As dúas liñas de axuda son as seguintes:

Liña I: equipamentos municipais de tipo sanitario-asistencial, educativo, cultural ou administrativo-institucional, de acordo coa clasificación que establece a epígrafe 3 do anexo I do Regulamento da Lei 2/2016, do 10 de febreiro, do solo de Galicia (Decreto 143/2016, do 22 de setembro).

Poderán ser obxecto de subvención as seguintes actuacións:

a) Renovación do acabamento exterior das fachadas (paramentos cegos, carpinterías ou cerrallarías) que supoñan un impacto paisaxístico como consecuencia da inexistencia dun adecuado acabado final, o deficiente estado de conservación ou a tonalidade e/ou a intensidade da actual cor de acabamento.

Considerarase como deficiente estado de conservación aquel no que se atopen os elementos de fachada como consecuencia de patoloxías construtivas tales como desconchados, humidades ou manchas permanentes, quedando excluídas de forma expresa as deficiencias estéticas que se resolvan con labores de limpeza. Considéranse incluídos os casos de fachadas de cachotería ou cantería que precisen a realización ou renovación dos morteiros de rexuntado.

Os materiais e as cores que se empreguen deberán adaptarse aos criterios da Guía de cor e materiais de Galicia.

Considerarase que a tonalidade ou a intensidade da cor produce un impacto paisaxístico cando non se sitúan dentro da mesma gama cromática e próximas ás recollidas nas correspondentes cartas da Guía de cor e materiais de Galicia.

Queda expresamente excluída a substitución de carpinterías e cerrallarías exteriores, así como o picado de recebos existentes en fachadas de cachotería para deixar vista a pedra, sen prexuízo de que poidan ser obxecto de actuacións de renovación do seu acabamento exterior.

b) Remate ou renovación do acabado exterior de cubertas que, ben por estar rematadas con pranchas de fibrocemento ou solucións construtivas non axeitadas para quedaren á vista, ben por atoparse nun deficiente estado de conservación, constitúen un impacto paisaxístico.

Considéranse incluídas as unidades de obra relativas a elementos ou intervencións inherentes e imprescindibles para o soporte (non estrutural), remate ou renovación das cubertas. Queda excluída de forma expresa a renovación de elementos estruturais, así como as deficiencias estéticas que se resolvan con labores de limpeza.

Para o novo acabado exterior das cubertas empregarase preferentemente tella cerámica ou lousa (en función do material tradicional da comarca), se ben poden empregarse outros materiais e solucións acordes coa edificación e que ofrezan un adecuado resultado estético. Para tal fin aplicaranse os criterios da Guía de cor e materiais de Galicia.

Liña II:

A) Fontes, lavadoiros, palcos de música e hórreos: as actuacións que se van subvencionar son, en todo caso, de índole menor xa que non se cambiará o seu uso nin se aumentará o volume dos elementos estruturais que os compoñen. Establécense as seguintes indicacións para definir as actuacións subvencionables:

Fontes:

– Acondicionar, rehabilitar ou substituír parcial ou totalmente (de ser o caso), aqueles elementos tradicionais que forman parte das fontes polo seu estado de deterioro o por xerar un impacto na paisaxe do seu redor.

– Traballos de corrección de xeometrías, substitución ou reforma das estruturas de soporte o das cubertas (de ser o caso), respectando a arquitectura tradicional coa intención de conseguir unha integración paisaxística coas máximas garantías.

Indícanse a seguir, algunhas das operacións básicas habituais que son necesarias emprender, sen prexuízo das que se poidan considerar necesarias ou axeitadas dependendo dos elementos que se van restaurar:

• Limpeza con auga a baixa presión e manual.

• Picado e descarnado de xuntas en mal estado.

• Emprego de morteiros tradicionais a base de cal.

• Repaso de xuntas en cores acordes ao elemento tradicional ou recomendados en restauracións similares.

• Selado daquelas xuntas que precisan a estanquidade de depósitos e canles.

• Os elementos de fixación ou ancoraxes serán non oxidables, como poden ser aceiro inoxidable ou o bronce, mesmo corpos de carbono, co obxecto de evitar as roturas por expansión do elemento metálico oxidado.

• A ancoraxe das pezas de aceiro ou bronce á pedra farase mediante chumbo fundido. No caso de tratarse de pezas metálicas exteriores ornamentais deterioradas polo óxido, aplicaranse inhibidores de óxido, protexéndoas posteriormente.

• Novas cubertas (de ser o caso).

• Substitución ou reparacións de elementos concretos (caños, cornixas, empedrados, laxas, etc.).

• Mellora das contornas, limpezas e eliminación de biomasas que ocupan as fontes na súa propia situación (non se contemplan os seus accesos).

Lavadoiros públicos:

– Acondicionar, rehabilitar ou substituír parcial ou totalmente (de ser o caso), aqueles elementos tradicionais que forman parte dos lavadoiros públicos polo seu estado de deterioración ou por xerar un impacto na paisaxe do seu redor.

