Tramitación da solicitude/ renovación do título de familia numerosa, a modificación de datos de residencia ou calquera outra modificación dos datos das persoas beneficiarias así como a expedición dun duplicado do título de familia numerosa en caso de desaparición ou extravío.

Así mesmo, ten por obxecto a tramitación da solicitude de carné familiar galego ou no seu caso, dun duplicado do mesmo, o que lle permite ás familias numerosas obter vantaxas ou descontos nos establecementos colaboradores.

As familias numerosas.

Pode obterse o título de familia numerosa sempre e cando a composición da unidade familiar sexa algunha das seguintes:

a) Un ou os dous ascendentes con tres ou máis fillos, sexan ou non comúns

b) Un ou dous ascendentes con dous fillos, sexan ou non comúns, sempre que polo menos un deles teña recoñecido un grao de discapacidade igual ou superior ao 33% ou estea incapacitado para traballar.

c) Dous ascendentes con dous fillos, sexan ou non comúns, cando ambos foran tiveran unha discapacidade igual ou superior ao 33% ou estiveran incapacitados para traballar ou  polo menos un deles tivera un grao de discapacidade igual ou superior ao 65 %,

d) O pai ou a nai separados ou divorciados, con tres ou máis fillos, sexan ou non comúns, aínda que estean en distintas unidades familiares, sempre que se atopen baixo a súa dependencia económica, ainda que non vivan no domicilio conxugal.

e) Dous o máis irmáns orfos de pai e nai sometidos a tutela, acollemento ou garda que convivan co tutor, acolledor ou gardador, pero non ás súas expensas.

f) Tres ou máis irmáns orfos de pai e nai, maiores de dezaoito anos, ou dous, se un deles ten un grao de discapacidade igual ou superior ao 33%, que convivan e teñan unha dependencia económica entre eles

 g) O pai ou a nai con dous fillos, cando falecera o outro proxenitor.

Presentación de solicitudes.

1. As solicitudes presentaranse preferiblemente por vía electrónica a través do formulario normalizado, anexo I, dispoñible na sede electrónica da Xunta de Galicia, https://sede.xunta.gal.

Opcionalmente, as persoas interesadas poderán presentar as solicitudes presencialmente en calquera dos lugares e rexistros establecidos na normativa reguladora do procedemento administrativo común.

Para a presentación de solicitudes electrónicas poderá empregarse calquera dos mecanismos de identificación e sinatura admitidos pola sede electrónica da Xunta de Galicia, incluido o sistema de usuario e clave Chave365.

Documentación complementaria

1. As persoas interesadas deberán achegar coa solicitude, Anexo I, a seguinte documentación:

a) Anexo II

b) Anexo III, só cando proceda.

c) Anexo IV, só cando proceda

d) Informe médico que acredite que se iniciou a semana 21 de embarazo, na data de presentación da solicitude, data prevista de parto e número de fetos, só cando proceda.

e) Certificado de empadronamento, só no caso de menores sen DNI.

f) Certificado de inscrición no Rexistro de Parellas de Feito, só cando proceda.

g) Xustificante de estar cursando no momento da solicitude estudos, no caso de fillos e fillas maiores de 21 anos e ata 25.

h) Copia do libro de familia no que consten todas as fillas ou fillos ou certificación de nacemento do rexistro civil de cada unha das fillas ou fillos que forman parte da unidade familiar .

i) Copia do certificado de defunción do/a outro/a proxenitor/a, de ser o caso.

j) Copia do certificado de discapacidade ou solicitude de revisión do grao da persoa solicitante e do resto de integrantes da unidade familiar, cando proceda e só no caso de que fora emitido por outra Comunidade Autónoma

k) Copia da sentenza de nulidade, separación ou divorcio ou da resolución xudicial que estableza medidas paterno filiais dos fillos e fillas comúns nas unións de feito e/ou do convenio regulador, cando proceda.

l) Copia da resolución xudicial ou administrativa que declare a tutela, adopción, ou o acollemento familiar permanente ou garda con fins de adopción do/s menor/es no seu caso, cando se trate de procedementos formalizados fóra da Comunidade Autónoma de Galicia.

2. Cando se acheguen coa solicitude documentos en idioma distinto do galego ou castelán presentarán tamén a tradución dos ditos documentos a calquera destes dous idiomas, de acordo coa normativa que sexa de aplicación.

