Orientámolo/a, paso a paso, para presentar unha solicitude no rexistro electrónico
VI408M - Cualificación definitiva para participar no Programa de rexeneración e renovación urbana e rural no ámbito da Ari da Ribeira Sacra.
Convocatoria 2020
Prazo pechado: 13/01/2022 00:00 - 30/10/2023 23:59
Prazo pechado: 13/01/2022 00:00 - 30/10/2023 23:59Obxecto
1. Esta resolución ten por obxecto regular o procedemento para participar no Programa de fomento da rexeneración e renovación urbana e rural previsto no Real decreto 106/2018, do 9 de marzo, polo que se regula o Plan estatal de vivenda 2018-2021 (en diante, Plan 2018-2021), no ámbito da área de rehabilitación integral (en diante, ARI) da Ribeira Sacra, e abrir o prazo para solicitar a participación neste programa (códigos de procedemento VI408L e VI408M).
2. Así mesmo, por medio desta resolución, apróbanse as bases reguladoras que rexerán na Comunidade Autónoma de Galicia a concesión das subvencións previstas para este programa nos acordos que se asinen entre o Ministerio de Transportes, Mobilidade e Axenda Urbana e o Instituto Galego da Vivenda e Solo (en diante, IGVS) para o financiamento da ARI da Ribeira Sacra (código de procedemento VI408N).
A quen vai dirixido?
Persoas ou entidades solicitantes da cualificación provisional
1. Poderán solicitar a cualificación provisional:
a) As comunidades de persoas propietarias e as agrupacións de comunidades de persoas propietarias constituídas conforme o disposto polo artigo 5 da Lei 49/1960, do 21 de xullo, de propiedade horizontal.
b) As agrupacións de persoas propietarias.
c) As persoas físicas propietarias de edificios ou vivendas.
d) As administracións públicas con competencias neste ámbito para as actuacións sinaladas no punto 1.e) do ordinal décimo primeiro.
2. Para solicitar a cualificación definitiva, será requisito necesario estar en posesión da cualificación provisional.
3. A obtención da cualificación provisional ou definitiva non xera para a súa persoa titular o dereito á concesión da subvención nin comporta a súa consideración de persoa beneficiaria da axuda.
Requisitos
1. Serán subvencionables as actuacións realizadas en vivendas unifamiliares, en edificios de vivendas de tipoloxía residencial colectiva ou nas vivendas situadas nestes edificios. Tamén serán subvencionables as actuacións sinaladas no punto 1.e) do ordinal décimo primeiro que se realicen nos espazos públicos situados nos ámbitos das ARI.
2. As actuacións deberán dispoñer de licenza municipal ou, se é o caso, someterse ao réxime de intervención municipal de comunicación previa, así como dispoñer de todas as autorizacións sectoriais preceptivas.
3. As actuacións deberán axustarse ao proxecto de execución das obras, presentado coa solicitude de cualificación provisional ou, se é o caso, á memoria elaborada para a súa execución. A memoria deberá estar asinada por un/unha técnico/a competente, este/a será o/a profesional con capacidade técnica suficiente para redactar o orzamento, dirixir ou executar a obra.
O proxecto ou a memoria técnica deberá conter todas as especificacións que xustifiquen as actuacións que se van executar, así como un resumo en capítulos dos tipos de obra que se vaian executar, e sinalará o seu importe. No suposto de que as obras supoñan unha mellora da eficiencia enerxética, deberase especificar a porcentaxe desa mellora respecto da situación de partida.
As actuacións que se vaian executar deberanse especificar de conformidade coa desagregación establecida no modelo de solicitude de cualificación provisional.
4. As actuacións de rehabilitación e renovación realizaranse de conformidade cos criterios fixados na Guía de cor e materiais elaborada pola Xunta de Galicia.
5. Na execución das actuacións de renovación exíxese a demolición da edificación orixinaria.
6. No caso de se realizaren actuacións en edificios de tipoloxía residencial colectiva, será requisito necesario o acordo validamente adoptado da comunidade de persoas propietarias ou da agrupación de comunidades de persoas propietarias, de executar as obras.
7. As actuacións non poderán estar iniciadas antes do 1 de xaneiro do ano en que se presente a solicitude de cualificación provisional e non poderán en ningún caso estar finalizadas na data da presentación desa solicitude.
8. O prazo máximo de execución da actuación virá determinado na resolución de cualificación provisional.
9. O custo de todas as actuacións subvencionables incluirá tamén os honorarios das persoas profesionais que interveñan, o custo da redacción dos proxectos, das direccións técnicas ou facultativas, os informes técnicos e certificados necesarios, os gastos derivados da tramitación administrativa e calquera outro gasto similar, derivado da actuación, sempre que estean debidamente xustificados. No custo total das obras non se incluirán os gastos derivados de impostos, taxas e tributos.
