Entidades locais

Documentación complementaria para o procedemento IF500B .

1. As persoas interesadas deberán achegar coa solicitude a seguinte documentación:

• Modelo de presentación, anexo I, debidamente cuberto. O dito modelo está á disposición dos solicitantes na sede electrónica da Xunta de Galicia, procedemento IF500B.

– Para a ocupación de departamento para aparellos de pesca ou acuicultura:

• Para buques pesqueiros/marisqueiros: certificado/s de vendas en lonxa/s dos tres últimos anos naturais enteiros emitido pola/s confraría/s ou pola/s entidade/s xestora/s da/das lonxa/s asociado/s ao solicitante.

• Para buques do sector da acuicultura: certificación relativa ao volume de mexillón descargado nos últimos tres anos naturais enteiros.

• Marisqueo a pé: certificación/s das vendas en lonxa/s dos tres últimos anos naturais, emitido/s pola/s confraría/s ou pola/s entidade/s xestora/s da/s lonxa/s, relativos ao mariscador.

– Para a ocupación de departamento para exportación de produtos da lonxa:

• Certificación/s das compras en lonxa/s dos tres últimos anos naturais enteiros emitido/s pola confraría/s ou pola/s entidade/s xestora/s da/s lonxa/s asociado/s ao solicitante.

– Para solicitudes de ocupación para outros usos diferentes aos de almacén de aparellos de pesca ou exportación:

• Memoria detallada da actividade que, de ser o caso, inclúa un estudo económico-financeiro da actividade que se vai desenvolver na autorización de ocupación de dominio público na totalidade do prazo solicitado, que deberá conter de xeito adaptado á solicitude a relación detallada e xustificada dos ingresos e gastos anuais estimados durante o prazo de vixencia da autorización e avaliación da rendibilidade bruta e neta.

• Documento técnico descritivo, con suficiente detalle, das instalacións, incluíndo documentación gráfica indicativa e fotografías de cada un dos citados elementos, no suposto de que a ocupación leve unida a colocación de instalacións desmontables, equipamentos ou medios mecánicos.

• Documentación técnica que describa a instalación da acometida de subministración de enerxía eléctrica e/ou auga necesaria, agás que esta instalación xa estea dispoñible ou non se precise.

• Análise de riscos da actividade e medidas de mitigación, tanto en materia de seguridade como de ambiente.

• Plano de localización da parcela ou local que se solicita en autorización referenciado en coordenadas UTM. No caso de que a autorización implique a colocación de instalacións desmontables, instalacións de equipamentos ou medios mecánicos, deberase indicar a súa localización.

– En xeral para persoas xurídicas e sen personalidade xurídica:

• Escritura ou documento de constitución, estatutos ou acta fundacional en que consten as normas polas que se regula a súa actividade debidamente inscritos, se é o caso, no rexistro pertinente. Non é necesario se o solicitante é unha Administración pública.

• Poder de representación outorgado a favor do solicitante debidamente verificada a súa suficiencia, e inscrito, se é o caso, no rexistro pertinente, agás que a representación se deduza dos documentos anteriormente citados.

– Portos de Galicia poderá requirir outra documentación complementaria se a considera necesaria e a súa exixencia está xustificada por razón imperiosa de interese xeral.

De conformidade co artigo 28.3 da Lei 39/2015, do 1 de outubro, do procedemento administrativo común, non será necesario achegar os documentos que xa fosen presentados anteriormente pola persoa interesada ante calquera Administración. Neste caso, a persoa interesada deberá indicar en que momento e ante que órgano administrativo presentou os ditos documentos, que serán recollidos electronicamente a través das redes corporativas ou mediante consulta ás plataformas de intermediación de datos ou outros sistemas electrónicos habilitados para o efecto, agás que conste no procedemento a oposición expresa da persoa interesada.

De forma excepcional, se non se puideren obter os citados documentos, poderá solicitarse novamente á persoa interesada a súa achega.

2. A documentación complementaria deberá presentarse electronicamente.

Se algunha das persoas interesadas presenta a documentación complementaria presencialmente, será requirida para que a emende a través da súa presentación electrónica. Para estes efectos, considerarase como data de presentación aquela en que fose realizada a emenda.

As persoas interesadas responsabilizaranse da veracidade dos documentos que presenten. Excepcionalmente, cando a relevancia do documento no procedemento o exixa ou existan dúbidas derivadas da calidade da copia, a Administración poderá solicitar de maneira motivada o cotexo das copias achegadas pola persoa interesada,

3. Sempre que se realice a presentación de documentos separadamente da solicitude deberase indicar o código e o órgano responsable do procedemento, o número de rexistro de entrada da solicitude e o número de expediente se se dispón del.

4. No caso de que algún dos documentos que se vaia presentar de forma electrónica supere os tamaños máximos establecidos ou ten un formato non admitido pola sede electrónica da Xunta de Galicia, permitirase a presentación deste de forma presencial dentro dos prazos previstos e na forma indicada no parágrafo anterior. A información actualizada sobre o tamaño máximo e os formatos admitidos pode consultarse na sede electrónica da Xunta de Galicia.

Comprobación de datos procedemento IF500B .

1. Para a tramitación deste procedemento consultaranse automaticamente os datos incluídos nos seguintes documentos en poder da Administración actuante ou elaborados polas administracións públicas agás que a persoa interesada se opoña á súa consulta:

a) DNI ou NIE da persoa solicitante.

b) DNI ou NIF da persoa representante.

c) NIF da entidade solicitante.

d) Imposto actividades económicas.

e) Certificado de domicilio fiscal.

f) Certificado de estar ao día do pagamento de obrigas tributarias coa AEAT.

g) Certificado de estar ao día do pagamento coa Seguridade Social.

h) Certificado de estar ao día no pagamento das débedas coa Administración pública da Comunidade Autónoma.

2. No caso de que as persoas interesadas se opoñan a esta consulta, deberán indicalo no cadro correspondente habilitado no formulario de inicio e achegar os documentos.

Cando así o exixa a normativa aplicable, solicitarase o consentimento expreso da persoa interesada para realizar a consulta.

3. Excepcionalmente, no caso de que algunha circunstancia imposibilite a obtención dos citados datos, poderase solicitar ás persoas interesadas a presentación dos documentos correspondentes.

Trámites administrativos posteriores á presentación de solicitudes .

Todos os trámites administrativos que as persoas interesadas deban realizar durante a tramitación deste procedemento deberán ser realizados electronicamente accedendo á Carpeta cidadá da persoa interesada dispoñible na sede electrónica da Xunta de Galicia.