a)    Programar, organizar e realizar as accións.

b)   Acompañar as pemes participantes na acción en calidade de apoio técnico en destino.

c)    Promover a participación das pemes galegas.

d)   Realizar ante o Igape os trámites para solicitar a axuda.

e)    Comprobar que as empresas que soliciten participar na acción compren os requisitos do artigo 8 destas bases para ser beneficiario da axuda.

f)     Convocar a acción.

g)   Realizar o proceso de selección das empresas que soliciten participar na acción.

h)    Emitir unha acta de selección de empresas e comunicar ao Igape as empresas seleccionadas para cada acción.

i)      Notificar ás empresas participantes a axuda concedida emitindo o correspondente Documento polo que se Establecen as Condicións da Axuda (DECA).

j)      Xustificar a axuda ante o Igape.

 3. Para acreditar a solvencia técnica e económica, as entidades colaboradoras deberán dispor dos medios tecnolóxicos precisos que garantan o acceso á aplicación informática habilitada para a xestión de selección de entidades colaboradoras e para a tramitación das solicitudes de axuda, así como a utilización de medios electrónicos nas comunicacións entre as entidades colaboradoras e o Igape.

 4. Poderán adquirir a condición de entidade colaboradora aquelas cámaras que reúnan os requisitos establecidos neste artigo e que o soliciten nos prazos que se indican na convocatoria, contados a partir do día seguinte ao da publicación da convocatoria destas bases no Diario Oficial de Galicia.

 5. Non poderán obter a condición de entidade colaboradora aquelas cámaras nas cales concorra algunha das circunstancias previstas no artigo 10.2 e 3 da Lei 9/2007, do 13 de xuño, de subvencións de Galicia, e na súa normativa de desenvolvemento.

 6. De conformidade coa Lei 9/2007, do 13 de xuño, de subvencións de Galicia, as entidades colaboradoras deberán formalizar o convenio de colaboración entre elas e o Igape, en que se regularán as condicións e obrigas asumidas por aquelas, cuxo modelo figura no anexo VII destas bases. O dito convenio posuirá o contido mínimo previsto no artigo 13 da Lei de subvencións.

 7. As entidades colaboradoras estarán exentas da constitución de garantía prevista no artigo 13.2.d) da Lei 9/2007, do 13 de xuño, de subvencións de Galicia, previa autorización polo Consello da Xunta nos termos previstos no artigo 72.2 do Decreto 11/2009, do 8 de xaneiro, polo que se aproba o regulamento da Lei de subvencións de Galicia.

8. Son obrigas das entidades colaboradoras, sen prexuízo do disposto no artigo 12 da Lei 9/2007, do 13 de xuño, de subvencións de Galicia:

 a) Encontrarse ao día no pagamento das obrigas coa Facenda pública do Estado, da Administración autonómica, así como coa Seguridade Social.

b) Someterse ás actuacións de inspección e control que o Igape poida efectuar respecto á xestión destas axudas e que permitan a xustificación financeira ante a Intervención Xeral da Comunidade Autónoma, do Tribunal de Contas e do Consello de Contas, así como ás dos servizos financeiros da Comisión Europea e do Tri­bunal de Contas Europeo e ás verificacións do artigo 125 do Regulamento (UE) nº 1303/2013 do Consello.

c) Conservar as solicitudes das empresas para participar na acción e os xustificantes orixinais e o resto da documentación relacionada coa axuda outorgada durante un prazo de tres anos a partir do 31 de decembro seguinte á presentación das contas nas que estean incluídos os gastos da operación. Informarase ao beneficiario da data de comezo dese prazo. Deberán restituír as cantidades percibidas nos casos en que concorra causa de reintegro.

d) Subministrar, a requirimento do Igape, durante un período de tres anos a partir do 31 de decembro de 2022, informe de resultados concretos obtidos gracias ao proxecto financiado, para os efectos de realizar as avaliacións oportunas sobre o resultado das actuacións financiadas.

e) Manter un sistema de contabilidade separado ou un código contable axeitado en relación con todas as transaccións relacionadas con gastos subvencionados, sen prexuízo das normas xerais de contabilidade, que permita seguir unha pista de auditoría sobre os gastos financiados con fondos Feder e comunicar ás empresas esta obriga.

f) Remitir copia dixitalizada da dita documentación ao Igape.

g) Difundir a convocatoria destas axudas nas súas páxinas web e dar publicidade do carácter público do financiamento do proxecto polo Igape, a Xunta de Galicia e o Fondo Europeo de Desenvolvemento Rexional. Neste sentido, será necesario incluír o logo do Igape e o da Unión Europea en todas as comunicacións e difusións que se leven a cabo no marco da convocatoria, incluíndo tanto as redes sociais como o material utilizado para difundir webinarios e outras accións de difusión, de acordo co establecido no anexo VIII destas bases.