10. O custo subvencionable das obras, incluídos os gastos sinalados no punto anterior, non poderá superar os custos medios do mercado que correspondan a tales actuacións, os cales se determinarán de conformidade coa última edición publicada da base de prezos da construción de Galicia ou normativa que a substitúa.
Serán causas de denegación da cualificación definitiva, entre outras, as seguintes:
a) Que non se executen as obras de conformidade co previsto na resolución de cualificación provisional, que se executen parcialmente ou se executen obras distintas das previstas na citada resolución de cualificación provisional.
b) Que se incumpra o prazo de execución previsto na resolución de cualificación provisional.
c) Que a solicitude se presentase fóra de prazo.
d) Que non se executen as obras de conformidade coa licenza de obras ou non se cumpran as condicións recollidas nela ou coa comunicación previa, no caso de que a actuación non estivese sometida a licenza.
e) Que se comprobase ou coñecese, en calquera momento, por parte do IGVS, que a obra obxecto de execución xa estivese rematada con anterioridade á data da presentación da solicitude de cualificación provisional.
f) Que o obxecto da actuación non sexa a rehabilitación ou renovación dunha vivenda e tampouco dun edificio de tipoloxía residencial colectiva, entendido de conformidade coas determinacións do Plan 2018-2021.
A onde acudir
Xunta de Galicia
Consellería de Vivenda e Planificación de Infraestruturas
Secretaría Xeral de Vivenda e Urbanismo
Instituto Galego da Vivenda e Solo (IGVS)
Secretaría Xeral do Instituto Galego da Vivenda e Solo (IGVS)
Servizo de Coordinación e Información en Materia de Vivenda
Área Central - Fontiñas
15071
Teléfono: 981541981
Órgano responsable
Dirección Técnica de Axudas e Vivenda
Normativa
Ámbito Autonómico
Resolución do 22 de xuño de 2020 pola que se regula o procedemento para participar no Programa de fomento da rexeneración e renovación urbana e rural do Plan estatal de vivenda 2018-2021, e se establecen as bases reguladoras das subvencións correspondentes á área de rehabilitación integral da Ribeira Sacra (códigos de procedemento VI408L, VI408M e VI408N) (DOG nº 130 do 2 de xullo de 2020).
Resolución do 22 de marzo de 2022 pola que se acorda ampliar ata o 30 de xuño de 2025 o prazo para presentar as solicitudes de cualificación provisional e de cualificación definitiva para actuacións de rehabilitación de edificios e vivendas no ámbito das áreas de rehabilitación integral dos Camiños de Santiago, do Parque Nacional das Illas Atlánticas e da Ribeira Sacra, no marco do Programa de rexeneración e renovación urbanas do Plan de vivenda 2018-2021 (DOG nº 61 do 29 de marzo de 2022).
Resolución do 23 de outubro de 2023 pola que se modifica a Resolución do 22 de marzo de 2022 pola que se acorda ampliar ata o 30 de xuño de 2025 o prazo para presentar as solicitudes de cualificación provisional e de cualificación definitiva para actuacións de rehabilitación de edificios e vivendas no ámbito das áreas de rehabilitación integral dos Camiños de Santiago, do Parque Nacional das Illas Atlánticas e da Ribeira Sacra, no marco do Programa de rexeneración e renovación urbanas do Plan de vivenda 2018-2021 (códigos de procedemento VI408F, VI408G, VI408L e VI408M), e pola que se regula o procedemento para participar no programa de axudas ás actuacións de rehabilitación e renovación nas áreas de rehabilitación integral dos Camiños de Santiago, do Parque Nacional das Illas Atlánticas e da Ribeira Sacra, se establecen as bases reguladoras das subvencións correspondentes ás citadas áreas de rehabilitación integral e se procede á súa convocatoria para o ano 2023 (DOG nº 206 do 30 de outubro de 2023).
Resolución do 3 de maio de 2024 pola que se dá publicidade á relación das persoas beneficiarias do Programa de axudas ás actuacións de rehabilitación e renovación nas áreas de rehabilitación integral dos Camiños de Santiago, do Parque Nacional das Illas Atlánticas e da Ribeira Sacra (DOG nº 95 do 16 de maio de 2024).
Ámbito Estatal
Real Decreto 106/2018, de 9 de marzo, polo que se regula o Plan Estatal de Vivenda 2018-2021 (BOE nº 61 de 10 de marzo de 2018).
