b) DNI/NIE da persoa representante ou NIF da entidade representante, de ser o caso.

c) Certificado de estar ao día no pagamento coa Seguridade Social.

d) Certificado de estar ao día no pagamento de obrigas tributarias da consellería competente en materia de facenda da Xunta de Galicia.

e) Certificado de estar ao día nas obrigas tributarias coa Axencia Estatal da Administración Tributaria.

f) Consulta de inhabilitacións para obter subvencións e axudas.

g) Consulta de concesión de subvencións e axudas.

No caso de que as interesadas se opoñan a esta consulta, deberán indicalo no recadro correspondente habilitado no formulario correspondente e achegar os documentos.

Cando así o exixa a normativa aplicable solicitarase o consentimento expreso da persoa interesada para realizar a consulta.

Excepcionalmente, no caso de que algunha circunstancia imposibilite a obtención dos citados datos, poderáselles solicitar ás persoas interesadas que presenten os documentos correspondentes.

Trámites administrativos posteriores á presentación da solicitude

Todos os trámites administrativos que as persoas interesadas deban realizar tras a presentación da solicitude deberán ser efectuados electronicamente accedendo á Carpeta cidadá da persoa interesada, dispoñible na sede electrónica da Xunta de Galicia.