 9. As entidades colaboradoras adheridas asumirán os seguintes compromisos:

 a)    Programar, organizar e realizar as accións nos termos previstos nestas bases, xestionando a súa realización e os custos e pagamentos que lle correspondan no seu desenvolvemento; asumindo a xestión económica e a dirección técnica, e realizando a asignación dos medios humanos e materiais que sexan necesarios para este fin.

b)   Prestar ás pemes o servizo de acompañamento na acción en calidade de apoio técnico en destino, incluíndo os custos necesarios para a viaxe, aloxamento e relacionados (taxas, visados, PCR, etc.) da persoa ou persoas das entidades colaboradoras que se despracen para prestar estes servizos. A prestación deste servizo por parte da entidade colaboradora será obrigatoria en calquera actuación cunha participación igual ou superior a 4 empresas. A entidade colaboradora poderá solicitar a excepción desta obriga, que se poderá acordar extraordinariamente cando polas características da actuación se desprenda que non achega valor engadido.

c)    Cubrir convenientemente o formulario de solicitude de axuda a través da aplicación informática que se habilite para o efecto. 

d)   Enviarlle ao Igape a convocatoria das accións subvencionadas polo Igape -co seu orzamento orientativo non limitativo- (segundo o modelo do anexo VI) para a súa revisión co fin de garantir o establecido nestas bases e a adecuación dos criterios de selección das empresas interesadas aos obxectivos destas bases e aos principios de publicidade, transparencia, obxectividade, libre concorrencia, igualdade e non discriminación así como para a súa difusión.

e)    Realizar o proceso de selección das empresas que soliciten participar nas accións obxecto de apoio, conforme aos procedementos que garantan os principios de publicidade, transparencia, obxectividade, libre concorrencia e igualdade e non discriminación, de acordo co artigo 5 da Lei 9/2007, do 13 de xuño, de subvencións de Galicia e comprobar que as empresas seleccionadas compren os requisitos establecidos no artigo 8 destas bases para ser beneficiarias das axudas.

f)     Comunicar ao Igape o peche da convocatoria e a relación de empresas seleccionadas para cada acción, así como a solicitude de anticipo de subvención das participantes que cumpran os requisitos para a súa obtención.

g)   Enviar ao Igape a información/documentación que se vaia facilitar ás empresas participantes na acción. Entre outros, o informe país/sectorial onde consten as oportunidades de negocio para as empresas galegas e as relacións bilaterais do país con Galicia.

h)    Notificar ás empresas participantes a axuda concedida emitindo o correspondente Documento polo que se Establecen as Condicións da Axuda (DECA). Esta comunicación farase ás empresas no prazo de dez días dende o remate do proceso de selección das empresas participantes na acción e conforme á resolución correspondente á actuación na que participa a empresa, de producirse modificacións a esta resolución a entidade colaboradora deberá confeccionar e enviar un novo DECA á empresa que conteña os datos das citadas resolucións de modificación no prazo dun mes desde a notificación de dita modificación.

i) Xustificar a axuda ante o Igape atendendo ao procedemento descrito nestas bases e no clausulado do convenio entre o Igape e a entidade colaboradora para a xestión destas axudas.

j)      As Cámaras deberán ingresar ás pemes os importes íntegros -sen compensación doutros gastos non elixibles- correspondentes ás subvencións e/ou os anticipos recibidos do Igape, nun prazo máximo de 10 días tras recibir a transferencia de Igape. Unha vez feitas as transferencias das subvencións ás pemes, as Cámaras deberán remitir ao Igape un escrito informando disto con copia simple das transferencias efectuadas. 

k)     Enviarlle ao Igape as axendas das empresas participantes. As actuacións do tipo 3.1.a sempre deberán ofertar o servizo de axendas de forma obrigatoria -no caso de empresas que rexeiten elaboración de axenda deberá recadarse -coa solicitude de axuda e enviar a Igape-  motivación razoada da empresa e información dos obxectivos da acción e tipo de reunións a manter-.

l)Poñer todos os medios para recadar das empresas a documentación necesaria para a debida xustificación dos gastos elixibles.

m) Facilitar canta información e documentación precise para verificar a correcta aplicación das subvencións.

n)    Informar ao Igape do resto de actividades e programas de apoio á internacionalización empresarial que leven a cabo.

o)     Facer difusión no seu ámbito de actuación das actividades e programas de apoio á internacionalización empresarial que lle sexan comunicados por parte do Igape.

p)   Reintegrar, nos casos contemplados no artigo 33 Lei 9/2007, do 13 de xuño, de subvencións de Galicia, a totalidade ou parte das cantidades percibidas mais os correspondentes xuros de mora. Esta obriga será independente das sancións que, se é o caso, resulten esixibles.