Real Decreto 1084/2020, de 9 de diciembre, por el que se modifica el Real Decreto 106/2018, de 9 de marzo, por el que se regula el Plan Estatal de Vivienda 2018-2021 y la Orden TMA/378/2020, de 30 de abril, por la que se definen los criterios y requisitos de los arrendatarios de vivienda habitual que pueden acceder a las ayudas transitorias de financiación establecidas en el artículo 9 del Real Decreto-ley 11/2020, de 31 de marzo, por el que se adoptan medidas urgentes complementarias en el ámbito social y económico para hacer frente al COVID-19 (BOE nº 322 de 10 de diciembre de 2020).
Documentación para a presentación
Forma de presentación das solicitudes de cualificación
1. As solicitudes para as cualificacións provisional e definitiva realizaranse mediante a presentación dos modelos que se incorporan, respectivamente, como anexo III (código de procedemento VI408L) e anexo IV (código do procedemento VI408M) desta resolución. Deberán dirixirse á área provincial do IGVS onde estea situada a vivenda ou o edificio ou, de ser o caso, o espazo público en que se vaian realizar as obras de mellora da calidade e sustentabilidade do medio urbano.
2. As persoas físicas presentarán as solicitudes preferiblemente por vía electrónica, a través dos formularios normalizados dispoñibles na sede electrónica da Xunta de Galicia https://sede.xunta.gal. Opcionalmente, poderán presentar as solicitudes de forma presencial en calquera dos lugares e rexistros establecidos na normativa reguladora do procedemento administrativo común.
3. As persoas xurídicas e as entidades sen personalidade xurídica, así como quen actúe na súa representación, deberán presentar as solicitudes obrigatoriamente por medios electrónicos a través do formulario normalizado dispoñible na sede electrónica da Xunta de Galicia https://sede.xunta.gal. No caso de presentar a súa solicitude de forma presencial, requirirase para que a emende a través da súa presentación electrónica. Nestes casos, considerarase como data de presentación da solicitude aquela en que fose realizada a emenda.
4. Para a presentación electrónica das solicitudes poderá empregarse calquera dos mecanismos de identificación e sinatura admitidos pola sede electrónica da Xunta de Galicia, incluído o sistema de usuario e clave Chave365 (https://sede.xunta.gal/tramites-e-servizos/chave365).
Documentación complementaria para a solicitude de cualificación definitiva
Coa solicitude de cualificación definitiva deberá achegarse a seguinte documentación:
a) Reportaxe fotográfica que amose as obras realizadas.
b) Memoria en que se describan as actuacións realizadas e na cal se xustifique, de ser o caso, o aforro enerxético derivado da actuación.
c) Facturas das persoas provedoras que participaron na execución das obras, que deberán reflectir de xeito desagregado o seu importe e a súa descrición conforme o anexo VII.
d) Documentos bancarios acreditativos do pagamento das facturas presentadas. Non se admitirán pagamentos en efectivo, nin se admitirán como xustificantes os obtidos a través da rede internet se non están validados pola entidade bancaria ou non dispoñen de códigos de verificación na sede electrónica desa entidade bancaria. Excepcionalmente, admitirase o recibo da persoa provedora para gastos por importes inferiores a 1.000 euros.
e) Licenzas e/ou autorizacións preceptivas, no caso de non telas achegado con anterioridade.
f) Certificado do inicio das obras, emitido pola persoa técnica responsable da obra, no caso de non ter iniciadas as obras con anterioridade á publicación desta resolución no DOG.
g) Certificado do remate das obras, no cal se faga constar que as actuacións se realizaron conforme os criterios fixados na Guía de cor e materiais elaborada pola Xunta de Galicia.
h) Copia de, polo menos, tres ofertas de diferentes provedores, no suposto de que o importe do custo que se executará supere a contía de 40.000 euros. A elección entre as ofertas presentadas realizarase conforme criterios de eficiencia e economía, e debe xustificarse expresamente nunha memoria a elección cando non recaia na proposta económica máis vantaxosa, nos termos establecidos no artigo 29.3 da Lei 9/2007, do 13 de xuño.
i) Para as actuacións previstas no artigo 36 do Real decreto 106/2018, do 9 de marzo, do Programa do fomento da mellora da eficiencia enerxética e sustentabilidade en vivendas, de ser o caso:
– Certificado de eficiencia enerxética obtido unha vez realizadas as actuacións, no cal se acredite a redución da demanda ou de consumo, emitido por persoa técnica competente.
– Acta de medición que acredite a mellora das condicións de protección fronte ao ruído, se non se xustifica previamente mediante as opcións recollidas no documento básico de protección fronte ao ruído do Código técnico de edificación.
– Acta de medición da situación unha vez finalizadas as obras, que acredite o cumprimento da redución de forma efectiva da concentración da media anual de radón no interior da vivenda, de non utilizar as solucións que recolla o documento básico de salubridade-protección fronte ao radón do Código técnico de edificación.