3. De conformidade co artigo 28.3 da Lei 39/2015, do 1 de outubro, do procedemento administrativo común, non será necesario achegar os documentos que xa foran presentados anteriormente pola persoa interesada ante calquera Administración. Neste caso, a persoa interesada deberá indicar en que momento e ante que órgano administrativo presentou os ditos documentos, que serán solicitados electronicamente a través das redes corporativas ou mediante consulta ás plataformas de intermediación de datos ou outros sistemas electrónicos habilitados para o efecto, agás que conste no procedemento a oposición expresa da persoa interesada.

De forma excepcional, se non se puidesen obter os citados documentos, poderá solicitarse novamente á persoa interesada a súa achega.

4. A documentación complementaria presentarase preferiblemente por vía electrónica.

Opcionalmente, as persoas interesadas poderán presentar a documentación complementaria presencialmente en calquera dos lugares e rexistros establecidos na normativa reguladora do procedemento administrativo común.

As persoas interesadas responsabilizaranse da veracidade dos documentos que presenten. Excepcionalmente, cando a relevancia do documento no procedemento o exixa ou existan dúbidas derivadas da calidade da copia, a Administración poderá solicitar de maneira motivada o cotexo das copias achegadas pola persoa interesada, para o que poderán requirir a exhibición do documento ou da información orixinal.

5. Sempre que se realice a presentación de documentos separadamente da solicitude deberase indicar o código e o órgano responsable do procedemento, o número de rexistro de entrada da solicitude e o número de expediente, se dispón del.

6. No caso de que algún dos documentos que se vaia presentar de forma electrónica supere os tamaños máximos establecidos ou teña un formato non admitido pola sede electrónica da Xunta de Galicia, permitirase a presentación deste de forma presencial dentro dos prazos previstos e na forma indicada no número anterior. A información actualizada sobre o tamaño máximo e os formatos admitidos pode consultarse na sede electrónica da Xunta de Galicia.

Comprobación de datos

1. Para a tramitación deste procedemento consultaranse automáticamente os datos incluídos nos seguintes documentos en poder da administración actuante ou elaborados polas administracións públicas, agas que a persoa interesada se opoña a súa consulta:

a) Documento nacional de identidade ( DNI) ou número de identidade de extranxeiro (NIE) da persoa solicitante e das restantes persoas que integran a unidade familiar.

b) Certificado de datos de residencia con data da última variación padroal da persoa solicitante e os demais membros que integran a unidade familiar.

c) Certificado de prestacións e importes da persoa solicitante e  demais membros  que integran a unidade familiar, que figuran no rexistro de prestacións públicas.

d) Declaración do IRPF, da persoa solicitante e demais membros da unidade familiar, de ser o caso, correspondente ao último período impositivo con prazo de presentación vencido no momento de presentación da solicitude. No caso de non ter obriga de presentar a declaración do IRPF comprobarase o nivel de renda.

2. Consultaranse, ademais, os seguintes datos  cando a persoa interesada e os demais membros da unidade familiar o fagan constar na solicitude e no anexo II que lle é de aplicación a circunstancia que acredita o documento correspondente:

a) Certificado de discapacidade da persoa solicitante e os demais membros que integran a unidade familiar emitido pola Xunta, no seu caso.

b) Resolución xudicial ou administrativa que declare a tutela, adopción, ou o acollemento familiar permanente ou garda con fins de adopción do/s menor/es no seu caso, cando se trate de procedementos formalizados dentro da Comunidade Autónoma de Galicia

3. No caso de que as persoas interesadas se opoñan á consulta, deberán indicalo no recadro correspondente habilitado no formulario (anexos I e II) e achegar os documentos.

Cando así o exixa a normativa aplicable solicitarase o consentimento expreso da persoa interesada para realizar a consulta.

4. Excepcionalmente, no caso de que algunha circunstancia imposibilite a obtención dos citados datos, poderase solicitar ás persoas interesadas a presentación dos documentos correspondentes.

Trámites administrativos posteriores á presentación da solicitudes

A sede electrónica da Xunta de Galicia permite ás persoas interesadas realizar trámites electrónicos, con posterioridade ao inicio do expediente, accedendo á Carpeta cidadá da persoa interesada. Opcionalmente, as persoas interesadas tamén poderán realizar os ditos trámites presencialmente en calquera dos lugares e rexistros establecidos na normativa reguladora do procedemento administrativo común.

• Fase de solicitude
• Solicitude/renovación do Título de Familia Numerosa ou solicitude de recoñecemento ou asimilación á categoría de descendente da filla ou fillo concibida ou concibido de acordo coa Lei 3/2011 (Anexo I)
• Anexo III
• Anexo IV
• Anexo II