– Traballos de corrección de xeometrías, substitución ou reforma das estruturas de soporte o das cubertas (de ser o caso), respectando a arquitectura tradicional coa intención de conseguir unha integración paisaxística coas máximas garantías.

Indícanse a seguir, algunhas das operacións básicas habituais que son necesarias emprender, sen prexuízo das que se poidan considerar necesarias ou axeitadas dependendo dos elementos que se van restaurar:

• Limpeza con auga a baixa presión e manual.

• Picado e descarnado de xuntas en mal estado.

• Emprego de morteiros tradicionais a base de cal.

• Repaso de xuntas en cores acordes ao elemento tradicional ou recomendados en restauracións similares.

• Selado daquelas xuntas que precisan a estanqueidade dos depósitos e canles de chegada e saída.

• Os materiais pétreos non se hidrofugarán nin se consolidarán con produtos sintéticos de ningunha clase.

• Os elementos de fixación ou ancoraxes serán non oxidables, como poden ser aceiro inoxidable ou o bronce, mesmo corpos de carbono, co obxecto de evitar as roturas por expansión do elemento metálico oxidado.

• A ancoraxe das pezas de aceiro ou bronce á pedra farase mediante chumbo fundido. No caso de tratarse de pezas metálicas exteriores ornamentais deterioradas polo óxido, aplicaranse inhibidores de óxido, protexéndoas posteriormente.

• Novas cubertas (de ser o caso).

• Substitución ou reparacións de elementos concretos (caños, cornixas, empedrados, laxas, etc.).

• Mellora das contornas, limpezas e eliminación de biomasas que ocupan os lavadoiros na súa propia situación (non se contemplan os seus accesos).

Palcos ou quioscos de música:

– Acondicionar, rehabilitar ou substituír parcial ou totalmente (de ser o caso), aqueles elementos tradicionais que forman parte dos palcos ou quioscos de música polo seu estado de deterioro o por xerar un impacto na paisaxe do seu redor.

– Traballos de corrección de xeometrías, substitución de solos, piares, vigas e cubertas que estean en mal estado o con fallos estruturais que poñan en risco aos usuarios.

– Pódense considerar o cambio ou eliminación daqueles elementos ornamentais que non sexan axeitados ou que incidan nun impacto na paisaxe.

Indícanse a seguir, algunhas das operacións básicas habituais que son necesarias emprender, sen prexuízo das que se poidan considerar necesarias ou axeitadas dependendo dos elementos que se van restaurar:

• Picado e descarnado de xuntas en mal estado.

• Repaso de xuntas en cores acordes ao elemento tradicional ou recomendados en restauracións similares.

• Selado daquelas xuntas en pedra, metal, madeira ou similar, que comprometan a seguridade dos elementos de soporte.

• Os materiais pétreos non se hidrofugarán nin se consolidarán con produtos sintéticos de ningunha clase.

Hórreos públicos:

– Acondicionar, rehabilitar ou substituír parcial ou totalmente (de ser o caso), aqueles elementos tradicionais que forman parte dos hórreos, polo seu estado de deterioración o por xerar un impacto na paisaxe do seu redor e que se indican a seguir.

– Só se poderá actuar nos elementos seguintes dos hórreos públicos:

– Portas, cubertas, balagustos ou doelas que estean en mal estado o con fallos estruturais ou roturas.

Pódense considerar o cambio ou eliminación daqueles elementos ornamentais que non sexan axeitados ou que incidan nun impacto na paisaxe.

Indícanse a seguir, algunhas das operacións básicas habituais que son necesarias emprender, sen prexuízo das que se poidan considerar necesarias ou axeitadas dependendo dos elementos que se van restaurar:

• Aproveitarase toda a madeira posible empregando as técnicas e métodos tradicionais; excepcionalmente poderanse substituír elementos irrecuperables polo seu estado. No caso de substitución, deberá ser co mesmo tipo de madeira que nas pezas orixinais.

• Protexerase a madeira cun produto insecticida e funxicida. A pintura e a súa cor será como a existente na zona e no seu caso a recomendada na guía de cores e materiais de Galicia. As súas características permitirán a transpiración da madeira polo que se empregará pintura de poro aberto (lasures). Non se empregarán nin vernices nin pinturas plásticas, aportándose proba mediante ficha técnica da pintura e a súa porosidade.

• As pezas de tella ou de lousa recuperaranse na medida do posible, e a súa renovación farase co xeito tradicional empregado neste tipo de construción, con corte irregular e métodos artesanais e as mesmas medidas.

• Non se disporán pranchas de fibrocemento baixo as tellas, debéndose dispor estas sobre o entaboado de madeira e, de ser necesario, disporase algún tipo de protección sobre este, xa sexa cunha imprimación ou mediante a colocación dunha lámina transpirable.

• No caso de que o hórreo presente restos ou bloques de cerámica ou formigón na parte que corresponde as doelas ou balagustos poderán acceder ás axudas, xustificando tal circunstancia.