2. Non será necesario achegar os documentos que xa foran presentados anteriormente. Para estes efectos, a persoa ou entidade interesada deberá indicar en que momento e ante que órgano administrativo presentou os citados documentos. Presumirase que esta consulta é autorizada polas persoas ou entidades interesadas, salvo que conste no procedemento a súa oposición expresa.
3. Nos supostos de imposibilidade material de obter o documento, o órgano competente poderá requirirlle á persoa ou entidade interesada a súa presentación ou, na súa falta, a acreditación por outros medios dos requisitos a que se refire o documento, con anterioridade á formulación da proposta de resolución.
Forma de presentación da documentación complementaria
1. A documentación complementaria presentarase preferiblemente por vía electrónica. As persoas interesadas responsabilizaranse da veracidade dos documentos que presenten. Excepcionalmente, a Administración poderá requirir a exhibición do documento orixinal para o cotexo da copia electrónica presentada.
A presentación electrónica será obrigatoria para os suxeitos obrigados á presentación electrónica da solicitude. Se algunha das persoas interesadas presenta a documentación complementaria presencialmente, requirirase para que a emende a través da súa presentación electrónica. Para estes efectos, considerarase como data de presentación aquela en que fose realizada a emenda.
Aquelas persoas non obrigadas á presentación electrónica, opcionalmente, poderán presentar a documentación complementaria presencialmente en calquera dos lugares e rexistros establecidos na normativa reguladora do procedemento administrativo común.
2. Para o caso de que se realice a presentación de documentos separadamente da solicitude, deberase indicar o código e o órgano responsable do procedemento, o número de rexistro de entrada da solicitude e o número de expediente, se dispón del.
3. As persoas e as entidades solicitantes responsabilizaranse da veracidade dos documentos que presenten. As copias dos documentos gozarán da mesma validez e eficacia que os seus orixinais, sempre que exista constancia de que sexan auténticas. Excepcionalmente, o IGVS poderá requirir a exhibición do documento orixinal para o seu cotexo coa copia electrónica presentada.
4. No caso de que algún dos documentos para presentar de forma electrónica superar os tamaños máximos establecidos ou tiver un formato non admitido pola sede electrónica da Xunta de Galicia, permitirase a presentación deste de forma presencial, sen prexuízo dos requirimentos que, para estes efectos, lle poida realizar o órgano instrutor.
A información actualizada sobre o tamaño máximo e os formatos admitidos pode consultarse na sede electrónica da Xunta de Galicia.
Trámites posteriores á presentación de solicitudes
A sede electrónica da Xunta de Galicia permite ás persoas e ás entidades interesadas realizar trámites electrónicos, con posterioridade ao inicio do expediente, accedendo á carpeta cidadá da persoa interesada. Cando as persoas interesadas non resulten obrigadas á presentación electrónica das solicitudes, tamén poderán tramitarse presencialmente en calquera dos lugares e rexistros establecidos na normativa reguladora do procedemento administrativo común.
Anexos asociados
Resolución
Prazo de resolución:
Dous meses
Sentido do silencio:
Negativo
Procedementos e servizos relacionados
13/01/2022 00:00 - 30/10/2023 23:59 VI408G
Cualificación definitiva para participar no Programa de rexeneración e renovación urbana e rural no ámbito da ARI dos Camiños de Santiago ou da ARI do Parque Nacional das Illas Atlánticas.
01/02/2022 00:00 - 30/09/2022 23:59 VI408H
Subvencións do Programa de rexeneración e renovación urbana e rural no ámbito da ARI dos Camiños de Santiago ou da ARI do Parque Nacional das Illas Atlánticas
30/03/2022 00:00 - 30/10/2023 23:59 VI408L
Cualificación provisional para participar no programa de rexeneración e renovación urbana e rural no ámbito da ARI da Ribeira Sacra
31/10/2023 00:00 - 28/11/2025 23:59 VI408O
Cualificación provisional para participar no Programa de axudas ás actuacións de rehabilitación e de renovación nas áreas de rehabilitación integral dos Camiños de Santiago, das Illas Atlánticas e na ARI da Ribeira Sacra.
31/10/2023 00:00 - 28/11/2025 23:59 VI408P
Cualificación definitiva para participar no Programa de axudas ás actuacións de rehabilitación ou renovación nas áreas de rehabilitación integral dos Camiños de Santiago, das Illas Atlánticas e da Ribeira Sacra.
31/10/2023 00:00 - 30/11/2023 23:59 VI408Q
Axudas ás actuacións de rehabilitación ou renovación nas ARI dos Camiños de Santiago, do Parque Nacional das Illas Atlánticas e da Ribeira Sacra.