B) Outras construcións ou instalacións de titularidade municipal destinadas a outros equipamentos de servizos públicos, de acordo coa clasificación que establece a epígrafe 3 do anexo I do Regulamento da Lei 2/2016, do 10 de febreiro, do solo de Galicia (Decreto 143/2016, do 22 de setembro).

Poderán ser obxecto de subvención as seguintes actuacións:

a) Revestimento exterior de muros de cerramento de terreos realizados con bloques de formigón sen revestir.

O revestimento poderá realizarse con pintura (con ou sen enfuscado previo) ou con morteiros indicados para quedar vistos; en calquera caso aplicaranse tonalidades brancas ou grises/pardas moi claras. Tamén poderá empregarse pedra, acorde coas características da zona. En todos os casos tomaranse como referencia os criterios da Guía de cor e materiais de Galicia e da Guía de caracterización e integración paisaxística de valados.

Tamén poderá ser obxecto de subvención a redución da altura dos citados muros, mediante a supresión de fiadas de bloques ou de elementos prefabricados de formigón como celosías ou balaústres, e o posterior remate do muro.

Así mesmo, poderá ser obxecto de axuda o pintado das portas, portais ou cerrallarías exteriores integradas nos cerramentos de parcelas, que supoñan un impacto paisaxístico como consecuencia do deficiente estado de conservación ou da tonalidade e/ou a intensidade da actual cor do acabamento. As cores que se empreguen deberán adaptarse aos criterios da Guía de cor e materiais de Galicia.

b) Acondicionamento exterior de fachadas, cubertas ou outros elementos constitutivos da construción ou instalación que supoñan un impacto paisaxístico como consecuencia da inexistencia dun adecuado acabado final, o deficiente estado de conservación ou a tonalidade e/ou a intensidade da actual cor de acabamento.

Considerarase como deficiente estado de conservación aquel no que se atopen os citados elementos como consecuencia de patoloxías construtivas tales como desconchados, humidades ou manchas permanentes, quedando excluídas de forma expresa as deficiencias estéticas que se resolvan con labores de limpeza. Considéranse incluídos os casos de fachadas de cachotería ou cantería que precisen a realización ou renovación dos morteiros de rexuntado.

Poderán empregarse as técnicas e materiais de acabado exterior que resulten apropiadas en función do tipo de elemento construtivo sobre o que se interveña, seguindo os criterios da Guía de cor e materiais de Galicia.

Considerarase que a tonalidade ou a intensidade da cor produce un impacto paisaxístico cando non se sitúan dentro da mesma gama cromática e próximas ás recollidas nas correspondentes cartas da Guía de cor e materiais de Galicia.

3. Todas as actuacións deberán aplicar os criterios e recomendacións da Guía de cor e materiais de Galicia das doce grandes áreas paisaxísticas de Galicia, así como no caso dos valados, a Guía de caracterización e integración paisaxística de valados (publicadas na páxina web da Consellería de Medio Ambiente, Territorio e Vivenda) ademais de axustarse ás condicións que veñan impostas pola normativa municipal e sectorial aplicable.

Gastos subvencionables .

1. De acordo co establecido no artigo 29 da Lei 9/2007, do 13 de xuño, de subvencións de Galicia, considéranse gastos subvencionables aqueles gastos que de xeito indubidable respondan á natureza da actividade subvencionada e sexan efectivamente realizados a partir do día seguinte ao de publicación desta resolución.

2. Ao abeiro do regulado nestas bases, serán gastos subvencionables os seguintes:

a) A execución de obras e a adquisición de equipamentos que sexan imputables ao capítulo VI do orzamento de gastos da entidade local, de conformidade coa clasificación económica establecida pola Orde EHA/3565/2008, do 8 de decembro, pola que se aproba a estrutura dos orzamentos das entidades locais.

b) Os custos directamente relacionados cos investimentos que se efectúen, tales como honorarios de arquitectura e enxeñaría. O importe total destes custos xerais non poderá superar o máximo do 10 % do investimento subvencionable.

c) Os proxectos serán completos e de fase única, susceptibles da súa posta en servizo inmediata como consecuencia directa da execución do proxecto subvencionado. En ningún caso se admitirán fases de proxectos.

3. Sen prexuízo de calquera outra actuación que non se considere subvencionable como consecuencia do previsto nesta resolución ou na normativa xeral de subvencións, en ningún caso serán subvencionables:

a) A adquisición de terreos.

b) Os gastos correntes en bens e servizos necesarios para o exercicio das actividades das entidades locais.

c) Os investimentos de carácter inmaterial non incluídos no número 2 deste punto.

d) A adquisición de elementos decorativos ou ornamentais.

4. En ningún caso serán obxecto de subvención os gastos de xuros debedores en contas bancarias, os xuros, recargas e sancións administrativas e penais, nin os gastos dos procedementos xudiciais.

5. En ningún caso serán subvencionables os gastos realizados con anterioridade á data de publicación no DOG da presente resolución.